9–10 сәуір күндері Қазақстан футболының маңызы жағынан екінші дивизионы – Бірінші лига ойындарының алғашқы тур матчтары өтті.
Матч нәтижелері:
«Түркістан» – «Шахтер» – 1:2
«Каспий» – AKAS – 3:1
Ertis – «Екібастұз» – 4:0
«Тараз» – «Жетісай» – 1:2
«Оңтүстік» – «Алтай» – 0:2
«Хан-Тәңірі» – «Ақтөбе-Ж» – 2:0
SD Family – «Қайрат-Жастар» – 3:0
«Түркістан» – «Шахтер» – 1:2
Былтырғы маусымнан кейін Премьер-лигамен қоштасқан «Шахтер» Бірінші лиганың алғашқы турында-ақ жоғарғы лигаға қайта оралуға ниетті екенін дәлелдеді. Түркістанда жергілікті командамен өткен ойында «кеншілер» бір доп айырмасымен жеңіске жетті. Алаң иелері даңқты қарсыластарына лайықты қарсылық көрсетіп, таразы басын теңестіргенімен, «Шахтердің» екінші голына жауап қайтара алмады.
«Каспий» – AKAS – 3:1
Жоғарғы лигаға үміткер тағы бір команда – ақтаулық «Каспий» Жаңаөзенде Бірінші лиганың дебютанты – AKAS командасын қабылдады. Ақтаулықтар ә дегеннен ойын тізгінін өз қолдарына алып, сенімді түрде жеңіске жетті. Ал алматылықтардың жаңа лигадағы дебюті сәтсіз аяқталды.
Ertis – «Екібастұз» – 4:0
Бірінші лиганың басты фавориттерінің бірі – Ertis өз алаңында «Екібастұзды» қабылдады. Павлодар дербиінің алғашқы таймы тең дәрежеде өткенімен, екінші таймда еліміздің бес дүркін чемпиондары ірі есеппен жеңіске жетті. Ерекше атап өтерлігі – Ertis сапында өнер көрсететін екібастұздық шабуылшы Максим Федин өз қаласының қақпасына гол соқты.
«Тараз» – «Жетісай» – 1:2
Оңтүстік өңірінің екі командасы арасындағы кездесуде қонақтардың бағы жанды. Матчтың бірінші таймы «Тараз» үшін сәтті басталған еді. Алаң иелері ойын тізгінін қолдарына алып, есепті бірінші болып ашты. Бірақ екінші таймда «Жетісай» футболшылары жеті минут ішінде есепті теңестіріп қана қоймай, қарсыластарынан жеңісті жұлып алды.
«Оңтүстік» – «Алтай» – 0:2
Ойын соңындағы таблодағы есепті есепке алмағанда, кездесу негізінен тең дәрежеде өтті деп айтуға болады. Тек өскемендік ұжым өз мүмкіндіктерін тиімді пайдалана алды. Екінші тайм аяқталар тұста «Алтай» клубының футболшысы Әділет Омарбек дубль жасап, командасына маңызды үш ұпай сыйлады.
«Хан-Тәңірі» – «Ақтөбе-Ж» – 2:0
Алматылықтар бұл кездесудің айқын фавориті саналғанымен, ойынның бірінші таймы оңайға соққан жоқ. Алаң иелерінің екі футболшысы сары қағаз алып, шабуылдары нәтижесіз аяқталып жатты. Алмас Құлшынбаев шәкірттері тек үзілістен кейін өз мүмкіндіктерін тиімді пайдаланып, жеңіске жетті.
SD Family – «Қайрат-Жастар» – 3:0
Турдың сенсациясы SD Family мен «Қайрат-Жастар» арасындағы матчта тіркелді. Бірінші лиганың былтырғы маусымында көшбасшылардың қатарында жүрген «Қайрат-Жастар» футболшылары SD Family клубынан ойсырай жеңілді. «Қайраттың» жастары ресми түрде қонақ команда саналғанымен, ойын Алматыдағы «Жас Қыран» стадионында өтті. Елордалық клуб «Қайрат-Жастар» қақпасына жауапсыз үш гол соғып, алматылықтарға еш мүмкіндік қалдырмады.
Екінші турдың матчтар (17–18 сәуір):
«Ақтөбе-Ж» – Ertis
«Қайрат-Жастар» – «Хан-Тәңірі»
«Жетісай» – «Каспий»
«Оңтүстік» – «Тараз»
«Алтай» – «Екібастұз»
«Шахтер» – SD Family
AKAS – «Түркістан»