«Қайсардың» негізгі қақпашысы Нұрымжан Салайдин былтырғы маусымнан бері сенімді ойынымен көзге түсіп жүр. Осы маусымда ол Қазақстан Премьер-лигасында 17 матч өткізіп, 67 сейв жасап, төрт кездесуде қақпасына гол жібермеді. Біз Нұрымжанмен кубоктағы жеңіс, команданың қазіргі жағдайы, ұлттық құрамадағы арманы және әйгілі Виктор Мозеспен әріптес болу жайлы әңгімелестік.
– Нұрымжан, жеңіс құтты болсын! «Қайсар» Қазақстан кубогының жартылай финалының алғашқы ойынын жеңіспен бастады. Осы матч жайлы не айтасыз?
– Ассалаумағалейкум! Рахмет көп-көп. Иә, алғашқы ойында жеңдік. Бірақ кубок екі матчтан тұратын дода болғандықтан, алдымызда әлі қарымта кездесу бар. Алла қаласа, сол ойында да жеңіске жетіп, финалға жолдама алуды мақсат етіп отырмыз.
– Кубок пен чемпионатты қатар алып жүру қаншалықты қиын?
– Қазіргі таңда аса қиын деп айта алмаймын. Себебі кубок ойындары араға бір-екі ай салып өтеді. Сондықтан чемпионат пен кубокты қатар алып жүру моральдық әрі физикалық тұрғыдан ауырлық тудырып жатқан жоқ. Дегенмен әр матчқа тыңғылықты дайындалуға тырысамыз.
– Биыл негізінен чемпионатта ғана қақпада тұрсыз. Бұл бапкерлер штабының шешімі ме?
– Иә, бұл толықтай бапкерлер штабының шешімі. Біз жарыстарды бөліп қарамаймыз. Барлығымыздың мақсатымыз бір – командаға пайда әкелу. Қай турнирде мүмкіндік берілсе де, сенімді ақтауға тырысамын.
– Маусым басында «Қайсар» өз ойын жүйесін бірден таба алмады. Қазір команда тұрақталды деп айтуға бола ма?
– Иә, соңғы нәтижелерге қарасақ, жағдайымыз жақсарып келеді. Команданың ойыны тұрақтанып келе жатқанын байқауға болады. Алда чемпионаттың әлі он туры бар. Сол кездесулерде де жақсы нәтиже көрсетіп, жанкүйерлерімізді қуантқымыз келеді.
– Қорғаныс шебі мен қақпашының өзара түсіністігі қаншалықты жақсарды?
– Маусым басынан бері бір-бірімізді жақсы түсінеміз. Әр футболшы серіктесінің осал тұсын жауып, қателік жібермеуге тырысады. Жаңа қорғаушылардың келуі ішкі бәсекелестікті арттырды, соның арқасында сенімділігіміз де күшейді.
– Ұлттық құрамаға шақырту алу үшін тағы қандай қырларыңызды жетілдіру қажет деп ойлайсыз?
– Әлі де көп жұмыс істеу керек. Әзірге шақырту алмауым – бапкерлер штабының таңдауы. Бірақ бұл мені тоқтатпайды. Өзімді күн сайын дамытуға, алаңда барымды көрсетуге тырысамын.
– Ұлттық құрама жейдесін кию сіз үшін қаншалықты маңызды?
– Бұл – бала күнгі арманым. Әрбір футболшы сияқты мен де ұлттық құрама сапында ойнауды қалаймын. Сол мақсатқа жету үшін еңбектеніп келемін және алдағы уақытта арманым орындалады деп сенемін.
– Виктор Мозес командаға келгенде алғашқы әсеріңіз қандай болды?
– Дубайдағы оқу-жаттығу жиындарында оның келетіні туралы естігенде алғашында сенбедік. Бірақ жаттығуға қосылған кезде бәріміздің көзіміз жетті. Англия Премьер-лигасында өнер көрсеткен футболшының Қазақстанға келуі – үлкен оқиға болды.
– Ол жаттығуларда өзін қалай көрсетеді? Жас ойыншыларға кеңес бере ме?
– Әрине. Оның шеберлігі жаттығудың өзінде-ақ байқалады. Сонымен қатар мол тәжірибесімен бөлісіп отырады. Жастарға да, бізге де пайдалы кеңестерін айтып, қажет кезде ақылын береді. Жоғары деңгейде ойнаған футболшы екені бірден көрінеді.
– Қателік жібергеннен кейін өзіңізді қалай тез жинайсыз?
– Егер қателік ойын барысында болса, оны бірден ұмытуға тырысамын. Себебі ең бастысы – одан кейін тағы гол жіберіп алмау. Ал матч аяқталған соң сол сәтке міндетті түрде талдау жасаймыз. Қақпашылар бапкерімен сөйлесіп, келесі жолы қайталамауға жұмыс істейміз.
– Осы маусымдағы ең қиын сейвіңіз қайсы болды?
– «Каспийге» қарсы ойында алыстан бағытталған өте ауыр соққыны қайтарған сәтім есімде қалды. Доп күтпеген жерден әрі өте қатты ұшты. Сол сейв өзіме де ерекше ұнады.
– Футболдан тыс уақытта немен айналысасыз? Демалысты қалай өткізгенді ұнатасыз?
– Футболшылардың бос уақыты көп бола бермейді. Қолым қалт етсе, отбасыммен бірге уақыт өткізуге тырысамын. Бірге серуендегенді ұнатамыз. Сонымен қатар атқа мінгенді жақсы көремін.