Футболдан әйелдер арасындағы Қазақстан чемпионатының VIII турындағы кездесулер жанкүйерлерге көптеген әдемі гол мен жарқын нәтижелер сыйлады.
В конференциясында көш бастап келе жатқан «Ақтөбе» Петропавлда жергілікті «Қызылжарды» 4:0 есебімен жеңді. Қонақтар сапынан Алина Литвиненко хет-трик жасады. Ол ойынның 40, 53 және 58-минуттарында мергендік танытты. Матчтың нүктесін 79-минутта Анастасия Власова қойды.
Осылайша ақтөбелік клуб сегіз турдан кейін де бірде-бір ұпай жоғалтпай, 24 ұпаймен жеке-дара көш бастап келеді. Команданың шабуылдағы нәтижелілігі мен қорғаныстағы сенімді ойыны чемпиондыққа басты үміткер екенін тағы бір мәрте көрсетті.
Турдың ең ірі жеңістерінің бірі Қарағандыда тіркелді. Астаналық «Жеңіс» сырт алаңда «Шахтерді» 10:1 есебімен басым түсті.
Кездесудің басты қаһарманы Айзере Мұратжан болды. Ол 21, 28 және 41-минуттарда гол соғып, хет-трик авторы атанды. Сонымен қатар Лейла Садықова, Элина Ирисметова, Әдия Асқарова, Томирис Алпыс, Мадина Аманжолова, Айгерім Көккөзова және Камила Күлмагамбетова да мергендер қатарынан көрінді. «Шахтердің» жалғыз голын 69-минутта Александра Набокова соқты.
Ал А конференциясында шымкенттік БИІК Жезқазғанда «Ұлытауды» 12:0 есебімен жеңді. Бұл турдағы ең ірі есеп болды. Бибігүл Нұрышева покер жасап (2, 5, 20 және 47-минуттар), матчтың басты жұлдызына айналды. Гүлнара Габелия да төрт мәрте қарсылас қақпасын дәл көздеп, команданың ірі жеңісіне зор үлес қосты.
БИІК сегіз турда 60-тан астам гол соғып, лиганың ең нәтижелі командаларының бірі екенін дәлелдеп келеді.
Қостанайлық «Тобыл» өз алаңында «Оқжетпесті» 4:2 есебімен жеңіп, жоғарғы орындар үшін күресте маңызды үш ұпайға қол жеткізді.
Өскеменде өткен кездесуде семейлік «Елімай» сырт алаңда «Алтайдан» 4:1 басым түсті. Ал Павлодарда «Астана» жергілікті «Ертісті» 2:1 есебімен тізе бүктірді.
Турдағы ең тартысты матчтардың бірі Атырауда өтті. Жергілікті команда мен алматылық «Қайрат» 1:1 есебімен тең тарқасты. Ал Қызылордада «Қайсар» «Жетісуды» 3:1 есебімен ұтып, турнирлік жағдайын жақсарта түсті.
Айта кетейік, VIII турдағы «Томирис-Тұран» (Түркістан) – «Каспий» (Ақтау) кездесуі 29 маусымға ауыстырылған.
Биыл Қазақстан әйелдер чемпионаты жаңа форматта өтуде. Турнирге 19 команда қатысып, олар А және В конференцияларына бөлінген.