26 жастағы қазақстандық жартылай қорғаушы Андрей Ульшин жуырда елордалық «Жеңіс» клубынан Бірінші лигада өнер көрсететін қарағандылық «Шахтерге» ауысты. Футболшы аз уақыттың ішінде бас бапкер Андрей Карповичтің сеніміне ие болып, негізгі құрамнан тұрақты орын алды. «Тұранмен» жеңісті матчтан кейін Андрей KFF League тілшісінің сауалдарына жауап берді.
– Андрей, жуырда «Шахтер» өз алаңында ҚПЛ-ге жолдама алуға үміткерлердің бірі саналатын «Тұранды» қабылдады. Бұл матчқа қандай баға берер едіңіз?
– Мұндай кездесулер әрдайым ерекше қызығушылық тудырады. Әсіресе Бірінші лигада бірнеше команда Премьер-лигаға шығу үшін таласып жатқан кезде мұндай ойындардың маңызы жоғары болады. Матч өте тартысты өтті: екі команда да шабуылға жиі шығып, алаңда талас пен жекпе-жек көп болды. Ең бастысы – біз жеңіске жеттік. Енді алда тағы да маңызды ойындар күтіп тұр. Қазір біз үшін әрбір матчтың маңызы зор.
– Премьер-лигадан Бірінші лигаға ауысу туралы шешім қабылдауыңызға қандай фактор басты себеп болды?
– Мен үшін ең маңыздысы – клубтың алға қойған мақсаттары болды. «Шахтер» – үлкен тарихы бар, жоғары мақсат қоятын клуб. Мұнда Премьер-лигаға қайта оралуды көздейтін мықты ұжым жасақталған. Сол жобаның бір бөлшегі болып, команданың мақсатына жетуіне өз үлесімді қосқым келді.
– «Тұраннан» бөлек, осы маусымда «Шахтердің» ҚПЛ жолдамасы үшін негізгі қарсыластары қай командалар деп ойлайсыз?
– Шынын айтсам, Бірінші лигада әлсіз команда жоқ. Мұндағы футболдың ерекшелігі – көп жүгірісті, көп күресті және үлкен жанкештілікті талап етеді. Сондықтан ешбір қарсыласты бағаламауға болмайды. Меніңше, жоғары орындарға бірнеше команда таласады және Премьер-лигаға жолдама үшін күрес маусымның соңына дейін жалғасады.
– «Шахтерге» ауысқаннан кейін бас бапкер сіздің алдыңызға қандай міндеттер қойды? Алаңдағы рөліңіз қаншалықты өзгерді?
– Менің басты міндетім – командаға барынша пайда келтіру. Менен белсенді ойын, көшбасшылық қасиет және шабуылда да, қорғаныста да әріптестеріме көмектесу талап етіледі. Бапкерлер штабының маған артқан сенімін сезінемін және сол сенім үшін алғыс айтамын. Әр ойында сол сенімді ақтап, бар күшімді салуға тырысамын.
– «Шахтерге» келгеннен кейін сізді не көбірек таңғалдырды?
– Ең алдымен командадағы атмосфера. Мені өте жылы қарсы алды, сондықтан жаңа ортаға тез бейімделдім. Сонымен қатар бапкерлер штабының кәсібилігі мен клубтағы жұмыстың жоғары деңгейде ұйымдастырылғаны ерекше әсер қалдырды.
– Жанкүйерлер Шахтер» сапындағы алғашқы голыңызды көріп үлгерді. Осы маусымда команданы қолдайтын жанкүйерлерге не айтасыз?
– Барлық жанкүйерлерге қолдаулары үшін шын жүректен алғыс айтқым келеді. Олардың қолдауын әр матчта анық сезінеміз, бұл бізге қосымша күш береді. Стадионға келіп, бізді үйдегі де, түздегі де кездесулерде қолдаңыздар. Біз өз кезегімізде сіздерді жеңістермен қуантып, маусым алдындағы басты мақсатымызды орындау үшін бар күшімізді саламыз.