Қазақстан Премьер-лигасының 17-туры аясында өтетін «Ұлытау» мен «Қайсар» арасындағы матчтың уақыты өзгертілді.
Кездесу бастапқыда 11 шілде күні сағат 18:00-де Жезқазғанда өтуі тиіс еді. Алайда VietJet Qazaqstan әуе компаниясының рейс кестесіне енгізілген өзгерістерге байланысты ойын кейінге шегерілді.
Әуе тасымалдаушысының ресми хабарлауынша, «Қайсар» командасының 10 шілдеге жоспарланған рейсі 11 шілдеге ауыстырылған. Соның салдарынан қызылордалық клуб матч өтетін қалаға уақытында жете алмады.
Осыған байланысты Қазақстан футбол федерациясы мен лига тараптарының келісімімен кездесу 12 шілде күні сағат 18:00-де Жезқазғанда өтетін болды.
16 тур қорытындысы бойынша «Ұлытау» 23 ұпаймен турнир кестесінде 7-орында тұр. Ал «Қайсардың» еншісінде 18 ұпай бар, команда 11-сатыда орналасқан.
Еске салсақ, бірінші айналымда Қызылордада өткен матч 0:0 есебімен тең аяқталған еді.