Қазақстан Премьер-лигасының 21-туры және кейінге қалған 10-турдың бір кездесуі аяқталды. Шымкенттік «Ордабасы» Талдықорғанда «Жетісуды» ірі есеппен жеңіп, чемпионаттағы көшбасшылығын нығайтты. «Астана» өз алаңында тікелей қарсыласы «Оқжетпестен» басым түсіп, үшінші орын үшін күресте маңызды артықшылыққа ие болды.
«Алтай» – «Қызылжар» – 2:2
Голдар: Бьорталид, 45 (0:1). Дадаев, 62 (1:1). Ямбор, 78 (2:1). Бегре, 90+2 (2:2).
Өскемендегі кездесудің бірінші таймында қауіпті шабуылдар аз болды. Командалар көп жағдайда орталық алаңда допқа таласып жүріп алды. Үзіліс алдында ғана Йоханнес Бьорталид айып добын сәтті орындап, қонақтарды алға шығарды.
Екінші тайм әлдеқайда қызықты өтті. 62-минутта Ибрагим Дадаев есепті теңестірсе, 78-минутта Никола Ямбор «Алтайды» алға шығарды. Өскемендіктер маңызды үш ұпайға өте жақын болғанымен, қосымша уақытта Этьен Бегре таразы басын теңестірді. Осылайша, ойын 2:2 есебімен тең аяқталды
«Жетісу» – «Ордабасы» – 0:4
Голдар: Э. Астанов, 18 (0:1. Натель, 46 (0:2). С. Астанов, 79 (0:3). Эвертон, 80 (0:4).
Талдықорғанда чемпионат көшбасшысы қарсыласына еш мүмкіндік қалдырмады. Алғашқы минуттар салыстырмалы түрде сақ өткенімен, «Ордабасы» өзінің бірінші нақты мүмкіндігін-ақ голға айналдырды. 18-минутта Алекса Амановичтің әуелеткен пасынан кейін Эльхан Астанов баспен қақпаны дәл көздеп, есеп ашты.
Екінші тайм бастала салысымен шымкенттіктер басымдығын арттырды. «Жетісу» қақпашысы мен қорғаушысының өзара түсінісе алмауын Лео Натель тиімді пайдаланып, бос қалған қақпаға допты енгізді.
Кездесудің соңғы бөлігінде талдықорғандықтардың қорғанысы мүлдем сыр берді. 79-минутта Сұлтанбек Астанов үшінші голды соқса, араға бір минут салып Эвертон Мораес есепті 4:0-ге жеткізді.
Осы жеңістен кейін «Ордабасы» 49 ұпай жинап, екінші орында тұрған «Қайраттан» төрт ұпайға ұзап кетті. Рас, алматылық клубтың бір ойыны кем. Дегенмен шымкенттіктер чемпиондық жолындағы кезекті міндетін сенімді орындады.
«Каспий» – «Ұлытау» – 1:1
Голдар: Кеба, 45 (1:0), Зүлфиқаров, 72 (1:1).
Соғылмаған пенальти: Абылайхан, 20.
Қызылордада өткен кездесуде екі команда бір-бір ұпайдан бөлісті. Бірінші таймда «Каспий» белсендірек көрінді және есепті ертерек ашуға мүмкіндік алды. 20-минутта Рамазан Абылайхан пенальти орындағанымен, допты қақпа торына тулата алмады.
Соған қарамастан, үзіліске дейін ақтаулықтар өз дегеніне жетті. Ноа Ндомбасидің пасынан кейін Кеба Силла дәл соққы жасап, «Каспийді» алға шығарды.
Екінші таймда «Ұлытау» ойынын айтарлықтай жақсартты. Жезқазғандықтар қысымды күшейтіп, 72-минутта Бақдәулет Зүлфиқаровтың голымен есепті теңестірді. Қалған уақытта екі жақта да жеңісті жұлып алуға мүмкіндік болды, бірақ таблодағы есеп өзгерген жоқ.
«Астана» – «Оқжетпес» – 2:1
Голдар: Лотоцкий, 20 (0:1). Бартолец, 28 (1:1).Томасов, 40 (2:1).
Турдың орталық кездесулерінің бірі елордада өтті. Бұл матч үшінші орын үшін күресте аса маңызды еді, өйткені «Астана» мен «Оқжетпес» бір-біріне тікелей бәсекелес болып келді.
Алғашқы болып қонақтар есеп ашты. 20-минутта бұрыштамадан кейін Борис Лотоцкий баспен қақпаның саңылауын тауып, «Оқжетпесті» алға шығарды. Алайда көкшетаулықтардың қуанышы ұзаққа созылған жоқ. Сегіз минуттан кейін Карло Бартолец айып алаңына кіріп, дәл соққымен есепті теңестірді.
40-минутта Марин Томасов қарсылас қорғанысындағы қателікті тиімді пайдаланып, «Астананы» алға шығарды. Екінші таймда елордалықтар есепті ұлғайтуға бірнеше рет жақын болды, алайда Мирослав Лобанцев қақпасын бірнеше қауіпті жағдайда аман алып қалды.
Матчтың соңғы секундтарында «Оқжетпес» тең есепке қол жеткізуі мүмкін еді. Василий Совпельдің соққысы қақпа бағанасына тиіп, алаң иелері үш ұпайды сақтап қалды.
Осы жеңістен кейін «Астана» 38 ұпай жинап, үшінші орнын нығайтты. «Оқжетпестің» еншісінде 33 ұпай бар. Екі команданың арасы бес ұпайға дейін ұлғайды.
«Елімай» – «Ертіс» – 3:1
Голдар: Свиридов, 73 (1:0). Миттендорфер, 77-автогол (1:1). Бахтияров, 80 (2:1). Оматай, 90+2 (3:1).
Қызыл қағаз: Мбодж, 82.
Семейдегі кездесудің негізгі оқиғалары соңғы жиырма минутта өрбіді. Бірінші таймда «Елімай» көбірек шабуылдағанымен, павлодарлықтар қорғаныста төтеп берді және есеп ашылған жоқ.
73-минутта Иван Свиридов есеп ашып, алаң иелерін алға шығарды. Алайда төрт минуттан кейін Май Миттендорфер допты өз қақпасына енгізіп, «Ертіске» есепті теңестіруге көмектесті.
Тең есеп небәрі үш минут сақталды. Ақмаль Бахтияров семейліктерді қайта алға шығарды. 82-минутта Папа Мбодж қызыл қағаз алып, павлодарлықтардың жағдайын қиындатты. Қосымша уақытта Мирас Оматай үшінші голды соғып, матчқа нүкте қойды.
«Елімай» үш ойындық жеңіссіз сериясын тоқтатып, 31 ұпайға жетті. Семейлік клуб жүлделі орындар үшін күрестен әлі де алыстап кеткен жоқ. Ал «Ертіс» қатарынан екі жеңістен кейін қайтадан ұпайсыз қалды.
«Атырау» – «Ақтөбе» – 1:1
Голдар: Максимович, 37 (1:0). Соса, 75 (1:1).
Кейінге қалған 10-тур аясындағы кездесу Түркістанда өтті. Бұл ойын Самат Смақовтың «Атыраудың» бас бапкері ретіндегі алғашқы матчы болды.
Бірінші таймда «мұнайшылар» белсендірек ойнады. 37-минутта бұрыштамадан кейін Джордже Максимович қақпаны дәл көздеп, «Атырауды» алға шығарды.
Үзілістен кейін «Ақтөбе» шабуылды күшейтті. Алаңға Луиш Нани да шықты. Қонақтардың қысымы 75-минутта нәтиже беріп, Даниэль Соса есепті теңестірді.
Қалған уақытта жеңімпаз анықталған жоқ. Самат Смақов алғашқы кездесуінде бір ұпай алса, Игорь Черевченко «Ақтөбедегі» алғашқы ұпайына қол жеткізді.
Кейінге шегерілген матчтар
21-тур аясындағы «Қайрат» – «Жеңіс» және «Тобыл» – «Қайсар» кездесулері кейінгі мерзімге ауыстырылды. Сондықтан турнирлік кестедегі жағдай әлі де өзгеруі мүмкін.
Тур қорытындысы
21-турдан кейін «Ордабасы» чемпионаттағы көшбасшылығын нығайтты. Шымкенттік команда 21 матчтан кейін 49 ұпай жинап отыр. Екінші орындағы «Қайраттың» 45 ұпайы бар, бірақ алматылықтардың бір ойыны кем.
Қола жүлде үшін күресте «Астана» маңызды қадам жасады. Елордалықтар тікелей қарсыласы «Оқжетпесті» жеңіп, 38 ұпаймен үшінші орында келеді. Көкшетаулықтар бес ұпай артта қалды. «Ақтөбе» 32 ұпаймен бесінші орында болса, 31 ұпай жинаған «Елімай» да медаль үшін таластан әлі шыққан жоқ.
Төменгі бөлікте жағдай бұрынғыдай өте тығыз. «Жетісу» ірі жеңілістен кейін қауіпті аймаққа жақындай түсті, ал «Ертіс» пен «Алтай» 17 ұпайдан жинап, соңғы орындарда тұр.