Алматының «Қайрат» клубы Қазақстан Премьер-лигасының 17-туры аясында өткен «Қызылжармен» матчта команда түлегі Дастан Сәтпаевты салтанатты түрде шығарып салды.
Кездесу алдында «Қайрат» клубының бақылау кеңесінің төрағасы Қайрат Боранбаев жас футболшыға оның клуб сапындағы ойындарының саны бейнеленген №58 естелік жейдесін табыстады. Сондай-ақ стадионда ойыншының есімі жазылған арнайы баннер көрсетіліп, жанкүйерлер қошемет көрсетті.
17 жастағы шабуылшы үшін бұл «Қайрат» сапындағы соңғы матч болды. Бұған дейін алматылық клуб пен Англияның «Челси» командасы футболшының трансфері бойынша келісімге келген еді. Келісімшарт ойыншы 18 жасқа толғаннан кейін күшіне енеді.
«Қызылжармен» ойында Сәтпаев өз қоштасу кешін жарқын өткізді. Матчтың 59 және 87-минуттарында гол соғып, дубль авторы атанды. Ал 85-минутта Исмаил Бекболат мергендігімен көзге түсіп, кездесудің қорытынды есебін 3:0-ге жеткізді.
Осылайша, «Қайрат» турнир кестесіндегі жағдайын жақсартып, 30 ұпаймен екінші орнын сақтап қалды. Ал петропавлдық «Қызылжар» 15 ұпаймен оныншы сатыда қалды.
Дастан Сәтпаев «Қайраттың» негізгі құрамында барлығы 58 матч өткізіп, 24 гол соғып, 10 нәтижелі пас берген.
«Дастан Сәтпаев – соңғы жылдары клуб академиясынан шыққан ең талантты футболшылардың бірі. Ол «Қайраттың» негізгі құрамында өзін дәлелдеп, жанкүйерлердің құрметіне ие болды. Біз оның Еуропадағы жаңа кезеңінде табысқа жететініне сенеміз. Дастанға клубқа қосқан үлесі үшін алғыс айтып, алдағы мансабына сәттілік тілейміз», – деді «Қайрат» клубының бақылау кеңесінің төрағасы Қайрат Боранбаев.
