5-6 сәуір күндері Қазақстан Премьер-лигасының төртінші тур ойындары өтеді. Бұл турдың орталық кездесуі «Астана» мен «Ордабасы» клубтары арасында болмақ.
5 сәуір
«Оқжетпес» – «Тобыл» – 15:00
Өтетін орны: «Оқжетпес» стадионы (Көкшетау)
Екі команда да өткен турда тең ойнады. «Оқжетпес» сырт алаңда «Қайсардан» екі гол айырмасын қысқартып (2:2), ұпай еншілесе, «Тобыл» «Елімайға» қарсы ойында қосымша уақытта гол өткізіп, қолда тұрған жеңісті уысынан шығарып алды.
Көкшетаудағы матч «Тобылға» оңай соқпасы анық. Тіпті қостанайлықтар жеке кездесулердегі статистикада айқын басымдыққа ие болса да. «Тобыл» кейінгі тоғыз матчтың бәрінде «Оқжетпесті» жеңген. Көкшетаулық ұжым «Тобылдан» ең кейінгі рет 2017 жылы ұпай алған. Осы жолы Андрей Ферапонтов шәкірттері сәтсіз сериясына нүкте қоя ала ма?
«Жетісу» – «Жеңіс» – 16:00
Өтетін орны: «Хан-Тәңірі» стадионы (Алматы)
Бұл маусымда екі команда да әлі жеңіске жеткен жоқ. «Жетісуға» қарағанда елорданың «Жеңісі» әлі жеңілістің кермек дәмін татпаған. «Жеңіс» бұл турда да жеңіліссіз жолын жалғастыруға тырысады. Өйткені талдықорғандықтар өз алаңындағы ойынын Алматыда өткізуге мәжбүр. Былтырғы маусымда елордалықтар «Жетісудан» мүмкін болған 6 ұпайдың төртеуін алған. Бір ойында 2:2 есебімен тең түссе, екінші матчта 1:0 есебімен жеңіске жеткен.
«Қызылжар» – «Тұран» – 17:00
Өтетін орны: «Тобыл Арена» (Қостанай)
«Қызылжардың» «Тұранға» қарсы ойыны осы маусымда өз алаңында өткізетін алғашқы матч болады деп жоспарланған еді. Алайда «Қарасай» стадионы бұл ойынға дайын болмай шықты. Сондықтан «Қызылжар» өз алаңындағы матчты Қостанайда өткізеді. Екі команда да турнир кестесінде бір-біріне жақын орналасқан. Дегенмен, «Тұран» футболшылары «Қызылжардан» бір ұпай артық жинап, бір саты жоғары тұр. Қызығы, екі клубты да Беларусь маманы жаттықтырады. Бұл ойында қай Беларусь бапкері жеңіске жетеді екен?
«Астана» – «Ордабасы» – 17:00
Өтетін орны: «Астана Арена» (Астана)
«Астана» мен «Ордабасы» арасындағы матч сөзсіз осы турдың орталық ойыны. Маусым алдында екі команда да чемпиондыққа үміткерлер қатарында аталды. Алғашқы үш турдан кейін «Астана» бұл мәртебеге сай өнер көрсетіп, 7 ұпай жинаса, «Ордабасы» маусымды сәтсіз бастады. Үш ойыннан кейін екі-ақ ұпай жинап, қарсыластарының қақпасына бірде-бір гол соға алмады. Оның үстіне, команда қазір турнир кестесінде соңғы орында тұр.
Бұл матчтан кейін шымкенттік ұжым турнир кестесіндегі жағдайын жақсарта қоюуы екі талай. Өйткені Григорий Бабаян шәкірттерінің қарқыны қатты. Ал команданың көшбасшысы Марин Томасов соңғы турда хет-трик жасап, нағыз бабында екенін дәлелдеді.
6 сәуір
«Атырау» – «Қайрат» – 15:00
Өтетін орны: «Мұнайшы» стадионы (Атырау)
«Атырау» мен «Қайрат» бұл турда 16-турға жоспарланған ойынын өткізеді, ал 4-турдағы өзара кездесуі 16 сәуірге шегерілді.
Былтырғы ел чемпионы және қазіргі чемпионаттың көшбасшысы «Қайрат» соңғы екі турда қарсыластарынан 1:6 есебімен жеңілген «Атырауға» қонаққа барады. Қағаз жүзінде «Қайрат» фаворит саналғанымен, «мұнайшылар» алматылықтармен бәсекелесуге дайын. Бұл ойын «Атыраудың» бас бапкері Константин Горовенко үшін де ерекше кездесу болмақ, өйткені ол ұзақ жылдар бойы «Қайрат» сапында ойнап, кейін жаттықтырушы қызметін атқарған.
Алматылық команда өткен жылы чемпиондық атақты дәл осы Атырауда тойлағанымен, соңғы төрт кездесудің тек біреуінде ғана жеңіске жеткен.
«Ақтөбе» – «Қайсар» – 16:00
Өтетін орны: ОБЖМОРСМ стадионы (Ақтөбе)
«Ақтөбе» футболшылары қазір жақсы көңіл-күйде. Өткен турда олар «Атырауды» 4:0 есебімен тас-талқанын шығарып, турнир кестесінде үздік үштікке орныққан болатын. Ал «Қайсар» өз алаңында «Оқжетпеске» қарсы ойында екі гол басымдығын сақтай алмай, үш ұпайнан айырылып қалған еді.
Жалпы «Қайсардың» Ақтөбеде ұпай алуы қиынға соғатын анық. Себебі «қызыл-ақтар» өз жанкүйерлерінің ыстық қолдауы арқасында жақсы ойын өрнегін көрсетеді. Десе де, қызылордалықтар былтыр Ақтөбеден ұпай еншілеп қайтқан. «Дала қасқырлары» биыл да фавориттің жоспарын бұза ала ма екен?
«Елімай» – «Ұлытау» – 17:00
Өтетін орны: «Астана Арена» (Астана)
Турдың соңғы ойынында «Елімай» Астанада Премьер-лиганың дебютанты «Ұлытауды» қабылдайды. Өткен турда екі команда да 1:1 есебімен тең ойнаған. Жезқазғандықтар өз алаңында Премьер-лигадағы алғашқы голын соққанымен, «Жеңісті» жеңе алмады. Ал Абай облысының командасы соңғы минуттарда «Тобылдан» ұпай тартып алды. Андрей Карповичтің шәкірттері қарсыластарына қарағанда тәжірибелі болғанымен, дебютант «Ұлытау» тең дәрежелі қарсыластардан ұпай ала алатынын өткен турда көрсетті.