Қарағандының «Шахтер» клубы биыл Бірінші лига маусымын сенімді бастап, алғашқы алты турдан кейін турнир кестесінің көш басына орналасты. Чемпионаттың алғашқы кезеңіндегі басты кейіпкерлердің бірі – команданың шабуылшысы Артем Литош. Қазіргі таңда ол команданың үздік сұрмергені. Жас футболшы KFF League сайтына берген сұхбатында карьерасының сәтті басталуының себептерін, команда ішіндегі атмосфера және маусымдағы мақсаттары туралы айтты.
– Артем, «Шахтер» маусымды өте сенімді бастады. Команданың алғашқы ойындарын өзің қалай бағалайсың? Осындай нәтижені күттіңіздер ме?
— Иә, әрине, біз дәл осындай бастаманы күттік және маусым басынан бері соған ұмтылдық. Команда үлкен жұмыс атқарды, бірақ қазір ең маңыздысы – қарқынды бәсеңдетпеу, әрі қарай еңбек етіп, ойыннан ойынға дамуды жалғастыру.
– Осы маусымда гол+пас жүйесі бойынша нәтижең керемет. Бір жылдың ішінде не өзгерді?
– Менің ойымша, ең алдымен команданың ойын үлгісі өзгерді. Әріптестер бір-бірін алаңда жақсырақ түсіне бастады, өзара байланыс күшейді. Өзім де қақпа алдындағы сәттерде сабырлы әрі суыққанды әрекет ете бастадым, шабуылдарды аяқтауға және соққыларға саналы түрде қараймын.
– «Шахтерге» былтырғы маусым барысында келдің. Сондықтан оқу-жаттығу жиынына қатыса алмадың. Ал биыл командамен бірге толыққанды жаттығу жиынынан өттің. Айырмашылық байқала ма?
– Иә, қазір жай ғана футболдан да үлкен нәрсе сезіледі. Жаңа басшылықтың келуімен бәрі түсініктірек әрі жүйелі бола бастады: нақты мақсаттар қойылып, команда ішіндегі жауапкершілік деңгейі өсті. Біз бүгінде осы міндеттерге біртұтас команда ретінде ұмтылып келеміз.
– Көпшілік қазіргі «Шахтердің» ұйымдасқан әрі тәртіпті команда екенін айтып жүр. Бұл ұжымның басты күші неде?
–Біздің команданың басты күші – ең алдымен жанкүйерлеріміз, біздің 12-ойыншымыз және клубтың тарихы. Команданың өзіне келсек, «Шахтер» шынымен де былтырғы маусыммен салыстырғанда сенімдірек әрі тәртіптірек болды. Тимур Турлов бастаған жаңа басшылықтың келуімен бәрі құрылымды әрі түсінікті бола түсті.
– Осы маусымдағы өз мақсаттарың мен амбицияларың қандай?
– Өз алдыма тек ең жоғары мақсаттар қоямын – командаға негізгі міндетті орындауға және Қазақстан Премьер-лигасына шығуға көмектесу. Ал жеке жетістіктер әрқашан команда жеңіске жетіп, жақсы нәтиже көрсеткен кезде келеді.
– Команда ішіндегі атмосфера қандай? Ойыншылар арасындағы үйлесім қаншалықты маңызды?
– Біз үшін бәрі киім ауыстыратын бөлмедегі атмосферадан басталады. Егер команданың ішінде бәрі жақсы болса, ол алаңдағы ойынға да әсер етеді. Біз бір-бірімізді матчтар мен жаттығуларда ғана емес, футболдан тыс өмірде де қолдауға тырысамыз. Әсіресе, аға ойыншыларды атап өткім келеді – олар ақыл-кеңес беріп, алға қалай жылжу керектігін көрсетеді.
– «Шахтердің» қорғаныс статистикасы лигадағы үздіктердің бірі – команда әлі гол жіберген жоқ. Мұның сыры неде?
– Бұл – бүкіл команда мен бапкерлер штабының ортақ еңбегі деп ойлаймын. Бірақ қорғаныс шебіндегі жігіттерге ерекше құрмет білдіргім келеді. Олар үлкен жұмыс атқарып жатыр, және көп жағдайда дәл солардың арқасында команда осындай нәтижеге қол жеткізуде.
– Былтырғы маусым команда үшін қиын болды, Премьер-лигада қалу мүмкін болмады. Қазір жанкүйерлер «Шахтерге» қайтадан сене бастады. Бұл сіздерге қосымша жауапкершілік жүктей ме?
– Иә, 100 пайыз. Жанкүйерлердің қолдауы біз үшін өте маңызды. Бұрын айтқанымдай, клуб басшылығы бұрынғы атмосфера мен клубқа деген сүйіспеншілікті қайтаруға тырысуда. Ал біз өз кезегімізде мұны алаңдағы ойынымызбен дәлелдегіміз келеді. Меніңше, жанкүйерлер үшін ең маңыздысы – осы.
– Осы маусымда ерекше есте қалған матч бар ма?
– Иә, бар. Мен үшін бұл Қазақстан кубогындағы «Оқжетпеспен1 ойын болды. Осындай деңгейде өз күшімді сынағым келді. Менің ойымша, бәрі көрді – тіпті жас құраммен, бірде-бір легионерсіз де біз қарсыласқа лайықты қарсылық көрсете алдық.
– «Шахтер» жанкүйерлеріне не айтқың келеді?
– Бізді қолдауды жалғастырыңыздар! Сіздердің эмоцияларыңыз, жанашырлықтарыңыз және қолдауларыңыз команданы алға жетелейді. Біз мұны сезінеміз және өз ойынымыз бен нәтижеміз арқылы жауап беруге тырысамыз.