11-12 мамыр күндері Қазақстан әйелдер футбол лигасының үшінші тур ойындары өтті. Биылғы маусым ел әйелдер футболы тарихындағы ең ауқымды чемпионаттардың бірі болғалы тұр.
Біріншілікке 19 команда қатысып, клубтар А және В конференцияларына бөлінген. Әр конференцияда командалар екі айналымдық жүйеде ойнап, кейін үздік ұжымдар чемпиондық үшін плей-офф кезеңінде бақ сынайды.
Үшінші турда жанкүйерлер ірі есептерді, сенімді жеңістерді және тартысты кездесулерді тамашалады.
А Конференциясы
«Каспий» (Ақтау) – «Ұлытау» (Жезқазған) – 0:0
Ақтауда өткен матчта жанкүйерлер гол көрген жоқ. «Каспий» мен «Ұлытау» қорғанысқа басымдық беріп, нәтижесінде ұпай бөлісті. Бұл турдағы жалғыз голсыз тең ойын болды.
БИІК (Шымкент) – «Ордабасы» (Шымкент) – 13:0
Алғаш рет әйелдер арасындағы лигада Шымкент қаласының дербиі өтті. Еліміздің бірнеше дүркін чемпионы БИІК жаңадан құрылған «Ордабасы» командасын қабылдады. Бұл ойын осы турдағы ең нәтижелі матч болды. Шабуыл шебінде тамаша ойын көрсеткен БИІК қарсылас қақпасына жауапсыз 13 гол соқты.
«Тұран» (Түркістан) – «Жетісу» (Талдықорған) – 3:0
Былтырғы маусымның қола жүлдегері «Тұран» өз алаңында сенімді ойын көрсетті. Олар матч тағдырын екінші таймда шешіп, үш ұпайды еншіледі. «Жетісу» қорғаныста көп қателік жіберіп қойды.
«Қайсар» (Қызылорда) – «Қайрат» (Алматы) – 2:1
Турдағы ең тартысты кездесулердің бірі Қызылордада өтті. «Қайсар» алматылық «Қайратты» 2:1 есебімен жеңіп, маңызды жеңіске қол жеткізді. Қонақтар матч соңына дейін есепті теңестіруге тырысқанымен, алаң иелері басымдықты сақтап қалды.
В конференциясы
«Оқжетпес» (Көкшетау) – «Қызылжар» (Петропавл) – 0:3
Петропавлдық клуб сырт алаңда өте сенімді өнер көрсетті. «Қызылжар» матч тізгінін толық бақылауда ұстап, қарсылас қақпасына үш жауапсыз гол соқты.
«Ертіс» (Павлодар) – «Шахтер» (Қарағанды) – 1:1
Павлодардағы матч тең аяқталды. Екі команда да шабуылда белсенді болғанымен, жеңіс голын соғуға мүмкіндік таппады. Нәтижесінде әр клуб бір ұпайдан иеленді.
«Ақтөбе» (Ақтөбе) – «Жеңіс» (Астана) – 13:1
Үшінші турдағы тағы бір ірі есеп Ақтөбеде тіркелді. Былтырғы ел чемпионы «Ақтөбе» астаналық «Жеңісті» ойсырата жеңіп, шабуылдағы әлеуетін айқын көрсетті. «Ақтөбе» футболшылары матч бойы жоғары қарқын ұсынып, қарсыласқа мүмкіндік қалдырмады.
«Тобыл» (Қостанай) – «Алтай» (Өскемен) – 4:0
Қостанайлық клуб өз жанкүйерлері алдында сенімді жеңіске жетті. «Тобыл» ойын тізгінін толық бақылауда ұстап, төрт голмен матчты қорытындылады.
«Астана» (Астана) «Елімай» (Семей) – 4:0
Турдың соңғы матчында елордалық команда «Елімайды» айқын басымдықпен ұтты. «Астана» шабуылда да, қорғаныста да сауатты ойын өрнегін көрсетіп, үш ұпайды қоржынға салды.
