Қазақстан Премьер-лигасының 11-туры тартысты нәтижелерімен есте қалды. Көш басындағы «Қайрат» өз алаңында «Қайсармен» тең ойнап, маңызды ұпай жоғалтса, «Ордабасы» Қостанайда «Тобылды» ірі есеппен жеңіп, чемпиондық бәсекені қыздыра түсті. Ал «Оқжетпес» сырт алаңдағы жеңісінен кейін үздік үштіктегі орнын нығайтты.
«Алтай» – «Оқжетпес» – 0:1
Гол: Иван Кузьмичев, 13 (0:1).
Көкшетаулық команда сырт алаңда маңызды үш ұпайды еншіледі. Ойын өте тартысты өтті: екі команда да гол соғатын мүмкіндіктер жасады. Алайда кездесудің басты қаһарманы – «Оқжетпес» қақпашысы Мирослав Лобанцев болды. Ол бірнеше қауіпті сәтте өз командасын құтқарып қалды. «Алтай» жеңіліске лайық болды дей алмаймыз, бірақ шабуылда нәтижелілік жетіспеді.
Осы жеңістен кейін «Оқжетпес» үздік үштіктегі орнын нығайтса, өскемендіктер төменгі аймақта қалды.
«Астана» – «Ұлытау» – 3:0
Голдар: Рамазан Кәрімов, 23 1:0). Станислав Басманов, 49 (2:0). Бранимир Калаица, 87 (3:0).
Елорда клубы турдағы ең сенімді ойындарының бірін өткізді. Бірінші таймда есеп ашқан «Астана» екінші таймда басымдықты толық иеленді. Басманов керемет гол соғып, кейін Калаица матчтың нүктесін қойды. Ал маусымда жақсы әсер қалдырып жүрген «Ұлытау» бұл жолы өз ойынын көрсете алмады.
«Каспий» – «Ертіс» – 2:2
Голдар: Умаев, 27 (1:0). По, 49 (1:1). Зүлфиқаров, 84 (2:1). По, 90 (2:2).
Турдағы ең драмалық матчтардың бірі Қызылордада өтті. Бірінші таймда номинальды алаң иелері «Каспий» пенальтиден есеп ашты. Екінші таймда Жан-Морель По екі рет мергендік танытып, павлодарлықтарды жеңілістен құтқарды. Екі команда да қорғаныста сенімсіз ойнады, бірақ жанкүйерлер тартысты матч көрді.
«Жетісу» –«Атырау» – 0:0
Бұл кездесуде гол соғылған жоқ. Ойын негізінен алаңның ортасында өтті, қауіпті сәттер аз болды. «Атырау» бір ойыншыға артық болғанымен, бұл артықшылықты пайдалана алмады. Қос команда да төменгі аймақтан алыстауға тырысып жатыр.
«Елімай» – «Жеңіс» – 2:1
Голдар: Роман Мұртазаев, 20 (1:0). Исламбек Қуат, 48 (1:1). Фессу Плакка, 80 (2:1).
Семей клубы алты матчқа созылған сәтсіз сериясын тоқтатты. «Елімай» белсенді бастады және бірінші таймда есеп ашты. Үзілістен кейін Исламбек Қуат таразы басын теңестіргенімен, Плакка әдемі гол соғып, командасына жеңіс сыйлады. Осы жеңіс арқылы семейліктер турнирлік кестеде алтыншы орынға көтерілді.
«Қайрат» – «Қайсар» – 0:0
Турдың басты сенсацияларының бірі Алматыда тіркелді. Көш бастап тұрған «Қайрат» өз алаңында аутсайдерлер қатарындағы «Қайсарды» жеңе алмады. Алаң иелері басымдыққа ие болғанымен, қызылордалықтардың қорғанысын бұза алмады. VAR жүйесі де алматылықтардың бір голын есепке алмады.
«Ақтөбе» – «Қызылжар» – 0:0
«Ақтөбе» тағы да ұпай жоғалтты. Алаң иелері бірнеше мүмкіндік жасағанымен, оларды голға айналдыра алмады. «Қызылжар» тәртіпті қорғанысымен ерекшеленді. Бұл нәтиже ақтөбеліктердің жанкүйерлерін қуанта қоймасы анық.
«Тобыл» – «Ордабасы» – 0:3
Голдар: Капацина, 50 (0:1). Жасұлан Әмір, 84 (0:2). Жасұлан Әмір, 87 (0:3).
Турдың орталық матчында шымкенттік клуб айқын басымдық көрсетті. Ойынның шешуші сәті – «Тобыл» ойыншысы Кирилл Глущенковтың 30-минуттағы қызыл қағазы болды. Бір ойыншыға артық болған «Ордабасы» екінші таймда толық үстемдік орнатып, сенімді жеңіске жетті. Жасұлан Әмір дубль авторы атанды.
Алдағы 12-турда басты назар «Ордабасы» – «Қайрат» кездесуіне аумақ, себебі бұл ойын чемпиондық бәсекенің бағытын өзгертуі мүмкін.
