Қазақстан Премьер-лигасының 10-туры жанкүйерлерге тартысты ойындар мен соңғы минуттардағы драмалық сәттер сыйлады. Тур сенсациясыз аяқталғанымен, бірқатар матчтарда күтпеген нәтижелер тіркелді. Көш басындағы клубтар өз позицияларын сақтап қалса, турнир кестесінің төменгі бөлігіндегі командалар маңызды ұпайлар үшін жан аямай күресті. Үш кездесуде жеңіс голдары қосымша уақытта соғылып, турдың басты ерекшелігіне айналды. Тур қорытындысы бойынша «Қайрат» көшбасшылық орнын сақтап қалды.
«Ұлытау» – «Каспий» – 1:0
Голдар: Кейлер, 90+3 (1:0).
Бұл кездесудің алғашқы таймында қауіпті шабуылдар аз болды. Екі команда да сақ ойнады. Ал үзілістен кейін матч қарқыны артты. Алаң иелері көбірек шабуылдап, қарсылас қақпасына қысым жасай бастады.
Кездесудің тағдыры қосымша уақыттың үшінші минутында шешілді. Сергей Кейлер алыстан дәл соққы жасап, өз командасына үш ұпай сыйлады.
«Оқжетпес» – «Астана» – 1:0
Гол: Лотоцкий, 45+3 (1:0).
Турдың орталық матчтарының бірі Көкшетауда өтті. Маусымды сенімді бастаған «Оқжетпес» өз алаңында «Астананы» қабылдады. Елордалық клуб матчты белсенді бастады. Алғашқы минуттарда бұрыштамалар мен стандарттар арқылы қауіп тудырды. Тіпті бір сәтте астаналық футболшылар пенальти сұрағанымен, төреші ойын ережесі бұзылмағанын көрсетті.
«Оқжетпес» те қарымта шабуылдарын ұйымдастырып отырды. Бірінші таймның соңына қарай Борис Лотоцкий бұрыштамадан кейін баспен дәл соққы жасап, есеп ашты.
Екінші таймда «Астана» есепті теңестіруге тырысты. Марин Томасов пен Бауыржан Исламхан бірнеше қауіпті соққы жасағанымен, Мирослав Лобанцев тамаша ойын көрсетті. Матч соңында Иван Башич қызыл қағаз алып, қонақтардың жағдайын қиындатты.
Осылайша, «Оқжетпес» маңызды жеңіске жетіп, үздік үштіктегі орнын сақтап қалды. Ал «Астана» тағы да ұпай жоғалтып, көшбасшылардан қалып бара жатыр.
«Ертіс» – «Елімай» – 2:2
Голдар: По, 27 (0:1). Оразов, 48 (1:1). Бақтияров, 52 (1:2). Ағыманов, 86 (2:2).
Бұл кездесу екі команда үшін де ерекше маңызды болды. Павлодарлықтар жаңа бас бапкер Нұрбол Жұмасқалиевпен алғашқы ойынын өткізсе, «Елімай» бірнеше тур бойы жеңіске жете алмай жүрген еді.
Алғашқы таймда «Ертіс» алға шықты. Жан-Морель По бұрыштамадан кейін алыстан дәл соққы жасады. Бірақ екінші тайм басталысымен семейліктер ойынды өз бақылауына алды. Алдымен Оразов айып соққысынан әдемі гол соқты. Артынша Бақтияров баспен есепті өзгертті.
Қонақтар бірнеше мүмкіндікті пайдалана алмады. Футболда «Сен соқпасаң, саған соғады» деген бар. Бұл матчта соған куә болды.Кездесудің 86-минутында Темірлан Ағыманов допты қақпаға бағыттап, есепті теңестірді. Нәтижесінде командалар ұпай бөлісті.
«Қызылжар» – «Алтай» – 1:2
Голдар: Одеоибо, 84 (0:1). Баокен, 90+2 (1:1). Кенжеғұлов, 90+3 (1:2).
Петропавл командасы өз алаңында жанкүйерлерін қуанта алмады. Есесіне, «Алтай» маусымдағы алғашқы жеңісіне қол жеткізді.
84-минутта Самюэль Одеоибо есеп ашып, қонақтарды алға шығарды. Алайда араға көп уақыт салмай Стефан Баокен есепті теңестірді. Бірақ матчтың соңғы сөзі «Алтайда» қалды. Қосымша уақыттың үшінші минутында Досжан Кенжеғұлов жеңіс голын соқты.
Бұл жеңіс өскемендік клубтың турнир кестесіндегі жағдайын жақсартты.
«Жеңіс» – «Қайрат» – 1:2
Голдар: Юккола, 52 (0:1). Жоржиньо, 65 (0:2). Широбоков, 88-автогол (1:2).
Алматылық клуб кезекті маңызды жеңісіне жетті. Матч басынан бастап «Қайрат» басымдық көрсетті және бірнеше қауіпті шабуыл ұйымдастырды.
Екінші таймда Ойва Юккола есеп ашып, кейін Жоржиньоның голына нәтижелі пас берді. Есеп 2:0 болғаннан кейін матч тағдыры шешілгендей көрінді.
Алайда ойын соңында Александр Широбоков өз қақпасына гол соғып, алаң иелеріне үміт сыйлады. «Жеңістің» теңестіруге мүмкіндігі болғанымен, алматылықтар есепті сақтап қалды.
«Ақтөбе» – «Атырау» – 1:1
Голдар: Труфанов, 56 (0:1). Латурнус, 65 (1:1).
«Ақтөбе» өз алаңында жанкүйерлерін қуанта алмады. Қонақтар сауатты қорғанып, қарсы шабуылда қауіпті әрекеттер ұйымдастырды.
Ян Труфанов есеп ашқаннан кейін «Атырау» жеңіске жақындай түсті. Бірақ Виталий Латурнустың алыстан бағыттаған соққысы алаң иелерін жеңілістен құтқарды.
«Қайсар» – «Тобыл» – 2:1
Голдар: Әбікен, 2 (1:0). Әбікен, 9 (2:0). Жұмашев, 30 (2:1).
Қызылордалық клуб маусымдағы алғашқы жеңісіне қол жеткізді. Айбол Әбікен матчтың алғашқы минуттарында екі рет мергендік танытып, ойын тағдырын шешті.
«Тобыл» сапынан Жасұлан Жұмашев үзіліске дейін есеп айырмасын қысқартқан. Бірақ одан әріге қонақтардың шамасы жетпеді. Бұл жеңіс «Қайсардың» турнир кестесіндегі жағдайын жақсартты.
«Ордабасы» – «Жетісу» – 2:1
Голдар: Қашкен, 37 (0:1). Малый, 71 (1:1). Халматов, 90+8-пенальтиден (2:1).
Турдағы ең драмалық ойындардың бірі Шымкентте өтті. Бірінші таймда Дінмұхамед Қашкен есеп ашып, қонақтарды алға шығарды.
Екінші таймда Сергей Малый таразы басын теңестірді. Қосымша уақыттың сегізінші минутында Муроджон Халматов пенальтиден дәлдік танытып, Шымкенттегі клубына жеңіс сыйлады.