Қазақстан Премьер-лигасының 12-туры турнирлік кестедегі жағдайды айтарлықтай өзгертті. Турдың басты назары Шымкентте өткен «Ордабасы» мен «Қайрат» арасындағы орталық матчқа ауды. Өйткені чемпионатта бірінші және екінші орында келе жатқан командалар өзара кездесті. Бұл ойында шымкенттік клуб ерік-жігер танытып, маңызды жеңіске қол жеткізді. Нәтижесінде Андрей Мартин шәкірттері алғаш рет маусымда турнир кестесінің шыңына көтерілді.
Сонымен қатар, «Астана» кезекті мәрте ұпай жоғалтып, үздік төрттіктен сырғыды. «Елімай» сырт алаңда маңызды жеңіске жетіп, көшбасшылар тобына жақындай түсті. Ал «Оқжетпес» соңғы секундтарда жеңілістен құтылып, тағы да өзінің мінезді команда екенін дәлелдеді.
«Алтай» – «Астана» – 1:1
Голдар: Кәрімов, 50 (0:1). Шмидт, 67 (1:1).
Турды Өскеменде өткен матч ашты. Қағаз жүзінде фаворит саналған «Астана» бұл кездесуде де тұрақты ойын көрсете алмады. Бірінші таймда алаң иелері батылдық танытып, бірнеше қауіпті шабуыл ұйымдастырды. Алайда Ибрагим Дадаев пен Драган Стоисавлевичтің мүмкіндіктері голға айналмады.
Үзілістен кейін ғана елордалықтар есеп ашты. Ян Вороговскийдің пасынан кейін Рамазан Кәрімов қарсылас қорғаушысын алдап өтіп, допты қақпа торына тоғытты. Алайда бұл гол қонақтарға сенімділік сыйлай алмады. «Алтай» қысымды күшейтіп, 67-минутта Сэйф Поповтың белсенді әрекетінен кейін Дмитрий Шмидт бос қақпаны дәл көздеді.
Матч соңында екі команда да жеңісті жұлып әкетуге мүмкіндік алды. Бірақ Асилбек Абдурасулов пен Досжан Кенжегұлов өз сәттерін пайдалана алмады. Нәтижесінде тең ойын тіркеліп, «Астана» тағы да маңызды ұпай жоғалтты.
«Ертіс» – «Ұлытау» – 1:1
Голдар: Смит, 28 (0:1). Мәлікайдар, 75-автогол (1:1).
Астанада өткен кездесуде алғашқы тайм толықтай қонақтардың бақылауында болды. «Ұлытау» шабуылда белсенді ойнап, 28-минутта Ариагнер Смиттің дәл соққысымен есеп ашты.
Екінші таймда ойынның көрінісі өзгерді. «Ертіс» ойын тізгінін қолға алып, қарсылас қақпасына жиі қауіп төндіре бастады. Павлодарлықтардың табандылығы 75-минутта нәтиже берді. Қарсыластың шабуылын тоқтатамын деген Сағи Мәлікайдар өз қақпасына автогол кіргізіп алды.
Кездесудің қалған бөлігінде екі команда да жеңіс голын іздеді, алайда таблодағы көрсеткіш өзгермеді. Қорытынды есеп – 1:1.
«Оқжетпес» – «Ақтөбе» – 2:2
Голдар: Абдуманнонов 32 (1:0). Латурнус, 35 (1:1). Латурнус, 62 (1:2). Лотоцкий, 90+1 (2:2).
Көкшетаудағы матч турдың ең әсерлі ойындарының біріне айналды. Ойынның алғашқы минуттарында «Ақтөбе» бірнеше жақсы мүмкіндікке ие болды. Агустин Пасториса тіпті қақпа бағанасын дәл көздеді.
Алайда есепті алаң иелері ашты. Владислав Васильевтің соққысынан кері ұшқан допты Бектемир Абдуманнонов қақпаға енгізді. Бірақ арада бірнеше минут өткен соң Виталий Латурнус әдемі акробатикалық соққымен таразы басын теңестірді.
Екінші таймда дәл сол Латурнус дубль авторы атанып, «Ақтөбені» алға шығарды. Матч қонақтардың жеңісімен аяқталатындай көрінген. Дегенмен қосымша уақыттың соңғы сәттерінде бұрыштамадан кейін Борис Лотоцкий баспен қақпаны дәл көздеп, «Оқжетпеске» бір ұпай сыйлады.
«Қызылжар» – «Жетісу» – 3:2
Голдар: Бугре, 28 (1:0). Краишник, 72 (2:0). Ануарбеков, 88 (2:1). Пайович, 89 (2:2). Бугре, 90+2 (3:2).
Петропавлдағы кездесу нағыз драмалық сценариймен өрбіді. Алғашқы таймда Этьен Бугре есеп ашса, екінші таймда Дамьян Краишник есеп айырмасын екі допқа жеткізді.
Осы сәтте матч тағдыры шешілгендей көрінді. Бірақ «Жетісу» соңғы минуттарда керемет камбэк жасады. Алдымен Нұрбол Ануарбеков, артынша Йован Пайович мергендік танытып, есепті теңестірді.
Дегенмен соңғы сөзді алаң иелері айтты. Қосымша уақыттың екінші минутында Этьен Бугре дубль жасап, «Қызылжарға» өте маңызды жеңіс алып берді. Бұл нәтиже команданың бес матчқа созылған жеңіссіз сериясын тоқтатты.
«Атырау» – «Тобыл» – 1:1
Голдар: Зуев, 24 (0:1). Рабиу, 71-пенальтиден (1:1).
Түркістандағы матчта алғашқы болып «Тобыл» есеп ашты. Александр Зуев бірінші тайм ортасында дәл соққысымен қостанайлықтарды алға шығарды.
Екінші таймда «Атырау» белсендірек ойнай бастады. Нәтижесінде 71-минутта Марио Рабиу пенальтиден мүлт кеткен жоқ. Қалған уақытта екі команда да сақ ойнап, жеңісті тәуекелге тікпеді.
«Жеңіс» – «Каспий» – 1:0
Гол: Йеде, 34 (1:0).
Астанадағы кездесуде алаң иелері үш ұпай алуға міндетті команданың ойынын көрсетті. «Жеңіс» матч бойы басымдық танытып, 34-минутта Самсон Йеде есеп ашты.
«Каспий» қорғаныста тәртіпті әрекет еткенімен, шабуылда қауіпті сәттерді аз жасады. Соңғы минуттардағы қысым да нәтиже бермеді. Осылайша, «Жеңіс» маңызды жеңіске жетсе, ақтаулық клуб турнир кестесінің соңына сырғыды.
«Қайсар» – «Елімай» – 2:3
Голдар: Мұртазаев, 4 (0:1). Цуцкич, 11 (1:1). Плакка, 69 (1:2). Жақсылықов, 76-пенальтиден (1:3). Эзекиль, 90+4 (2:3).
Қызылордада өткен матчта көрермендер бес голдың куәсі болды. Роман Мұртазаев төртінші минутта есеп ашып, семейліктерді алға шығарды. Бірақ көп ұзамай Никола Цуцкич таразы басын теңестірді.
Ұзақ уақыт бойы есеп өзгеріссіз тұрды. Тек екінші тайм ортасында Элош Плакка «Елімайды» қайта алға шығарды. Артынша Айбар Жақсылықов пенальтиден мергендік танытып, қонақтардың басымдығын арттырды.
Қосымша уақытта Имо Эзекиль ойынның қызығын қайта оятқанымен, «Елімай» жеңісті сақтап қалды. Бұл нәтиже Андрей Карпович командасын көшбасшыларға бір қадам жақындатты.
«Ордабасы» – «Қайрат» – 2:1
Голдар: Жоржиньо, 14 (0:1). Килама, 28 (1:1). Астанов Э. 64 (1:2).
Турдың басты матчы Шымкентте өтті. Кездесуді чемпион «Қайрат» сәтті бастады. 14-минутта Жоржиньо әдемі комбинацияны нәтижелі аяқтап, алматылықтарды алға шығарды.
Бірақ алаң иелері тез ес жиды. Бұрыштамадан кейінгі қарбаласта Гай-Марселин Килама есепті теңестірді. ВАР тексерісінен кейін гол қақпаға енді деп танылды.
Екінші таймда «Ордабасы» шабуылда белсендірек болды. 64-минутта алаңға тыңнан қосылған Лео Нател сол қанаттан қауіпті шабуыл ұйымдастырып, оның пасын Эльхан Астанов голға айналдырды. Қақпашы Темірлан Анарбеков алғашқы соққыны қайтарғанымен, доп қайтадан Астановқа түсіп, ол екінші мүмкіндігін мүлт жіберген жоқ.
Қалған уақытта «Қайрат» таразы басын теңестіруге тырысқанымен, нәтиже өзгермеді. Осы жеңістің арқасында «Ордабасы» турнир кестесінде бірінші орынға көтеріліп, чемпионаттағы басты фавориттердің бірі екенін тағы дәлелдеді.
12-турдың басты қорытындысы – чемпионатта жаңа көшбасшының пайда болды. «Ордабасы» маңызды матчта «Қайратты» жеңіп, бірінші орынға шықты. «Елімай» үздік төрттікке көтерілсе, «Оқжетпес» үшінші орнын сақтап қалды.