Футболдан Қазақстан Бірінші лигасының 11-тур ойындары аяқталды. Бұл жолы турнир кестесінің жоғарғы бөлігіндегі командалар маңызды жеңістеріне қол жеткізсе, ортаңғы топтағы ұжымдар өзара тартысты кездесулер өткізді.
«Қайрат-Жастар» әлі де көшбасында, «Шахтер» өкшелей қуып келеді, ал «Тұран» үздік үштіктегі орнын нығайтты.
«Елімай Ж» – «Тұран» – 0:3
Голдар: Оралбай, 20 (0:1). Сұлтанов, 27 (0:2). Валиуллин, 85 (0:3).
Түркістандық «Тұран» сырт алаңда «Елімай Ж» командасына еш мүмкіндік қалдырмады. Қонақтар ойын тізгінін алғашқы минуттардан қолға алып, 20-минутта Едіге Оралбай есеп ашты. Арада жеті минут өткенде Карам Сұлтанов есеп айырмасын ұлғайтты. Матчтың соңғы нүктесін 85-минутта Руслан Валиуллин қойды.
Осылайша «Тұран» қатарынан төртінші жеңісіне қол жеткізіп, 24 ұпаймен турнир кестесіндегі үшінші орнын сақтап қалды.
«Қайрат-Жастар» – «Хан-Тәңірі» – 5:0
Голдар: Бекболат, 36 (1:0). Әбіш, 42 (2:0). Ташпулатов, 55 (3:0). Тұяқбаев, 56 (4:0). Нұрғалиев, 91 (5:0).
Турдың ең ірі жеңісіне «Қайрат-Жастар» қол жеткізді. Алматылықтардың дербиінде «Қайраттың» жастар құрамасы «Хан-Тәңіріні» бес жауапсыз голмен ойсырата ұтты.
Бұл жеңіс «Қайрат-Жастардың» чемпиондыққа басты үміткер екенін тағы бір мәрте дәлелдеді. Команда 11 турдан кейін 29 ұпай жинап, бірінші орнын сақтап қалды.
«Жайық» – «Оңтүстік Академиясы» – 0:1
Гол: Әлқайдаров, 83 (0:1).
Оралдағы кездесу өте тартысты өтті. Екі команда да қорғанысқа басымдық бергенімен, қауіпті шабуылдар ұйымдастырып отырды.
Матчтың шешуші сәті 83-минутта туды. Санжар Әлқайдаров дәл соққысымен шымкенттік клубқа жеңіс сыйлады.
Осының арқасында «Академия Оңтүстік» 20 ұпайға жетіп, турнир кестесінде төртінші орынға көтерілді. Ал «Жайық» 15 ұпаймен сегізінші орында қалды.
«Ақтөбе Ж» – «Арыс» – 3:1
Голдар: Сәдуақас, 47 (0:1). Бегімов, 51 (1:1). Кенжеғұлов, 66 (2:1). Кенжеғұлов, 73 (3:1).
Өз алаңында өнер көрсеткен «Ақтөбе Ж» «Арысты» 3:1 есебімен жеңді. Бірінші таймда есепте өзгеріс болмады. Екінші кезең басталысымен қонақтар есеп ашты. Бірақ «Арыстың» қуанышы ұзаққа созылмады. Арада 4 минут өткенде алаң иелері таразы басын теңестірді. Одан кейін Әлішер Кенжеғұлов дубль жасап, «Ақтөбе» жастарын жеңіс сыйлады.
Бұл жеңістен кейін ақтөбеліктердің еншісінде 12 ұпай болды. Ал «Арыс» турнирдің төменгі бөлігінде қалып отыр.
«Каспий Ж» – «Тобыл Ж» – 2:1
Голдар: Ислам, 10 (1:0). Мусаев, 27 (1:1). Жазмағамбетов, 59 (2:1).
Ақтауда өткен кездесуде есепті 10-минутта Нұрмұхаммед Ислам ашты. Дегенмен 27-минутта Эмин Мұсаев таразы басын теңестірді.
Екінші таймда ойын тағдырын Жанер Жазмағамбетов шешіп, жеңіс голын соқты. Нәтижесінде «Каспий Ж» 2:1 есебімен жеңіске жетті.
Бұл нәтижеден кейін ақтаулық команда 12 ұпаймен оныншы орынға көтерілсе, «Тобыл Ж» алты ұпаймен он екінші орында қалды.
«Батыр» – «Астана Ж» – 1:1
Голдар: Сағын, 6 (0:1). Әл-Хадж, 48 (1:1).
Екібастұздағы матчта алғашқы болып елордалықтар есеп ашты. 6-минутта Абзал Сағын мергендік танытып, «Астана» жастарын алға шығарды.
Алайда үзілістен кейін алаң иелері қарымта қайтарды. 48-минутта Назар Әл-Хадж таразы басын теңестіріп, ойынның қорытынды есебін белгіледі – 1:1.
Бұл тең нәтижеден кейін «Батыр» 14 ұпаймен тоғызыншы орында қалса, «Астана Ж» 17 ұпай жинап, бесінші орынға көтерілді.
«Тараз» – «Шахтер» – 0:2
Голдар: Мигунов, 9 (0:1). Литош, 49 (0:2).
Қарағандылық клуб сырт алаңда да сенімді ойын көрсетті. Кездесудің 9-минутында Александр Мигунов есеп ашса, екінші таймның басында Артем Литош жеңіс нүктесін қойды.
2:0 есебімен жеңіске жеткен «Шахтер» 28 ұпай жинап, көш бастап тұрған «Қайрат-Жастардан» небәрі бір ұпайға қалып келеді. Ал «Тараз» 16 ұпаймен жетінші орында қалды.
Турнир кестесінің көшбасшылары (11 турдан кейін)
- «Қайрат-Жастар» – 29 ұпай
- «Шахтер» – 28 ұпай
- «Тұран» – 24 ұпай
- «Оңтүстік Академиясы» – 20 ұпай
- «Астана-Ж» – 17 ұпай
