Футболдан Қазақстан Бірінші лигасының 7-туры мәресіне жетіп, бірнеше тосын нәтиже тіркелді. Екі күнге созылған турда чемпионат көшбасшысы Қарағандының «Шахтері» сырт алаңда «Астана» жастарына есе жіберіп, маусымдағы алғашқы жеңілісіне ұшырады. Ал «Қайрат-Жастар» өз алаңында «Тұранды» сенімді түрде жеңіп, турнир кестесінде бірінші орынға көтерілді.
7-тур нәтижелері:
«Хан Тәңірі» – «Тобыл-Ж» – 3:1
«Тараз» – «Арыс» – 2:1
«Каспий-Ж» – «Жайық» – 0:1
«Астана-Ж» – «Шахтер» – 4:3
«Қайрат-Ж» – «Тұран» – 2:0
«Ақтөбе-Ж» – «Елімай-Ж» – 3:1
«Батыр» – «Оңтүстік Академиясы» – 2:2
Турдың басты сенсациясы Астанада тіркелді. Елордаға қонаққа келген «Шахтер» чемпионаттағы алғашқы жеңілісіне ұшырады. «Астана Аренада» өткен кездесу аса тартысты әрі голдарға бай өтті. Алғашқы таймда командалар төрт гол соқса, екінші таймда жанкүйерлер тағы үш голдың куәсі болды.
Матчтың 10-минутында алаң иелері сапынан Арсен Ахметов есеп ашты. Алайда арада алты минут өткенде Роман Асылбаев таразы басын теңестірді. 21-минутта Абзал Сағын «Астананы» қайта алға шығарса, 37-минутта Рифат Нұрмұғамет есепті 2:2-ге жеткізді. Осылайша алғашқы тайм тең аяқталды.
Екінші таймды «Астана» жастары белсенді бастап, екі минут ішінде қарсылас қақпасына екі гол соқты. 52-минутта Аян Жақайым мергендік танытса, араға екі минут салып Нұраділ Серіков елордалықтардың төртінші голын енгізді. 66-минутта Абзал Сағын өз қақпасына гол соғып, «Шахтердің» есеп айырмасын қысқартуына мүмкіндік берді. Дегенмен матч соңына дейін «Астана» жастары басымдықты сақтап қалып, чемпионаттағы үшінші жеңісіне қол жеткізді.
Ал «Шахтердің» ұпай жоғалтқанын «Қайрат-Жастар» тиімді пайдаланды. Алматы клубы бұл турда өз алаңында Түркістанның «Тұранын» қабылдап, 2:0 есебімен жеңіске жетті. Алғашқы таймда Мұхамедәлі Әбіш есеп ашса, екінші таймда Петр Трубин матчтың нүктесін қойды. Осылайша «Қайрат-Жастар» 17 ұпай жинап, Бірінші лигада көш бастады. Ал «Тұран» қатарынан екінші рет жеңіліп, 12 ұпаймен бесінші орынға сырғыды.
Жоғары топқа шығудан үмітті «Тараз» да кезекті жеңісіне қол жеткізді. Тараздықтар өз алаңында «Арысты» 2:1 есебімен ұтты.
Сондай-ақ «Хан Тәңірі», «Жайық» және «Ақтөбе-Ж» командалары да турдағы жеңістерін тойлады. «Хан Тәңірі» өз алаңында «Тобыл» жастарын 3:1 есебімен жеңсе, «Жайық» сырт алаңда «Каспий-Ж»-дан 1:0 есебімен басым түсті. Ал «Ақтөбе-Ж» өз алаңында «Елімай-Ж» командасын 3:1 есебімен жеңді.
Өткен турда «Жайықты» ұтқан «Батыр» бұл жолы өз алаңында «Оңтүстік Академиясымен» 2:2 есебімен тең түсті.
