Қазақстан Бірінші лигасының 17-туры мәресіне жетті. Турдың басты жаңалығы – чемпиондыққа таласып жатқан «Қайрат-Жастардың» маусымдағы алғашқы жеңілісі. Ал қарағандылық «Шахтер» қатарынан оныншы жеңісіне қол жеткізіп, турнир кестесіндегі көшбасшылығын нығайта түсті.
«Шахтер» өз алаңында «Каспий» жастарын қабылдап, 1:0 есебімен басым түсті. Ал екінші орында келе жатқан «Қайрат-Жастар» Семейде «Елімай» жастарынан дәл осындай есеппен жеңіліп қалды. Үшінші сатыдағы «Тұран» өз жанкүйерлері алдында «Астана Ж» командасын 5:1 есебімен ойсырата ұтып, жеңісті сериясын төрт матчқа жеткізді.
Өзге кездесулерде «Жайық» «Тараздан» 2:0 есебімен айласын асырса, «Оңтүстік Академиясы» «Хан-Тәңірін» 3:1 есебімен қапы қалдырды. «Арыс» өз алаңында «Тобыл Ж»-қақпасына үш жауапсыз гол соқты. Ал «Батыр» сырт алаңда «Ақтөбе Ж» командасын 2:0 есебімен тізе бүктірді.
Осылайша, 17 турдан кейін «Шахтер» 46 ұпаймен Бірінші лиганың көшін бастап тұр. «Қайрат-Жастар» 42 ұпаймен екінші орында қалды. Ал 37 ұпай жинаған «Тұран» үшінші сатыдағы орнын сақтап қалды.
«Шахтер» көш басында
Қарағандылық «Шахтер» 17-турда өз алаңында Ақтаудың «Каспий Ж» командасын қабылдады.
Кездесу тартысты өтіп, қос команда да ұзақ уақыт бойы есеп аша алмады. Қарағандылықтар шабуылда белсенді болғанымен, ақтаулықтардың қорғанысын бұзу оңайға соққан жоқ.
Матч тағдыры 84-минутта шешілді. Андрей Ульшин қарсылас қақпасын дәл көздеп, алаң иелеріне маңызды үш ұпай сыйлады. Қалған уақытта есеп өзгерген жоқ.
Осылайша, «Шахтер» чемпионаттағы жеңісті сериясын он матчқа жеткізді. Қарағандылық клуб 46 ұпаймен турнир кестесінің көшін бастап тұр. «Каспий Ж» 21 ұпаймен тоғызыншы орында келеді.
«Қайрат-Жастар» маусымда алғаш рет жеңілді
Семейде өткен кездесуде «Елімай Ж» чемпиондыққа таласып жатқан «Қайрат-Жастарды» 1:0 есебімен жеңіп, турдың басты сенсацияларының бірін жасады.
Бірінші таймда командалар есеп аша алмады. Кездесудің жалғыз голы 59-минутта соғылды. Мақсат Серғазы алматылықтардың қақпасын дәл көздеп, семейлік командаға жеңіс сыйлады.
«Қайрат-Жастар» қалған уақытта есепті теңестіруге тырысқанымен, алаң иелері минималды басымдығын сақтап қалды.
Бұл «Қайрат-Жастардың» биылғы Бірінші лигадағы алғашқы жеңілісі болды. Алматылықтар 42 ұпаймен көшбасшы «Шахтерден» төрт ұпайға артта қалды. «Елімай Ж» 12 ұпай жинады.
«Тұранның» сериясы жалғасты
Түркістандық «Тұран» өз алаңында «Астана Ж»-ны қабылдап, 5:1 есебімен ойсырата ұтты.
Алаң иелері кездесуді қарқынды бастады. Тоғызыншы минутта Едіге Оралбай есеп ашса, сегіз минуттан кейін тағы да мергендік танытып, дубль авторы атанды.
Екінші таймның 51-минутында Мирас Тұрлыбек үшінші голды соқты. 77-минутта елордалықтардың 15 жастағы ойыншысы Ануар Төленді есеп айырмасын қысқартты.
Алайда матчтың соңғы бөлігінде түркістандықтар тағы екі рет мергендік танытты. Темірлан Мұрзағалиев пен Руслан Валиуллин қарсылас қақпасын дәл көздеп, қорытынды есепті 5:1-ге жеткізді.
Бұл «Тұранның» Бірінші лигадағы қатарынан төртінші жеңісі болды. Түркістандық клуб 37 ұпаймен үшінші орында келеді. «Астана Ж» 26 ұпаймен бесінші сатыда тұр.
«Жайық» «Таразды» екі доп айырмасымен жеңді
Оралдық «Жайық» өз алаңында «Тараздан» 2:0 есебімен басым түсті.
Кездесудің алғашқы жарты сағатында жамбылдықтар бірнеше қауіпті шабуыл ұйымдастырғанымен, өз мүмкіндіктерін пайдалана алмады. 30-минутта алаң иелері есеп ашты. Хамза Якуди айып алаңының сыртынан әдемі соққы жасап, допты қақпаға бағыттады.
Екінші таймда «Тараз» таразы басын теңестіру үшін алға ұмтылды, бірақ оралдықтардың қорғанысы сыр берген жоқ. 86-минутта Артем Астахов қақпашының үстінен допты асыра теуіп, кездесудің қорытынды есебін белгіледі – 2:0.
Осы жеңістен кейін «Жайық» 26 ұпай жинап, алтыншы орынға көтерілді. Ал «Тараз» маусымдағы сегізінші жеңілісіне ұшырады.
«Оңтүстік Академиясы» үш гол соқты
Шымкенттік «Оңтүстік Академиясы» өз алаңында алматылық «Хан-Тәңірін» 3:1 есебімен жеңді.
Алаң иелері кездесудің бастапқы бөлігін өте нәтижелі өткізді. 11-минутта Бақдәулет Нұралы есеп ашты. Үш минуттан кейін Әлихан Әли екінші голды соқты.
25-минутта Бахтишат Абдуллаев «Хан-Тәңірінің» бір добын қайтарды. Дегенмен екінші таймда шымкенттіктер қайтадан басымдықты арттырды. 61-минутта Әлихан Әли өзінің екінші голын соғып, дубль рәсімдеді.
«Оңтүстік Академиясы» 29 ұпаймен төртінші орында келеді. «Хан-Тәңірі» 17 ұпаймен оныншы сатыда тұр.
«Батыр» Ақтөбеден үш ұпай алып қайтты
Екібастұздық «Батыр» сырт алаңда «Ақтөбе Ж» командасын 2:0 есебімен тізе бүктірді.
Қонақтар екі голын да бірінші таймда соқты. Кездесудің басты қаһарманы Ансар Алтынхан болды. Ол 26-минутта есеп ашып, жеті минуттан кейін екінші рет мергендік танытып, дубль авторы атанды.
Екінші таймда есеп өзгерген жоқ. «Батыр» қорғаныста сенімді ойнап, сырт алаңдағы маңызды жеңісіне қол жеткізді.
Осы нәтижеден кейін екібастұздық команда 23 ұпай жинап, сегізінші орынға көтерілді. «Ақтөбе Ж» 17 ұпаймен 11-сатыда қалды.
«Арыс» үш ұпай еншіледі
«Арыс» өз алаңында Қостанайдың «Тобыл Ж» командасын 3:0 есебімен қапы қалдырды.
Алаң иелері 10-минутта есеп ашты. Қақпашы алғашқы соққыны қайтарғаннан кейін Бекзат Мансұров допқа бірінші жетіп, оны бос қақпаға бағыттады.
22-минутта Мақсат Иманәлі қорғаушыдан сытылып шығып, қақпашымен жеке қалып, есепті 2:0-ге жеткізді. Матчтың соңғы нүктесін 88-минутта Жан Рахимжанов қойды.
Осы жеңістен кейін «Арыс» 13 ұпай жинады. Ал жеті ұпайы бар «Тобыл Ж» турнир кестесінің соңғы орнында қалды.
17-турдың нәтижелері
- «Шахтер» – «Каспий Ж» – 1:0
- «Елімай Ж» – «Қайрат-Жастар» – 1:0
- «Тұран» – «Астана Ж» – 5:1
- «Жайық» – «Тараз» – 2:0
- «Оңтүстік Академиясы» – «Хан-Тәңірі» – 3:1
- «Ақтөбе Ж» – «Батыр» – 0:2
- «Арыс» – «Тобыл Ж» – 3:0
Турнирлік кестенің үздік үштігі
- «Шахтер» – 46 ұпай
- «Қайрат-Жастар» – 42 ұпай
- «Тұран» – 37 ұпай