Қазақстан Бірінші лигасында 10-тур ойындары мәресіне жетті. Тур қорытындысы бойынша -турнир кестесіндегі көшбасшылар өз орындарын сақтап қалды.
Алматының «Қайрат-Жастар» командасы сырт алаңда «Астана-Жастарды» 3:2 есебімен жеңіп, 26 ұпаймен турнир кестесінің бірінші сатысында қалды.
Кездесу басталысымен алаң иелері қиын жағдайға тап болды. Матчтың небәрі 10-секундында қорғаушы Айтуар Төкен соңғы үміт ережесін бұзып, тікелей қызыл қағаз алды.
Саны аз болса да, астаналықтар алғашқы болып есеп ашты. 12-минутта Тимур Төкенов қонақтар қақпашысының қателігін пайдаланып, командасын алға шығарды. Алайда алматылықтар екі минуттан кейін Рамазан Бағдаттың голымен таразы басын теңестірді. Ал 30-минутта Ермұхаммед Керімхан «Қайрат-Жастарды» алға шығарды.
Екінші таймда «Астана Ж» берілмей, 68-минутта Рахымжан Амангелдиевтің пенальтиден соққан голының арқасында есепті теңестірді. Бірақ соңғы сөзді қонақтар айтты. 76-минутта Евгений Петрик жеңіс голын соғып, алматылықтарға маңызды үш ұпай сыйлады – 3:2.
Осы жеңістен кейін «Қайрат-Жастар» 26 ұпаймен турнир кестесіндегі көшбасшылық орнын сақтап қалды.
Қарағандының «Шахтері» өз алаңында оралдық «Жайықты» қабылдап, сенімді ойын көрсетті. Алғашқы таймда Александр Мигунов есеп ашса, 36-минутта Андрей Ульшин есеп айырмасын екі допқа жеткізді. Матчтың соңғы нүктесін 84-минутта Артем Литош қойып, қарағандылықтардың 3:0 есебімен жеңіске жетуіне үлес қосты.
Бұл жеңістен кейін «кеншілер» 25 ұпай жинап, көшбасшыдан небәрі бір ұпайға қалып келеді.
Премьер-лигаға қайта оралуды мақсат еткен түркістандық «Тұран» бұл турда «Ақтөбе Ж» командасын қабылдап, жанкүйерлерін қуантты. Алаң иелері алғашқы минуттардан басымдық танытып, қарсылас қақпасына жауапсыз төрт гол соқты.
Гол авторларының қатарында Мирас Тұрлыбек (11), Карам Сұлтанов (24), Темірлан Мырзағалиев (77), Саят Бақтыбай (84) бар. Осы жеңістен кейін «Тұран» 21 ұпаймен үшінші орындағы позициясын сақтап қалды. Бұл – түркістандық клубтың қатарынан үшінші жеңісі.
Алматыда өткен кездесуде «Хан Тәңірі» мен «Тараз» жолықты. Алғаш болып есепті жамбылдықтар ашты. 16-минутта Бауыржан Байтана пенальтиді сәтті орындады.
Алайда үзілістен кейін ойын барысы өзгерді. 50-минутта тараздық қорғаушы өз қақпасына гол соғып алды. Ал 70-минутта Бахтишат Абдуллаевтың соққысы рикошет арқылы қақпаға еніп, алматылықтарға жеңіс сыйлады.
Нәтижесінде «Хан Тәңірі» 17 ұпаймен бесінші орынға көтерілсе, «Тараз» алтыншы сатыға сырғыды.
Түркістан облысында өткен матчта «Арыс» пен «Каспий Ж» кездесті. Екінші таймда қос команда да автогол авторы атанды. Алдымен ақтаулықтар өз қақпасына гол соғып алса, көп ұзамай алаң иелері де дәл сондай қателік жіберді.
Матч тағдыры 89-минутта шешілді. Ерлік Жұмабай пенальтиді дәл орындап, «Каспий» жастарына жеңіс сыйлады.
« Оңтүстік Академиясы» өз алаңында соңғы орында тұрған «Елімай» жастарымен ұпай бөлісті. Матчтың 15-минутында Алихан Әли есеп ашқанымен, араға сегіз минут салып Владислав Левкович пенальтиден таразы басын теңестірді.
Кездесу 1:1 есебімен аяқталды. Шымкенттік клуб 17 ұпаймен төртінші орынға көтерілді.
Қостанайда өткен «Тобыл Ж» – «Батыр» кездесуі турдағы ең нәтижелі ойын болды. Матч 3:3 есебімен аяқталды.
Алаң иелерінен Эмин Мусаев дубль авторы атанса, Алибек Жайлаубаев тағы бір гол қосты. Ал қонақтар сапында Алиби Мұхит хет-трик жасап, командасын жеңілістен құтқарды.
10-турдың нәтижелері:
- «Тобыл Ж» – «Батыр» – 3:3
- «Астана Ж» – «Қайрат-Жастар» – 2:3
- «Оңтүстік Академиясы» – «Елімай Ж» – 1:1
- «Арыс» – «Каспий Ж» – 1:2
- «Тұран» – «Ақтөбе Ж» – 4:0
- «Шахтер» – «Жайық» – 3:0
- «Хан Тәңірі» – «Тараз» – 2:1
Турнир кестесінің үздік бестігі:
- «Қайрат-Жастар» – 26 ұпай
- «Шахтер» – 25 ұпай
- «Тұран» – 21 ұпай
- «Академия Оңтүстік» – 17 ұпай
- «Хан Тәңірі» – 17 ұпай.