Биылғы маусымда «Ордабасы» сапына қосылған ойыншылардың ішінде жанкүйерлердің ықыласына тез бөленген футболшылардың бірі – бразилиялық вингер Лео Натель. Алаңдағы жылдамдығы, дриблингі және шабуылдағы белсенді ойынымен көзге түскен легионер бүгінде шымкенттік клубтың маңызды ойыншыларының біріне айналып келеді. KFF League тілшісіне берген сұхбатында Натель Қазақстандағы алғашқы әсері, «Ордабасыға» ауысу тарихы, ҚПЛ мен Кипр чемпионатының айырмашылығы және алдағы мақсаттары туралы әңгімеледі.
– Лео, алдымен Қазақстандағы өмір мен жаңа командаға бейімделуіңіз жайлы айтып өтсеңіз. Барлығы өзіңіз жоспарлағандай өрбіп жатыр ма?
– Бейімделу үдерісі өте жақсы өтіп жатыр. Командадағы әріптестеріммен де, жаттықтырушылар штабымен де, клуб қызметкерлерімен де тез тіл табысып кеттім. Қазір өзімді өте жайлы сезінемін.
Біз біртұтас отбасы қалыптастырып жатырмыз. Меніңше, үлкен жетістіктерге жетудің және титулдар үшін күресудің басты шарты – дәл осы. Бір-бірімізге қолдау көрсетіп, көп еңбек етіп, ортақ мақсат үшін жұмыла жұмыс істеуіміз керек.
– «Ордабасыдан» алғашқы ұсыныс қашан түсті? Бұл трансфер қалай жүзеге асты?
– Алғашқы байланыс ақпан айында агентім арқылы болды. Ол кезде бұрынғы клубымда жақсы кезеңді өткізіп жатқанмын. Біз Кипр кубогының жартылай финалында ойнап, тарихи жетістікке жақын тұрған едік.
Сондықтан клубым бастапқыда мені жібергісі келмеді. Бірақ «Ордабасының» мені қатты қалағаны үлкен әсер қалдырды. Әсіресе клуб басшылығы мен агентімнің атқарған жұмысы маған ерекше мотивация берді.
Кейін отбасыммен, агентіммен ақылдасып, клубтың жобасын, тарихын, жанкүйерлерін зерттедік. Соның нәтижесінде бұл трансферді жүзеге асыруға шешім қабылдадық. Қазір сол таңдауымызға өте ризамыз.
– Кипр чемпионатында негізгі ойыншылардың бірі болдыңыз. ҚПЛ мен Кипр чемпионатының айырмашылығын қалай бағалайсыз?
– Айырмашылықтар бар. Кипрдегі футбол техникалық тұрғыдан жоғарырақ және ойын ашық өтеді. Көп команда допқа иелік етуге, шабуылдауға ұмтылады.
Ал Қазақстанда ойын әлдеқайда физикалық сипатта өтеді. Әсіресе «Ордабасы» чемпиондыққа таласып жатқандықтан, қарсыластар бізге қарсы қорғанысқа көбірек мән береді. Төмен блокта ойнап, қарымта шабуылға сенім артады.
Сондықтан бізге шыдамдылық, креатив және жоғары концентрация қажет. Жалпы, Қазақстандағы футбол физикалық күш пен тактикалық тәртіпке көбірек негізделген деп айтар едім.
– Қазақстанға келмес бұрын мұнда ойнаған бразилиялық футболшылармен сөйлестіңіз бе?
– Иә, белгілі бір деңгейде ақпарат жинадым. Бұрыннан қазақстандық футболды бақылап жүретінмін. Былтырғы жылы «Қайраттың» еурокубоктардағы ойындарын көрдім.
Ал нақты кеңесті қазіргі командаласым Эвертоннан алдым. Ол клуб, қала, инфрақұрылым және жергілікті мәдениет туралы көп мәлімет берді. Қазақстанға келу туралы шешім қабылдауыма оның кеңесі де әсер етті.
– Жанкүйерлер сізді ойынды өз мойнына ала алатын вингер ретінде бағалайды. Өзіңіз басты артықшылықтарыңызды қалай сипаттар едіңіз?
– Менің негізгі қаруларым – дриблинг пен соққы. Сонымен қатар шабуылдың барлық позициясында ойнай аламын. Өзіме сол қаптал ыңғайлырақ, бірақ оң жақта да, орталықта да өнер көрсете аламын.
Соңғы пас беру қабілетім де жақсы деп ойлаймын. Маған тек гол соғу ғана емес, әріптестеріме мүмкіндік жасау да ұнайды.
Қазіргі футболда допсыз әрекет ету де маңызды. Прессинг жасау, қорғанысқа көмектесу – шабуылшылар үшін міндетті талаптардың бірі. Сондықтан осы бағыттағы жұмысымды да өз артықшылықтарымның қатарына қосар едім.
– Шымкент қаласы мен клуб төңірегіндегі атмосфера туралы пікіріңіз қандай?
– Шынымды айтсам, Шымкент мен үшін жағымды тосынсый болды. Мұнда келмей тұрып адамдарды тұйықтау болуы мүмкін деп ойлаған едім. Бірақ бәрі керісінше екен.
Адамдар өте ашық, қонақжай және мейірімді. Ал стадиондағы атмосфера ерекше әсер қалдырады. Отбасылардың, балалардың, жанкүйерлердің командаға бірге қолдау көрсетуі бізге үлкен күш береді.
Мұнда клуб пен жанкүйерлер арасында ерекше байланыс бар екенін сезінесің.
– Отбасыңызбен бірге сүйікті орындарыңызды тауып үлгердіңіз бе?
– Иә, Шымкент үлкен қала екен. Мен өзім де Бразилиядағы ірі қалалардың бірінде өстім, сондықтан бұл жағынан бейімделу қиын болмады.
Қазірдің өзінде жиі баратын мейрамханалар мен демалыс орындары бар. Жақында жұбайым мен қызым келді. Енді қаланы бірге аралап, жаңа жерлерді көбірек танып-білеміз.
Мен жергілікті мәдениетті құрметтеп, халықтың өмір салтын түсінуге тырысамын. Өз кезегінде мұндағы адамдардан үлкен сыйластық көріп келемін.
– Бүгінгі таңда футболдағы ең үлкен арманыңыз қандай?
– Футболшы ешқашан армандауды тоқтатпауы керек. Мен фавелада өстім. Көптеген бразилиялық балалар сияқты кәсіби футболшы болуды армандадым.
Қазір менің басты мақсатым – «Ордабасымен» чемпион атану. Клубқа Чемпиондар лигасына жолдама алуға көмектескім келеді. Әлемнің үздік командаларына қарсы ойнау сияқты арманым бар.
Жеке мақсаттарға келсек, гол соғып, нәтижелі пас беріп, командаға барынша пайда әкелгім келеді. Бірақ футболда ең маңыздысы – командалық жетістік.
– Қазақстан туралы бұған дейін не білетін едіңіз?
– Біраз мәліметім болған. «Бенфика» академиясында жүрген кезімде УЕФА Жасөспірімдер лигасында «Астанаға» қарсы ойнағанмын. Сол кезде бір күні Қазақстанда ойнаймын деп ешқашан ойлаған жоқпын.
Ұсыныс түскеннен кейін ел туралы көп ақпарат оқыдым. Қазақстанның мәдениеті мен тарихы өте бай екеніне көзім жетті.
Шынын айтсам, бұл ел мені жағымды жағынан таңғалдырды. Әсіресе адамдардың қарым-қатынасы ерекше әсер қалдырды. Енді отбасым келген соң Қазақстанды бұрынғыдан да жақсырақ танып-білуге мүмкіндік болады.
