80 жасқа қараған шағында белгілі футбол маманы, «Қайрат», «Екібастұз», «Тараз», «Мегаспорт», «Локомотив» және «Сұңқар» клубтарының бұрынғы бапкері Владимир Гулямхайдаров дүниеден өтті.
Владимир Алишоевич футболшы мансабында Душанбе қаласының «Энергетик», мәскеулік «Торпедо», сондай-ақ тәжікстандық «Памир» және «Вахш» клубтарының намысын қорғады. Сонымен қатар КСРО жастар және ұлттық құрамаларында өнер көрсетті.
Бапкерлік жолын туған жері Тәжікстанда бастаған маман кейін «Памир» мен «Вахшты», одан соң Тәжікстан ұлттық құрамасын жаттықтырды. 1996 жылдан бастап Қазақстан футболында еңбек етіп, алдымен Екібастұздың «Батыр» командасын басқарды. Кейін «Қайрат», «Тараз», «Мегаспорт», астаналық «Локомотив» клубтарында қызмет атқарып, каскелендік «Сұңқарда» кеңесші болды.
Владимир Гулямхайдаров қазақстандық футболдың дамуына елеулі үлес қосты. Ол 1999 және 2001 жылдары Қазақстан Кубогын жеңіп алса, 2004 жылы алматылық «Қайраттың» бапкерлер штабында жұмыс істеп, Қазақстан Премьер-лигасының чемпионы атанды.
Қазақстан футбол федерациясы марқұмның туған-туыстары мен жақындарына қайғырып көңіл айтады. Владимир Гулямхайдаровтың есімі мен футболға қосқан еңбегі жанкүйерлер жадында мәңгі сақталады.