Былтырғы маусымда әйелдер арасындағы «Ақтөбе» футбол клубы ел чемпионатында тарихи жетістікке жетіп, алғаш рет Қазақстан чемпионы атанды. Биыл да команда сенімді ойын өрнегін көрсетіп, өз дивизионында көш бастап келеді. Ал тамыз айында ақтөбелік ұжым әйелдер арасындағы УЕФА Чемпиондар лигасының іріктеу кезеңінде ел намысын қорғайды. Маңызды дода қарсаңында команданың негізгі ойыншысы, Қазақстан ұлттық құрамасының мүшесі Әсем Қаражановамен әңгімелескен едік.
– Әсем, қазіргі таңда «Ақтөбе» өз дивизионында көш бастап тұр. Командадағы көңіл күй қандай?
– Маусым басталмай тұрып алдымызға жоғары мақсат қойылды. Қазір сол мақсатқа біртіндеп жетіп келеміз деп ойлаймын. Командадағы атмосфера өте жақсы. Барлығымыз бір мақсат үшін еңбек етіп жатырмыз. Жеңістер көңіл күйімізді көтеріп, алдағы кездесулерге жігер береді.
– Былтыр алғаш рет ел чемпионы атандыңыздар. Биыл сол жетістікті қайталау қиынырақ па?
– Әрине, былтырғыдан қиынырақ. Себебі чемпион болғаннан кейін барлық команда саған ерекше дайындалады. Оның үстіне, қарсыластардың да деңгейі өсіп келеді. Көп клубтар тәжірибе жинақтады. Сондықтан әр ойынға барынша жауапкершілікпен қараймыз. Әзірге бәрі жоспар бойынша өтіп жатыр.
– Биыл 8 матч өткізіп, төрт нәтижелі пас бердіңіз. Өзіңізді қазір гол соғудан гөрі командаластарыңызға мүмкіндік жасап беретін футболшы ретінде сезінесіз бе?
– Шынын айтсам, мен үшін гол немесе нәтижелі пастың айырмашылығы жоқ. Ең бастысы – команда жеңіске жетсе болғаны. Егер менің пасымнан кейін гол соғылып, команда ұпай алса, соған қуанамын. Әр ойыншының алаңдағы өз міндеті бар.
– Дегенмен жанкүйерлер сізден гол да күтіп жүрген шығар?
– Әрине, әр футболшы гол соққысы келеді. Оның да өз уақыты келеді деп ойлаймын. Бірақ мен үшін ең маңыздысы – команданың нәтижесі.
– Биыл өз ойыныңыздың қай қыры жақсарды деп ойлайсыз?
– Меніңше, ойынды оқу қабілетім мен шешім қабылдау жылдамдығым жақсарды. Сонымен қатар алаңдағы серіктестеріммен өзара түсіністік те жылдан-жылға артып келеді.
– Сіз орталық жартылай қорғаушысыз. Бұл позициядағы ең қиын міндет қандай?
– Бұл орында қорғаныс пен шабуылдың арасындағы байланысты қамтамасыз ету керек. Бір сәтке де босаңсуға болмайды. Допты дұрыс тарату, ойынның қарқынын бақылау, қорғанысқа да, шабуылға да үлгеру қажет. Сондықтан физикалық әрі психологиялық дайындықтың маңызы өте жоғары.
– Командадағы ең көңілді ойыншы кім? Киім ауыстыратын бөлмедегі атмосфера қандай?
– Бізде жалпы көңілді қыздар көп. Бірақ ерекше әзілқой десем, Аида Гайстенованы айтар едім. Киім ауыстыратын бөлмеде әрдайым жақсы көңіл күй қалыптасқан. Бір-бірімізді қолдап, әзілдесіп жүреміз. Осындай атмосфера алаңдағы ойынға да оң әсерін тигізеді.
– Тамыз айында УЕФА Әйелдер Чемпиондар лигасы басталады. Команда дайындықты қалай жүргізіп жатыр?
– Қазір негізгі назарымыз – ел чемпионатындағы алдағы ойындарда. Ал Чемпиондар лигасы жақындаған сайын арнайы дайындыққа кірісеміз. Қарсыластарымызды жан-жақты зерттеп, бапкерлер штабының жоспары бойынша жұмыс істейміз.
– Жеребе нәтижесінде алғашқы қарсыластарыңыз Исландияның «Брейдаблик» клубы болды. Жалпы қарсыластар туралы не айтасыз?
– Чемпиондар лигасында әлсіз команда болмайды. Барлығы өз елінің чемпиондары немесе үздік клубтары. Сондықтан кез келген қарсыласқа үлкен құрметпен қараймыз. Қазір оларды зерттеп жатырмыз. Өз мүмкіндігімізді толық пайдаланып, жақсы нәтиже көрсетуге тырысамыз.
– Турнирдің Ақтөбеде өтетіні белгілі болды. Бұл қаншалықты үлкен артықшылық?
– Бұл – біз үшін үлкен мүмкіндік әрі үлкен жауапкершілік. Өз алаңымызда, өз жанкүйерлеріміздің алдында ойнау әрдайым ерекше сезім сыйлайды. Жанкүйерлердің қолдауы күш береді. Біз олардың сенімін ақтап, лайықты ойын көрсеткіміз келеді.
– Соңғы жылдары Қазақстандағы әйелдер футболының деңгейі өсті деп айта аламыз ба?
– Иә, менің ойымша, деңгей өсіп келеді. Чемпионаттағы бәсекелестік жылдан-жылға күшейіп жатыр. Көптеген жас футболшылар өсіп келеді. Инфрақұрылым да біртіндеп дамып жатыр. Осындай жұмыстар жалғаса берсе, Қазақстан әйелдер футболы халықаралық деңгейде де жақсы нәтижелерге жете алады деп сенемін.
– Әңгімеңізге рақмет! Алдағы ел чемпионатында және УЕФА Әйелдер Чемпиондар лигасында «Ақтөбеге» сәттілік тілейміз!
– Көп рақмет! Бізді қолдайтын барлық жанкүйерге алғыс айтамын. Тамыз айында стадионда кездескенше!