13 мамыр күні футболдан Қазақстан кубогының 1/4 финал ойындары өтті. Нәтижесінде жартылай финалға шыққан төрт команда белгілі болды.
«Қайсар» – «Тобыл» – 1:1 (пенальти – 5:3)
Голдар: Бақдәулет Көңлімқос 33 – Дәурен Жұмат 78
Қызылорданың «Қайсар» командасы Қазақстан кубогындағы сенсациялық жорығын жалғастырып, жартылай финалға жолдама алды. 1/8 финалда «Қайратты» жарыс жолынан ығыстырған қызылордалықтар бұл жолы «Тобылдан» басым түсті.
Кездесудің есебін 33-минутта «Қайсардың» жартылай қорғаушысы Бақдәулет Көңлімқос Виктор Мозестің дәл пасынан кейін ашты. Екінші таймның 78-минутында қонақтар сапынан Дәурен Жұмат таразы басын теңестірді.
Негізгі және қосымша уақытта жеңімпаз анықталмаған соң, ойын пенальти сериясына ұласты. 11 метрлік айып добын «Қайсар» футболшылары сәтті орындап, 5:3 есебімен жеңіске жетті. Сөйтіп, қызылордалықтар жартылай финалға жолдама алды.
«Ордабасы» – «Жетісу» – 1:0
Гол: Димитар Митков 48
Шымкенттің «Ордабасы» клубы Талдықорғанның «Жетісуын» қабылдап, 1:0 есебімен жеңіске жетті. Ойын тағдыры екінші таймда шешілді. 48-минутта болгариялық шабуылшы Димитар Митков жалғыз голдың авторы атанып, командасын жартылай финалға шығарды. 1/8 финалда «Каспиймен» өткен ойында да Митков үш гол соғып, алаң иелерін маңызды жеңіс сыйлаған еді.
«Ақтөбе» – «Алтай» – 1:1 (пенальти – 3:4)
Голдар: Айдын Зелькович 13 – Тимур Реджепов 28
Екі дүркін Қазақстан кубогының жеңімпазы «Ақтөбе» өз алаңында Өскеменнің «Алтай» командасынан пенальти сериясында жеңіліп, жарысты ширек финалда аяқтады.
Ойынның 13-минутында алаң иелері сапынан Айдын Зелькович есеп ашса, 28-минутта қонақтар сапынан Тимур Реджепов таразы басын теңестірді. Қалған уақытта да, қосымша уақытта да екі команда бір-бірінің қақпасынан саңылау таба алмады.
Жартылай финалға жолдама тағдыры пенальти сериясында шешілді. Бұл жерде «Алтай» футболшылары мергендік танытып, келесі кезеңге өтті.
«Жеңіс» – «Қызылжар» – 2:0
Голдар: Элдер Сантана 19, Адилио Дос Сантос 22
Елорданың «Жеңіс» клубы Olimpbet – Қазақстан кубогының ширек финалында Петропавлдың «Қызылжарын» қабылдап, сенімді жеңіске жетті. Алаң иелері жартылай финал мәселесін бірінші таймда-ақ шешіп тастады. Үш минут ішінде екі гол соғып, турнирдің жартылай финалына жолдама алды.
Кездесудің 19-минутында Элдер Сантана мергендік танытса, үш минуттан кейін Адилио Дос Сантос басымдықты арттырды. Екі команда да ойын барысын өзгертуге тырысқанымен, матч соңына дейін есеп өзгерген жоқ.
Жартылай финал жұптары:
«Ордабасы» – «Алтай»
«Қайсар» – «Жеңіс»
