Шымкенттің «Ордабасы» клубы Қазақстан кубогының жартылай финалындағы алғашқы кездесуде өз алаңында Өскеменнің «Алтайын» 3:1 есебімен тізе бүктірді.
Кездесу Қажымұқан Мұңайтпасов атындағы Орталық стадионда өтті. Матчтың бас төрешісі қызметін Көкшетаудан келген Даниил Гордый атқарды.
Алаң иелері алғашқы таймда-ақ басымдыққа ие болды.
Ойынның 22-минутында норвегиялық шабуылшы Бьорн Йонсеннің нәтижелі пасынан кейін бразилиялық Лео Нател есеп ашты. Ал 38-минутта Йонсеннің өзі мергендік танытып, «Ордабасының» басымдығын еселей түсті.
Екінші таймның 53-минутында Лео Нател бұл жолы ассистент рөлінде көзге түсіп, оның пасын қорғаушы Ги-Марселен Килама голға айналдырды. Қонақтар тек қосымша уақытта ғана жауап қайтара алды. 90+1-минутта Дмитрий Подстрелов есеп айырмасын қысқартқанымен, ойын тағдырына әсер ете алмады.
Осылайша, шымкенттік клуб алғашқы кездесуде 3:1 есебімен жеңіске жетіп, финал жолындағы маңызды басымдыққа ие болды.
Командалар арасындағы қарымта кездесу 19 тамызда Өскеменде өтеді. Екі ойын қорытындысы бойынша жеңіске жеткен команда Қазақстан кубогының финалына жолдама алады.
Айта кетейік, «Ордабасы» ширек финалда талдықорғандық «Жетісуды», ал «Алтай» «Ақтөбені» жарыс жолынан шығарған болатын. Шымкенттік клуб Қазақстан кубогын бұған дейін 2011 және 2022 жылдары жеңіп алған.
Қазақстан кубогы-2026. Жартылай финал. Алғашқы матч
«Ордабасы» – «Алтай» – 3:1 (2:0)
Голдар:
• 22' Лео Нател – 1:0
• 38' Бьорн Йонсен – 2:0
• 53' Ги-Марселен Килама – 3:0
• 90+1' Дмитрий Подстрелов – 3:1.