19-20 мамыр күндері футболдан Қазақстан Екінші лигасының 7-туры аясында қызықты әрі тартысқа толы кездесулер ұйымдастырылды.
Екі конференцияда да жанкүйерлер нәтижелі матчтарға, соңғы минуттардағы драмалық сәттерге және күтпеген нәтижелерге куә болды.
Турдағы ең қызықты матчтардың бірі Алматыда өтті. «Қаршыға» өз алаңында «Хан-Тәңірі Ж» командасын 4:3 есебімен жеңіп, жанкүйерлерге нағыз футбол мерекесін сыйлады.
Кездесу өте жоғары қарқында өтті. Алаң иелері сапынан Артур Глушков есепті ерте ашса, Эмин Әлиев айырмашылықты ұлғайтты. Матчтың соңғы минуттары ерекше шиеленісті болды: Ерасыл Таласбаев пен Никита Стрижков қосымша уақытта гол соғып, жеңісті қамтамасыз етті.
Ал «Хромтау» мен «Талас» арасындағы кездесуде жанкүйерлер гол көре алмады. Қос команда қорғанысқа басымдық беріп, матч 0:0 есебімен аяқталды.
«Тұран Ж» мен «Атырау Ж» арасындағы матч та қызықты өрбіді. Екі команда шабуылда белсенді ойнап, нәтижесінде 2:2 есебі тіркелді. Сондай-ақ «Қайсар Ж» мен «Тараз Ж» тең тарқасса, «Жас Қыран» мен «Ордабасы Ж» арасындағы ойында да жеңімпаз анықталмады – 2:2.
Солтүстік-Шығыс конференциясында турдың ең ірі жеңістерінің бірі Қарағандыда тіркелді. Орталық Қазақстанның дербиі өтті. «Шахтер Ж» Жезқазған қаласының «Ұлытау» жастарымен жолықты. «Кеншілер» қарсылас қақпасына төрт гол соқты. Руслан Белобородый, Максим Комиков және Нұрхан Қағазбаев нәтижелі ойын көрсетті. Әсіресе Қағазбаев дубль авторы атанды.
«Алтай Ж» сырт алаңда «Ертіс» жастарын 2:0 есебімен жеңіп, маңызды үш ұпайға ие болды. Роман Брагин бұл кездесуде екі гол соғып, матч қаһарманына айналды.
«Аңсат» пен «Оқжетпес Ж» арасындағы матч 1:1 есебімен аяқталса, «Жетісу Ж» өз алаңында «Жеңіс» жастарына 1:2 есебімен есе жіберді.
Ал Петропавлда өткен ойында «Қызылжар Ж» командасы ВПР Астананы 3:1 есебімен жеңіп, турдағы маңызды нәтижелердің біріне қол жеткізді.
7-тур қорытындысы бойынша бірнеше команда көшбасшылар қатарындағы орындарын нығайтса, кейбір ұжымдар маңызды ұпайлардан айырылып қалды.
Матч нәтижелері:
Оңтүстік-батыс конференциясы
«Қаршыға» – «Хан-Тәңірі Ж» – 4:3
«Хромтау» – «Талас»» – 0:0
«Тұран Ж» – «Атырау Ж» – 2:2
«Қайсар Ж» – «Тараз Ж» – 1:1
«Жас Қыран» – «Ордабасы Ж» – 2:2
Солтүстік-шығыс конференциясы
«Шахтер Ж» – «Ұлытау Ж» – 4:0
«Ертіс Ж» – «Алтай Ж» – 0:2
«Аңсат» – «Окжетпес Ж» – 1:1
«Жетісу Ж» – «Жеңіс» – 1:2
«Қызылжар Ж» – ВПР Астана – 3:1.
