УЕФА Әйелдер Чемпиондар лигасының жаңа маусымына арналған жеребе тарту рәсімі өтіп, Қазақстан чемпионы «Ақтөбе» әйелдер футбол клубының қарсыластары анықталды.
Жеребе қорытындысы бойынша ақтөбелік команда шағын турнирдің 3-тобында бақ сынайды. Қазақстан чемпиондарының қарсыластары – Беларусьтің «Динамо Минск», Исландияның «Брейдаблик» және Швейцарияның «Серветт» клубтары.
Турнирдің ерекшелігі – барлық ойындардың Ақтөбе қаласында өтуі. Осылайша, жергілікті жанкүйерлер өз командасына халықаралық додада тікелей қолдау көрсету мүмкіндігіне ие болады.
Жартылай финалдық кездесулер 5 тамыз күні өтеді. «Ақтөбе» алғашқы матчында Исландияның «Брейдаблик» командасымен кездеседі. Егер қазақстандық клуб жеңіске жетсе, финалда «Динамо Минск» пен «Серветт» жұбының жеңімпазымен жолығады. Финалдық кездесу мен үшінші орын үшін матчтар 8 тамызға жоспарланған.
Шағын турнирдің жеңімпазы Әйелдер Чемпиондар лигасының үшінші іріктеу кезеңіне жолдама алады. Ал екінші орын иегері әйелдер арасындағы Еуропа кубогының екінші іріктеу кезеңінде өнер көрсетсе, үшінші орын алған команда аталған турнирдің алғашқы іріктеу кезеңіне түседі.
Биыл әйелдер арасындағы Чемпиондар лигасының алғашқы іріктеу кезеңіне 19 команда қатысады. Бұл ойындар 22 және 25 шілде күндері өтеді. Ал екінші іріктеу кезеңінде бес жеңімпазға қосымша 39 клуб қосылып, матчтар 5 және 8 тамызға белгіленген.
Осылайша, «Ақтөбе» әйелдер командасы Еуропадағы ең беделді клубтық турнирдегі жорығын өз алаңында бастайды. Қазақстан чемпиондары тәжірибелі қарсыластармен кездесіп, келесі кезеңге жолдама алу үшін таласқа түседі.