6-7 шілде күндері футболдан Қазақстан әйелдер лигасының 10-тур ойындары мәресіне жетті. Ел біріншілігі белортасынан асқан уақытта командалар маңызды ұпайлар үшін барын салып, жанкүйерлерге тартысты кездесулер сыйлап жатыр. Дегенмен бұл турда да үздіктер ұпайдан шашау шығарған жоқ. Ал турдың сенсациясын «Оқжетпес» клубы тіркеді. Көкшетау командасы өз алаңында «Астана» командасын қабылдап, чемпионаттағы алғашқы жеңісіне және алғашқы ұпайына қол жеткізді.
А конференциясы
«Қайрат» – «Жетісу» 2:1
Кейінгі екі турда «Атыраумен» тең ойнап, «Тұраннан» жеңілген «Қайрат» 10-турда еңсе тіктеп, жеңіске жетті. Өз алаңында «Жетісу» ұжымын қабылдаған алматылықтар тек соңғы минуттарда ғана жеңісті жұлып алды. Бірінші таймда командалар бір-бір гол соғып, үзіліске тең есеппен атанды. Екінші таймда да командалар алма-кезек шабуылдап, жеңіс үшін барын салды. Алайда екі клуб та қорғаныста өте сауатты ойнағанын айта кеткен жоқ. Дегенмен «Қайрат» соңғы шабуылдарының бірін сәтті жүзеге асырып, матч соңында 2:1 есебімен жеңіске жетті.
«БИІК-Шымкент» – «Қайсар» 5:0
А конференциясындағы ең нәтижелі ойындардың бірі Шымкентте өтті. Жергілікті «БИІК-Шымкент» командасы турнир кестесінде үшінші орында тұрған «Қайсар» командасының қақпасына жауапсыз бес гол соғып, кезекті жеңісіне қол жеткізді. Алаң қожайындары бірінші таймда екі гол, екінші таймда үш гол соқты. Матчта Бибігүл Нұрышева үш гол соғып, хет-трик авторы атанды.
«Ұлытау» – «Ордабасы» 0:4
Жезқазғанға сапар шеккен «Ордабасы» клубы да қарсыластарын ірі есеппен тізе бүктірді. Шымкенттік ұжым матч бойы басымдық танытып, төрт гол соқты. Бір айта кетерлігі, өткен демалыс күндері «Ордабасының» ерлер командасы да өз алаңында «Ұлытаумен» кездесіп, 1:0 есебімен жеңіске жеткен еді.
«Атырау» – «Тұран» 0:1
Турнир кестесінде «БИІК-Шымкент» командасын өкшелеп келе жатқан Түркістанның «Тұран» клубы бұл турды қиындықпен болсын сырт алаңда «Атырауды» жеңді. Кездесудегі жалғыз әрі жеңіс голын 51-минутта Светлана Бортникова соқты. Осылайша «Тұран» ұпай санын 21-ге жеткізіп, БИІК-тен үш ұпайға қалып келеді.
В конференциясы
«Тобыл» – «Жеңіс» 0:4
Астаналық ұжым Қостанайға сәтті сапар жасап, үш ұпайды қоржынына салды. «Жеңіс» клубы шабуылдағы мүмкіндіктерінің бәрін тиімді пайдаланып, қарсылас команданың қақпасына жауапсыз төрт гол соқты. Алаң иелері есеп айырмасын қысқартуға тырысқанымен, «Жеңіс» ойыншылары мүмкіндік бермеді.
«Ертіс-Павлодар» – «Елімай» 1:3
Павлодарда өткен кездесуде де жанкүйерлер төрт голдың куәсі болды. Кездесудің екінші минутында алаң иелері гол соғып, кездесуді сәтті бастаған еді. Алайда семейліктер өткізіп алған голдан кейін тез ес жиып, «Ертіс» қақпасына бір емес, үш гол соқты. Осылайша қонақтар камбэк жасап, чемпионаттағы кезекті жеңісін тіркеді.
«Оқжетпес» – «Астана» 4:1
10-турда Көкшетаудың «Оқжетпес» клубы сенсация жасап, өз алаңында «Астананы» 4:1 есебімен тізе бүктірді. Бұл – «Оқжетпестің» чемпионат барысындағы алғашқы жеңісі және алғашқы үш ұпайы. Бұған дейінгі турларда қарсыласына ұпай үлестіріп жүрген алаң иелері осылайша алғаш рет жанкүйерлерін жеңіспен қуантты.
«Алтай» – «Ақтөбе» 0:7
Турдың ең ірі жеңістерінің бірі Өскеменде тіркелді. Сырт алаңда «Алтаймен» кездескен ақтөбеліктер қарсыласын аяған жоқ. Қонақтар «Алтай» қақпасына жауапсыз жеті гол соқты. Алғашқы таймда «Ақтөбе» төрт гол, екінші таймда үш гол соқты.
«Шахтер» – «Қызылжар» 0:7
Қарағандыға қонаққа барған «Қызылжар» футболшылары да қарсыластар қақпасына жеті гол соғып, сенімді жеңіске жетті. Осылайша «Қызылжар» қатарынан екінші ойында жеңіске жетсе, «Шахтер» төртінші мәрте жеңілістің кермек дәмін татты.