Шымкенттік «Ордабасының» жартылай қорғаушысы Жасұлан Әмір биылғы маусымда мансабындағы ең жарқын кезеңдердің бірін өткізіп жатыр. 13 матчта 6 гол соғып, 3 нәтижелі пас берген футболшы алғаш рет Қазақстан ұлттық құрамасынан шақырту алып, Арменияға қарсы кездесуде де өзін көрсете білді. Біз жас ойыншымен маусым барысы, ұлттық құрама және жеке өмірі туралы әңгімелестік.
– Жасұлан, ұлттық құраманың ойындарынан кейін көңіл-күй қалай?
– Көңіл-күй жақсы. Армениямен матчта негізгі құрамда алаңға шығамын деп ойламадым. Бірақ ойын алдындағы жаттығуда бас бапкер мені алғашқы он бір ойыншының қатарына қосып, түрлі нұсқаларды қарастырды. Сол кезде негізгі құрамда шығуым мүмкін екенін түсіндім.
– Армениямен матчта негізгі құрамда ойнаймын деп күттіңіз бе?
– Жоқ, шынын айтсам, ондай ой болған жоқ. Бірақ бапкерлер штабының сенімін сезіндім. Сондықтан мүмкіндік берілсе, барымды салуға дайын болдым.
– Максим Самородовқа берген нәтижелі пасыңызды жанкүйерлер жоғары бағалап жатыр. Пікірлерді оқыдыңыз ба?
– Иә, көрдім. Бірақ ол эпизодты қатты мақтайтындай жағдай деп ойламаймын. Ол жерде Максимнің жеке шеберлігі өте жоғары деңгейде көрінді. Голдың негізгі еңбегі соған тиесілі деп есептеймін.
– Биылғы маусымды осындай нәтижелі бастаймын деп күттіңіз бе?
– Оқу-жаттығу жиындарында жақсы дайындалдым. Жолдастық кездесулерде де өзімді жақсы қырымнан көрсетуге тырыстым. Соның нәтижесінде мүмкіндік алдым. Қазір сол сенімді ақтап жүргеніме қуаныштымын.
– Алғашқы турлардағы қай матч ерекше есте қалды?
– Бірінші турдағы Павлодардың «Ертісіне» қарсы ойын ерекше есте қалды. Шымкентте өткен кездесуде қосалқы құрамнан шығып, шамамен 20 минут ойнадым. Сол ойында бапкерлерге өзімді жақсы жағынан көрсете алдым деп ойлаймын.
– «Жеңіске» қарсы матчта алаңға шығып, бірден гол соқтыңыз. Барлығы сол жерден басталғандай көрінеді...
– Иә, солай деуге болады. Келесі ойында «Жеңістің» қақпасына гол соғып, команданың жеңісіне үлес қостым. Сол матч өзіме деген сенімді арттырып, әрі қарайғы нәтижелі ойындарға жол ашты.
– Бас бапкер биыл сізге ерекше сенім артып отыр. Мұның сыры неде деп ойлайсыз?
– Бас бапкер командаға алғаш келген күннен бастап маған сенім білдірді. Біз 2025 жылдан бері бірге жұмыс істеп келеміз. Биыл сол сенім бұрынғыдан да арта түсті. Енді маған жүктелген жауапкершілікті сезініп, оның сенімін ақтауға тырысып жүрмін.
– Алдағы жоспар қандай? «Ордабасының» чемпион атану мүмкіндігін қалай бағалайсыз?
– Чемпион болуға мүмкіндігіміз өте жоғары деп ойлаймын. Бірінші айналым аяқталуға жақын. Егер екінші айналымда да осы қарқынды сақтап, тұрақты ойын көрсете алсақ, чемпиондыққа таласамыз деп сенемін.
– Туған жеріңіз бен отбасыңыз туралы айтып өтсеңіз.
– Мен Шымкент қаласында туып-өстім. Отбасымызда төрт адамбыз: әкем, анам, қарындасым және мен.
– Футболға қалай келдіңіз?
– Футболды алты-жеті жасымда бастадым. Сол кезде «Ордабасы» академиясына қабылданып, содан бері осы клуб жүйесінде тәрбиеленіп келемін.
– Алғашқы бапкеріңіз кім болды?
– Алғашқы бапкерім – Мәлік Баймұхамедов. Өкінішке қарай, ол кісі бүгінде арамызда жоқ. Өте білікті маман еді. Бізге футболдың әліппесін үйретіп, алғашқы қадамдарымызды жасауға үлкен үлес қосты.