Ақтөбеде өткен әйелдер арасындағы УЕФА Чемпиондар лигасының екінші іріктеу кезеңіндегі кіші-турнирдің жартылай финалында жергілікті «Ақтөбе» клубы Исландияның «Брейдаблик» командасын жеңіп, финалға жолдама алды.
Кездесу қарқынды басталып, 12-минутта қазақстандық жартылай қорғаушы Екатерина Бабшук есеп ашты. Алайда төрт минуттан кейін исландиялық клуб сапындағы Кейтлин Дуонг таразы басын теңестірді. Негізгі және қосымша уақыт 1:1 есебімен аяқталды.
Жеңімпаз матчтан кейінгі пенальти сериясында анықталды. Бұл сында «Ақтөбе» футболшылары мықтылық танытып, қарсыласын 2:0 есебімен ұтты. Команданың ресейлік қақпашысы Зухра Толибекова екі бірдей пенальтиді қайтарып, жеңіске зор үлес қосты.
Екінші жартылай финалда Швейцарияның «Серветт» клубы Беларусьтің «Динамо»-БГУФК командасын 3:0 есебімен сенімді жеңді.
Осылайша, шешуші кездесуде «Ақтөбе» мен «Серветт» кездеседі. Ал «Брейдаблик» пен «Динамо»-БГУФК үшінші орын үшін сынға түседі.
Айта кетейік, кіші-турнирдің жеңімпазы әйелдер арасындағы УЕФА Чемпиондар лигасының үшінші іріктеу кезеңіне жолдама алады.