Футболдан Қазақстан Премьер-лигасының 14-туры жанкүйерлерге мол эмоция сыйлады. Тур барысында 24 гол соғылып, бірнеше тартысты әрі драмалық кездесулер өтті. Көш басындағы командалар ұпайларын түгендеп, чемпиондық жарысты одан әрі қыздыра түсті. Әсіресе, «Ордабасы», «Қайрат» және «Оқжетпестің» жеңістері турнир кестесіндегі бәсекені күшейте түсті. Ал турдың қорытынды кездесуінде «Ақтөбе» өз алаңында «Астананы» сенімді түрде жеңіп, үздік бестікке көтерілді.
«Алтай» – «Жетісу» 3:3
Өскеменде өткен матч нағыз футбол драмасына айналды. Кездесудің 8-минутында Асхат Балтабеков пенальтиден есеп ашып, «Жетісуды» алға шығарды. Арада бес минут өткенде Йован Пайович екінші голды соғып, қонақтардың басымдығын арттырды.
Екінші таймда Драган Стойсавлевич 59-минутта есеп айырмасын қысқартқанымен, 64-минутта Нұрбол Әнуарбеков «Жетісудың» үшінші голын соқты. Көпшілік матч тағдыры шешілді деп ойлаған еді. Алайда 79-минутта Элгуджа Лобжанидзе есепті 2:3-ке жеткізсе, 83-минутта Денис Митрофанов пенальтиден дәл соғып, «Алтайды» жеңілістен құтқарды. Қорытынды есеп – 3:3.
«Жеңіс» – «Ертіс» 0:0
Турдағы ең нәтижесіз ойындардың бірі Астанада өтті. Қос команда шабуылда көп қауіп төндіре алмады. 65-минутта алаң иелерінен Зураб Тевзадзе қызыл қағаз алып, «Жеңіс» он ойыншымен қалды. Соған қарамастан павлодарлықтар басымдықты пайдалана алмады. Матчта есеп ашылған жоқ.
«Қайсар» – «Ұлытау» 0:0
Қызылордадағы кездесуде де гол соғылған жоқ. Командалар көбіне қорғанысқа көңіл бөліп, қауіпті шабуылдар аз болды. Нәтижесінде тараптар бір ұпайдан бөлісті.
«Ордабасы» – «Каспий» 2:0
Тур көшбасшысы өз алаңында сенімді ойын көрсетті. 23-минутта Лео Нательдің сол қапталдан жіберген добы ешкімге тимей қақпаға еніп, есеп ашылды. Ал бірінші таймға қосылған уақытта Эвертон Мораес алыстан берілген пасты тиімді пайдаланып, есепті 2:0-ге жеткізді.
Екінші таймда шымкенттіктер бірнеше мәрте қауіпті шабуыл ұйымдастырғанымен, есеп өзгерген жоқ. Осылайша «Ордабасы» қатарынан бесінші жеңісіне қол жеткізді.
«Оқжетпес» – «Тобыл» 2:1
Кездесу 10-минутта қонақтардың голымен басталды. Александр Зуевтің соққысынан кейін қайтқан допты Марко Вукчевич қақпаға дәл бағыттап, «Тобылды» алға шығарды.
Алайда 38-минутта қостанайлықтар сапынан Пап-Альюн Ндиайе алаңнан қуылып, ойын тағдыры өзгере бастады. Екінші таймда Жансұлтан Мұхаметханов жарқырады. Ол 48-минутта баспен соққан голы арқылы есепті теңестірсе, 63-минутта өкшемен тамаша гол соғып, командасына жеңіс сыйлады – 2:1.
«Қызылжар» – «Қайрат» 2:4
Петропавлдағы матч турдың ең қызықты ойындарының бірі болды. Алматылықтар матчты тамаша бастап, 9-минутта Яакко Оксаненнің, 13-минутта Марк Гуальдың голдарының арқасында 2:0 есебімен алға шықты.
Алайда алаң иелері берілмеді. 22-минутта Стефан Баокен есеп айырмасын қысқартса, 39-минутта Этьен Бугре пенальтиден есепті теңестірді.
Екінші таймда ойын тағдырын шешкен сәт 77-минутта орын алды. Жоржиньо пенальтиді сәтті орындап, «Қайратты» қайта алға шығарды. Бұдан кейін «Қызылжардың» қорғаушысы Олжас Керімжанов қызыл қағаз алып, командасын қиын жағдайда қалдырды. Қосымша уақыттың 2-минутында Луиш Мата төртінші голды соғып, матчқа нүкте қойды – 4:2.
«Елімай» – «Атырау» 1:2
Семейде өткен кездесуде қонақтар жылдам гол соқты. 18-минутта Энрике Девенс мергендігімен көзге түсті. Бірақ төрт минуттан кейін Роман Мұртазаев пенальтиден есепті теңестірді.
Матчтың шешуші сәті 40-минутта болды. Егор Ткаченко дәл соққы жасап, «Атырауды» қайтадан алға шығарды. Екінші таймда есеп өзгермей, мұнайшылар маңызды үш ұпайға қол жеткізді.
«Ақтөбе» – «Астана» 2:0
Турдың қорытынды ойыны Ақтөбеде өтті. Кездесудің 22-минутында әлемдік футбол жұлдызы Луиш Нани ақтөбеліктер сапындағы алғашқы голын соқты. Португалиялық шабуылшы қарсылас қақпашысын қапы қалдырып, жанкүйерлерді қуантты.
Голдан кейін «Астана» шабуылға көбірек көңіл бөлді. Елордалық клуб допты бақылауда ұстағанымен, шабуылдарын нақты голға айналдыра алмады. Қонақтардың соққыларының басым бөлігі дәл шықпады.
55-минутта ақтөбеліктер қарымта шабуыл ұйымдастырып, Агустин Пасторица есепті 2:0-ге жеткізді. Осыдан кейін алаң иелері ойын тізгінін толық бақылап, маңызды жеңіске қол жеткізді.
Тур қорытындысы
14-турдан кейін «Ордабасы» 34 ұпаймен көш басында қалды. Одан кейін 33 ұпаймен «Қайрат» келеді. Үшінші орынға 27 ұпаймен «Оқжетпес» жайғасты. «Ақтөбе» маңызды жеңістен кейін 22 ұпай жинап, үздік бестікке көтерілсе, «Астана» да дәл сондай ұпаймен алтыншы орынға сырғыды.
Ал турнир кестесінің төменгі жағында «Каспий», «Алтай» және «Ертіс» клубтары қалып отыр. Алдағы 27-28 маусым күндері өтетін келесі тур матчтары чемпиондық пен еурокубок жолдамалары үшін күресте шешуші мәнге ие болуы мүмкін.