10 маусымнан бастап Қазақстанда кәсіби футбол клубтары үшін екінші тіркеу-трансферлік кезең ресми түрде басталды.
Жазғы трансферлік терезе 16 шілдеге дейін жалғасады. Осы уақыт аралығында Қазақстан Премьер-Лигасы, Бірінші және Екінші лига клубтары Қазақстан футбол федерациясы (ҚФФ) мен ФИФА регламенттеріне сәйкес жаңа ойыншыларды тіркеп, трансферлер мен жалдау (аренда) келісімдерін рәсімдей алады.
Бұған дейін ҚФФ жазғы трансферлік кезеңнің мерзімдеріне өзгерістер енгізген болатын. Трансферлік терезені маусым айының басына ауыстыру туралы шешім еурокубоктық турнирлерге қатысатын қазақстандық клубтардың мүдделерін ескере отырып қабылданды.
Тіркеу кезеңі аяқталғанға дейін командалар өз өтінімдеріне өзгерістер енгізіп, ҚФФ ұйымдастыратын жарыстарға қатысу үшін жаңа футболшыларды тіркей алады. Ойыншыларды қосымша тіркеудің соңғы күні – 16 шілде.
Командалар құрамындағы барлық өзгерістер туралы ақпарат қажетті құжаттар кәсіби клубтар арасындағы жарыстарды өткізу дирекциясына түскен сайын KFF League ресми сайтында клубтардың профильдерінде жедел түрде жарияланып отырады.