Футболдан Қазақстан Бірінші лигасының 8-туры мәресіне жетті. Екі күнге созылған турда көшбасшылар ұпай жоғалтқан жоқ. «Қайрат-Жастар», «Шахтер» және «Тұран» кезекті жеңістеріне қол жеткізсе, «Тараз» бұл жолы тең нәтижемен шектелді.
Бірінші лигада әлі бірде-бір матчта жеңілмеген алматылық «Қайрат-Жастар» командасы кезекті ірі жеңісіне қол жеткізді. Сырт алаңда «Арыс» клубына қарсы ойнаған алматылықтар қарсылас қақпасына жауапсыз үш гол соғып, чемпионаттағы алтыншы жеңісін тіркеді. Кездесудегі үш голды да 18 жастағы шабуылшы Исмаил Бекболат соққанын айта кеткен жөн. Қазіргі таңда ол 7 голмен сұрмергендер көшін бастап тұр.
Турнир кестесінде «Қайрат-Жастарды» өкшелеп келе жатқан Қарағандының «Шахтері» де бұл турда қиын жеңіске жетіп, маңызды үш ұпай еншіледі. Кеншілер командасы өз алаңында турнир кестесінің соңында келе жатқан «Елімай-Ж» ұжымын қабылдап, Дархан Дастанның автоголының арқасында 1:0 есебімен басым түсті.
Сондай-ақ кейінгі екі турда қарсыластарына есе жіберген Түркістанның «Тұран» командасы бұл жолы жарқын жеңіске қол жеткізді. Өз алаңында «Батыр» клубын қабылдаған түркістандықтар қарсылас қақпасына жауапсыз төрт гол соқты. «Тұранның» 19 жастағы шабуылшысы Әлімжан Еркен хет-трик авторы атанса, Өркен Махан бір голды өз еншісіне жазды. Бір қызығы, қос футболшы да «Тұран» сапына жуырда ғана «Қайсардан» ауысып келген болатын. Қазіргі таңда «Тұран» 15 ұпаймен турнир кестесінің төртінші орнына көтерілді.
Жоғары топқа таласып жүрген тағы бір үміткер ұжым — «Тараз» бұл турда қарсыласымен ұпай бөлісуге мәжбүр болды. Қостанайға қонаққа барған Руслан Эсатов шәкірттері матчтың соңғы минуттарында жігер танытып, «Тобыл» жастары командасымен тең түсті. Бірінші таймнан кейін алаң иелері 3:1 есебімен алда тұрған еді. Екінші таймның 82-минутында Нұрлан Дайыров есеп айырмасын қысқартса, 90-минутта Ерсұлтан Төрекқұл таразы басын теңестірді. Осылайша «Тараз» қатарынан үш жеңістен кейін чемпионатта алғаш рет тең нәтиже тіркеді.
8-турдың өзге ойындарының нәтижелері:
«Жайық» – «Ақтөбе-2» – 3:2
«Астана-2» – «Хан-Тәңірі» – 2:1
«Академия Оңтүстік» – «Каспий» – 1:0
Бірінші лиганың 9-тур ойындары 11-12 маусымға жоспарланған.