Мемлекет басшысы Қасым-Жомарт Тоқаев «Кітап оқу мәдениетін дамыту және зерделі ұлт қалыптастыру жөніндегі шаралар туралы» жарлыққа қол қойды.
Құжат адами капиталды дамытуға, қоғамның зияткерлік және мәдени әлеуетін нығайтуға, сондай-ақ кітап оқу мәдениетін кеңінен насихаттауға бағытталған. Жарлық аясында шығармашыл, бәсекеге қабілетті тұлғаны қалыптастыру үшін бірқатар маңызды шаралар жүзеге асырылады.
Мемлекеттік саясаттың негізгі бағыттары ретінде кітап оқу мәдениетін дамыту, заманауи кітапханалар мен қоғамдық кеңістіктер құру, отандық қаламгерлерді қолдау, баспа саласын ынталандыру және ұлттық әдеби мұраны ел ішінде әрі шетелде насихаттау белгіленді.
Үкімет балалар мен жастар арасында кітап оқудың тұрақты дағдыларын қалыптастыруға арналған кешенді бағдарламаларды іске асырады. Сонымен қатар, жаңа форматтағы кітапханалар ашылып, цифрлық ақпараттық жүйелер енгізіледі.
Жарлыққа сәйкес, 2026 жылдың 1 қыркүйегіне дейін «Жылдың 10 оқырманы» республикалық жобасы жүзеге асырылады. Ал 2026 жылдың соңына дейін 2027-2031 жылдарға арналған «Зерделі ұлт» тұжырымдамасы бекітілуі тиіс.
Бұл бастаманы Қазақстан футбол федерациясы да қолдады. Жақында федерация Ұлттық кітап күні қарсаңында «Кітап оқитын ұлт – Читающая нация» қоғамдық қорымен бірге «Оқитын спортшы» жобасына қосылған болатын.
ҚФФ Кәсіби клубтар арасындағы жарыстарды өткізу дирекциясының басшысы Бақытжан Пазылқайыр кітап оқудың тұлғаның жан-жақты дамуына әсер ететінін атап өтті.
«Кітап оқу адамның ой-өрісін кеңейтіп, спортта ғана емес, өмірде де шыңдалуына ықпал етеді. Өзін-өзі дамытатын, талдау жасай алатын спортшы алаңда да дұрыс шешім қабылдап, жоғары нәтижеге жете алады», – деді ол.
Қазіргі таңда елімізде футболмен 1 миллионнан астам адам айналысады. Футбол академиялары мен орталықтарында 52 мыңға жуық бала білім алады, оның ішінде 12 мыңнан астамы – қыз балалар.
Сондай-ақ «Кітап оқитын ұлт» пилоттық жобасына Қарағанды облысы, Қостанай облысы және Шымкент өңірлерінен 189 мыңнан астам адам қатысып жатыр. Жобаға оқушылар, студенттер, педагогтер, мемлекеттік қызметшілер және отбасылық әулеттер тартылған.
