Алматының «Қайрат» футбол клубы UEFA Чемпиондар лигасының 2026/27 жылғы маусымының бірінші іріктеу кезеңінде Черногория чемпионы - «Сутьеска» клубымен кездеседі.
Жеребе қорытындысы бойынша алғашқы матч 7-8 шілде күндері Алматыда өтсе, қарымта кездесу 14-15 шілдеде Черногорияда ұйымдастырылады.
«Сутьеска» былтырғы маусымда Черногория чемпионатында 36 матчта 72 ұпай жинап, ең жақын қарсыласынан үш ұпайға озып, ел чемпионы атанды. Бұл клуб тарихындағы бесінші чемпиондық атақ болды.
Айта кетейік, «Сутьеска» бұған дейін еурокубоктарда қазақстандық «Астана» клубына қарсы ойнаған. Ал «Қайрат» өткен маусымда өз тарихында алғаш рет Чемпиондар лигасының негізгі кезеңінде өнер көрсеткен еді.
