Футболдан Қазақстан екінші лигасының 9-туры жанкүйерлерге тартысты кездесулер мен топырлаған гол сыйлады. Тур барысында екі конференцияда да күтпеген нәтижелер тіркеліп, кейбір командалар шабуылдағы қуатын толық көрсетті. Әсіресе, «Қызылжар Ж» мен «Таластың» нәтижелері назар аудартты.
Солтүстік-Шығыс конференциясы
Турдың ең сенімді жеңістерінің біріне «Жеңіс Ж» қол жеткізді. Астаналық ұжым өз алаңында «Алтай» жастарын 4:0 есебімен ойсырата ұтып, көшбасшылар қатарындағы орнын нығайтты. Николай Горобченко жылдам есеп ашса, кейін Сырым Ерболат, Расиль Исаев және Махди Гойгов мергендігімен көзге түсті.
Павлодарда өткен матчта «Ертіс Ж» «Оқжетпес» жастары 2:1 есебімен жеңді. Ансар Сапарғазинов пен Ерназар Дүйсековтің голдары алаң иелеріне маңызды үш ұпай сыйлады. Қонақтар сапынан Темірлан Қалымжанов ойын соңында бір доп қайтарғанымен, нәтиже өзгерген жоқ.
Турдың ең ірі есебі Петропавлда тіркелді. «Қызылжар Ж» қарсылас қақпасына жауапсыз жеті гол соғып, «Ұлытау Ж» командасын 7:0 есебімен тас-талқан етті. Тимур Курбанов пен Глеб Логиновский дубль авторы атанса, Александр Лебедев, Сакен Ибадулла және Сулеман Жетпіспай да мергендер қатарынан көрінді.
Ал Талдықорғанда жанкүйерлер нағыз гол шоуының куәсі болды. «ЖетісуЖ» мен «VPR Astana» арасындағы кездесуде жеті гол соғылып, елордалық команда 4:3 есебімен жеңіске жетті. Бауыржан Тұрысбек дубль жасап, матч қаһармандарының біріне айналды.
Қарағандыда өткен кездесуде «Ансат» сырт алаңда «Шахтер» жастарын 2:0 есебімен ұтты. Голдардың екеуі де матчтың соңғы минуттарында соғылды. Амир Федунец есеп ашса, Илья Кругляков жеңісті түйіндеді.
Оңтүстік-Батыс конференциясы
Таразда жергілікті «Тараз Ж» мен «Тұран Ж» жеңімпазды анықтай алмады – 1:1. Қонақтар бірінші болып есеп ашқанымен, үзілістен кейін Ерторе Жаныбекұлы тараздықтарды жеңілістен құтқарып қалды.
«Хромтау» өз алаңында «Қайсар» жастарынан 0:1 есебімен ұтылды. Матчтағы жалғыз голды кездесудің 9-минутында Сержан Батырбек соғып, қызылордалықтарға үш ұпай сыйлады.
Шымкентте өткен «Ордабасы Ж» мен «Атырау Ж» арасындағы ойын өте тартысты өтті. Алаң иелері алғашқы таймда екі доп айырмасымен алға шыққанымен, атыраулықтар камбэк жасап, кездесуді 2:2 есебімен аяқтады.
Турдың тағы бір сенімді жеңісін «Жас Қыран» тіркеді. Команда «Қаршығаны» 3:0 есебімен жеңіп, турнирлік жағдайын жақсарта түсті.
Ал Қаратауда өткен «Талас» – «Хан-Тәңірі Ж» матчы нағыз шабуыл фестиваліне айналды. Кездесуде жалпы саны 10 гол соғылып, алаң иелері 6:4 есебімен басым түсті. «Талас» матч барысында ірі басымдыққа ие болғанымен, қонақтар соңына дейін күресіп, интриганы сақтап тұрды.
Матч нәтижелері:
Солтүстік-шығыс конференциясы
«Шахтер Ж» – «Аңсат» – 0:2
«Жетісу Ж» – «VPR Astana» – 3:4
«Жеңіс Ж» – «Алтай Ж» – 4:0
«Ертіс Ж» – «Окжетпес Ж» – 2:1
«Кызылжар Ж» – «Улытау Ж» – 7:0
Оңтүстік-батыс конференциясы
«Тараз Ж» – «Тұран Ж» – 1:1
«Хромтау» – «Кайсар Ж» – 0:1
«Ордабасы Ж» – «Атырау Ж» – 2:2
«Қаршыға» – «Жас Қыран» – 0:3
«Талас» – «Хан-Тәңірі Ж» – 6:4