Қазақстан Екінші лигасының 14-туры тартысқа толы кездесулермен есте қалды. Тур барысында жанкүйерлер нәтижелі матчтардың куәсі болды. Бірқатар командалар өз алаңында маңызды жеңістерге қол жеткізсе, кейбір кездесулер соңғы минуттарда ғана өз жеңімпазын анықтады. Сондай-ақ бұл турда ірі есептер мен нәтижелі тең ойындар да тіркелді.
Оңтүстік-Батыс конференциясы
- «Тұран Ж» – «Хромтау» – 1:1
- «Жас Қыран» – «Атырау Ж» – 3:3
- «Қайсар Ж» – «Хан-Тәңірі Ж» – 5:0
- «Тараз Ж» – «Ордабасы Ж» – 1:0
Оңтүстік-Батыс конференциясында ең нәтижелі ойын Алматыда өтті. «Жас Қыран» мен «Атырау Ж» алты гол соғып, 3:3 есебімен тең тарқасты. Қонақтар кездесудің екінші таймында камбэк жасап, жеңілістен құтылып кетті.
Түркістанда өткен кездесуде «Тұран Ж» мен «Хромтау» жеңімпазды анықтай алмады. Алаң иелері алғашқы таймда есеп ашқанымен, қонақтар екінші таймда таразы басын теңестіріп, әр команда бір ұпайдан еншіледі.
Қызылордада турдың ең ірі жеңісі тіркелді. «Қайсар Ж» өз жанкүйерлері алдында «Хан-Тәңірі Ж» қақпасына жауапсыз бес гол соғып, 5:0 есебімен сенімді жеңіске жетті.
Ал Таразда өткен тартысты матчта алаң иелері «Ордабасы» жастарын минималды есеппен ұтып, кезекті үш ұпайын қоржынға салды. Кездесудің жалғыз голын Айбек Өксікбаев соқты.
Солтүстік-Шығыс конференциясы
- «Жеңіс Ж» – «Шахтер Ж» – 2:1
- VPR Astana – «Аңсат» – 3:0
- «Алтай Өскемен Ж» – «Оқжетпес Ж» – 0:1
- «Ұлытау Ж» – «Жетісу Ж» – 3:0
- «Қызылжар Ж» – «Ертіс Ж» – 1:1
Солтүстік-Шығыс конференциясында Астанадағы кездесу ерекше тартысқа толы болды. «Жеңіс Ж» тур көшбасшыларының бірі «Шахтер Ж»-ны 2:1 есебімен жеңіп, маңызды жеңіске қол жеткізді. Жеңіс голы қосымша уақыттың соңғы минуттарында соғылды.
Тағы бір астаналық ұжым – VPR Astana өз алаңында «Аңсатты» 3:0 есебімен айқын басымдықпен ұтып, турдың сенімді жеңістерінің біріне қол жеткізді.
Өскеменде «Оқжетпес Ж» сырт алаңда минималды есеппен жеңіске жетсе, Жезқазғанда «Ұлытау Ж» «Жетісу» жастарын 3:0 есебімен тізе бүктіріп, өз жанкүйерлерін қуантты. Өркен Нұрали дубль авторы атанып, матчтың басты кейіпкерлерінің біріне айналды.
Петропавлда өткен кездесуде «Қызылжар Ж» жеңілістен соңғы сәтте құтылды. Қосымша уақыттың сегізінші минутында тіркелген автоголдың арқасында алаң иелері «Ертіс Ж»-мен 1:1 есебімен тең ойнады.
14-тур қорытындысы бойынша командалар арасындағы бәсеке одан әрі шиеленісе түсті. Көшбасшылар арасындағы ұпай айырмашылығы қысқарып, турнирлік кестедегі әрбір орын үшін тартыс күшейе түсті. Қазақстан Екінші лигасындағы қызықты бәсеке алдағы турларда да жалғасады.