Қазақстан Бірінші лигасының 12-туры жанкүйерлерге тартысты әрі нәтижелі матчтар сыйлады. Тур барысында 40-тан астам гол соғылып, турнир кестесіндегі көшбасшылар өз орындарын сақтап қалса, бірқатар кездесулер соңғы минуттарға дейін шиеленісті өтті.
«Тұран» – «Жайық» – 2:2
Турдағы ең тартысты ойындардың бірі Түркістанда өтті. Қонақтар алғашқы таймда басымдық танытып, жетінші минутта Әлімжан Жорасов есеп ашты. Бірінші таймға қосылған қосымша уақытта Әлихан Исраилов әдемі баспен соғып, «Жайықтың» басымдығын екі есеге арттырды.
Үзілістен кейін ойын толық өзгерді. Бас төреші «Жайық» қақпасына екі мәрте пенальти белгілеп, екі жағдайда да қолмен ойнау тіркелді. Мирас Тұрлыбек екі мүмкіндікті де мүлт жібермей, 58-минутта есепті теңестірді. Қалған уақытта командалар жеңіс голын соға алмады. қорытынды есеп – 2:2.
Осы нәтижеден кейін «Тұран» 25 ұпаймен турнирлік кестеде үшінші орында қалса, «Жайық» 16 ұпаймен тоғызыншы сатыға жайғасты.
«Оңтүстік Академиясы» – «Шахтер» – 1:2
Қарағандылық «Шахтер» сырт алаңда маңызды үш ұпай еншіледі. 14-минутта Артем Литоштың пасынан кейін Максим Галкин есеп ашып, қонақтарды алға шығарған.
Екінші тайм басталған бетте Әлихан Әли айып добынан кейін баспен дәл соғып, таразы басын теңестірді. Кездесу тең аяқталатындай көрінгенімен, 90-минутта Артем Литош өзі белсеніп, командасына маңызды үш ұпай сыйлады.
Бұл жеңістен кейін қарағандылық ұжым 31 ұпай жинап, көшбасшылар қатарындағы күресті жалғастыра түсті.
«Қайрат-Жастар» – «Тараз» – 4:1
Алматылық клуб турдың ең сенімді жеңістерінің біріне қол жеткізді. Ойынның 30-секундында-ақ «Тараз» қорғаушысы Берік Айтбаев өз қақпасына гол соғып, алаң иелерін алға шығарды.
Кейін Азамат Тұяқбаев екі мәрте мергендік танытып, дубль авторы атанды. Екінші таймда Мансұр Бірқұрманов төртінші голды енгізді. Кездесудің соңында Жасұлан Молдақараев пенальтиден бір гол қайтарғанымен, матч тағдыры әлдеқашан шешілген еді.
Осы жеңістің арқасында «Қайрат-Жастар» 32 ұпаймен турнир кестесінің бірінші орнына қайта көтерілді.
«Арыс» – «Елімай Ж» – 3:2
«Арыс» өз алаңында жанкүйерлеріне жеңіс сыйлады. Ерсайын Бегалы, Мұхамед Сәдуақас және Бекзат Мансұров соққан голдардың арқасында алаң иелері алғашқы таймда басымдыққа ие болды.
Қонақтар Санжар Сансызбаев пен Владислав Левковичтің голдарымен ойынның қызығын сақтап қалғанымен, есепті теңестіре алмады. Нәтижесінде «Арыс» маңызды үш ұпай еншіледі.
«Хан-Тәңірі» – «Батыр» – 1:3
Матчтың тағдыры алтыншы минутта шешіле бастады. «Хан-Тәңірі» қорғаушысы Асқар Бижан қарсыластың шабуылшысын қақпашымен бірге-бірге шығып бара жатқан жерден құлатты. Сөйтіп алаңнан қуылды.
Сан басымдығын тиімді пайдаланған «Батыр» Асылжан Бұлғақбаев пен Әліби Мұхиттың голдарының арқасында үзіліске дейін екі доп айырмасымен алға шықты. Ойын соңында Станислав Самойлов пенальтиден есеп айырмасын қысқартқанымен, қосымша уақытта Рамазан Орал үшінші голды соғып, матчқа нүкте қойды.
Бұл жеңістен кейін «Батыр» 17 ұпаймен жетінші орынға көтерілді.
«Астана Ж» – «Каспий Ж» – 6:1
Елордалық жастар командасы турдағы ең ірі жеңістердің бірін тіркеді. Бірінші таймда-ақ алаң иелері алты жауапсыз гол соғып, кездесудің тағдырын шешіп тастады.
15 жастағы Ануар Төленді дубль авторы атанса, Әлихан Жексенбек, Арсен Ахметов, Айтуар Төкен және Нұрәділ Серіков та мергендер қатарына қосылды. Екінші таймда Нұрмұхаммед Ислам қонақтардың жалғыз голын соқты.
«Астана Ж» бұл жеңістен кейін 20 ұпаймен алғашқы бестікке көтерілді.
«Тобыл Ж» – «Ақтөбе Ж» – 5:5
Турдың ең нәтижелі кездесуі Қостанайда өтті. Алаң иелері алғашқы таймда 3:1 есебімен алда болғанымен, үзілістен кейін ойын бірнеше мәрте өзгерді.
Дәулет Мұратов дубль жасап, Дәлен Үсік есепті теңестірді. Кейін Азамат Зинадин «Тобыл» жастарын тағы алға шығарса, Әділбек Бегімов қос голмен «Ақтөбе Ж»-ға басымдық сыйлады. Алайда кездесудің соңында Сұлтан Бақыткериев таразы басын теңестіріп, матч 5:5 есебімен аяқталды.
Бұл тең нәтижеден кейін «Ақтөбе Ж» 13 ұпаймен оныншы орынға көтерілсе, «Тобыл Ж» жеті ұпаймен 12-орында қалды.
Тур қорытындысы
12 тур қорытындысы бойынша «Қайрат-Жастар» 32 ұпаймен турнир кестесінің көшін бастап тұр. Екінші орында 31 ұпайы бар «Шахтер» орналасса, үздік үштікті 25 ұпай жинаған «Тұран» түйіндеп тұр. Чемпиондық жолындағы бәсеке барған сайын қыза түсуде, ал келесі турда көшбасшылар үшін әрбір ұпайдың маңызы бұрынғыдан да арта түспек.