Қазақстан Бірінші лигасының 14-туры мәресіне жетті. Тур қорытындысында көш бастап тұрған «Қайрат-Жастар» өз алаңында қарсыласын ірі есеппен ұтып, бірінші орнын сақтап қалды. Ал екінші сатыдағы қарағандылық «Шахтер» сырт алаңда үш ұпай алып, көшбасшыдан бір ғана ұпайға қалып келеді.
Алматыда «Қайрат-Жастар» Ақтаудың «Каспий Ж» командасын 6:0 есебімен жеңді. Екінші орында келе жатқан «Шахтер» сырт алаңда «Батырды» 2:0 есебімен басым түсті. Үшінші сатыдағы «Тұран» да сенімді ойын көрсетіп, түзде «Арысты» 4:0 есебімен ойсырата ұтты.
Өзге кездесулерде «Астана Ж» өз алаңында «Жайықты» 1:0 есебімен жеңсе, «Оңтүстік Академиясы» сырт алаңда «Тобыл Ж»-дан 3:2 есебімен айласын асырды. «Елімай Ж» Алматыда «Хан-Тәңірін» 1:0 есебімен тізе бүктірсе, «Тараз» бен «Ақтөбе Ж» кездесуі 1:1 есебімен тең аяқталды.
Осылайша, 14 турдан кейін «Қайрат-Жастар» 38 ұпаймен турнир кестесінің көшін бастап тұр. «Шахтер» 37 ұпаймен екінші орында келеді. Ал үздік үштікті 28 ұпай жинаған «Тұран» түйіндеп тұр.
14-турда елордалық «Астана Ж» өз алаңында оралдық «Жайықты» қабылдады. Бірінші таймда қос команда есеп аша алмағанымен, екінші кезеңде алаң иелері басымдыққа ие болды.
Матчтағы жалғыз гол 73-минутта соғылды. Тимур Төкенов айып алаңына еніп, сол аяқпен дәл соққы жасап, командасына жеңіс сыйлады. Осы нәтижеден кейін «Астана Ж» 23 ұпаймен төртінші орынға көтерілсе, «Жайық» 19 ұпаймен алтыншы сатыда қалды.
Алматылық «Қайрат-Жастар» өз жанкүйерлері алдында «Каспий» жастарын қабылдап, турдағы ең ірі жеңістердің біріне қол жеткізді.
Есеп бірінші таймда-ақ ашылды. Бұрыштамадан кейін Жанер Жазмағамбетов өз қақпасына гол соқты. Кейін Кәрім Махаметжан пенальтиден мергендік танытты. Екінші таймда Евгений Петрик дубль авторы атанып, Абылай Төлеухан мен Ақежан Қаликулов та гол соқты. Қонақтар кездесуді тоғыз ойыншымен аяқтады.
Бұл жеңістен кейін «Қайрат-Жастар» 38 ұпаймен көшбасшылық орнын сақтап қалды.
Түркістандық «Тұран» бұл турда «Арысқа» қонаққа барып, 4:0 есебімен жеңіске жетті.
Қонақтар есепті екінші минутта ашты. Арман Кенесов кейін дубль авторы атанып, Қуаныш Дүйсенбекұлы мен Әлімжан Еркен де мергендер қатарына қосылды. Осы жеңістен кейін «Тұран» 28 ұпаймен үшінші орнын сақтап қалды.
Семейлік «Елімай Ж» Алматыда «Хан-Тәңірімен» кездесіп, минималды есеппен жеңіске жетті. Кездесудегі жалғыз голды 37-минутта Нұрасыл Советқазы соқты.
Бұл семейлік ұжымның қатарынан екінші жеңісі болды. Команда тоғыз ұпай жинап, турнир кестесінде 13-орынға көтерілді. Ал «Хан-Тәңірі» қатарынан төртінші рет жеңіліп, сегізінші орында қалды.
Қостанайда өткен кездесуде «Оңтүстік Академиясы» алғашқы таймда үш гол соғып, ойын тағдырын шешіп тастағандай көрінді. Алихан Әли дубль авторы атанса, тағы бір гол автогол ретінде тіркелді.
Екінші таймда «Тобыл Ж» екі голмен жауап бергенімен, есепті теңестіре алмады. Шымкенттік клуб 23 ұпаймен үздік төрттікке көтерілсе, «Тобыл Ж» соңғы орында қалып
Жамбылдық «Тараз» өз алаңында «Ақтөбе Ж»-мен 1:1 есебімен тең түсті.
Қонақтар төртінші минутта Дәлен Үсіктің голымен алға шыққанымен, матч соңына қарай Еркебұлан Тойбеков таразы басын теңестірді. Осылайша «Тараз» қатарынан алты жеңілістен кейін ұпай еншілесе, екі команда да 17 ұпаймен турнир кестесінің орта тұсында қалды.
14-турдың нәтижелері:
- «Батыр» – «Шахтер» – 0:2
- «Арыс» – «Тұран» – 0:4
- «Тараз» – «Ақтөбе Ж» – 1:1
- «Хан-Тәңірі» – «Елімай Ж» – 0:1
- «Қайрат-Жастар» – «Каспий Ж» – 6:0
- «Тобыл Ж» – «Оңтүстік Академиясы» – 2:3
- «Астана Ж» – «Жайық» – 1:0
Турнирлік кестенің үздік үштігі
- «Қайрат-Жастар» – 38 ұпай
- «Шахтер» – 37 ұпай
- «Тұран» – 28 ұпай