Қазақстан Премьер-Лигасының 9-туры күтпеген нәтижелерге толы болды. Турдың басты ерекшелігі – көш басындағы командалардың бірден бірнешеуі ұпай жоғалтты. «Қайрат» Жезқазғанда жеңісті ұстап тұра алмады, «Ордабасы» аутсайдер «Алтайдың» қорғанысын бұза алмады, ал «Оқжетпес» өз алаңында «Атыраумен» тең түсті. Осы жағдайды «Астана» мен «Ақтөбе» тиімді пайдаланып, турнир кестесінде жоғарылай түсті.
«Оқжетпес» (Көкшетау) – «Атырау» (Атырау) – 0:0
Алаң иелері алғашқы минуттан ойын тізгінін өз қолдарына алып, шабуылға шықты. Әсіресе, бірінші таймда қапталдан жасалған шабуылдар арқылы «Атырау» қорғанысын ашуға ұмтылды. «Оқжетпес» командасында есеп ашатын бірнеше нақты мүмкіндік болды. Тоқтар Жаңғылышбайдың баспен соққысы, кейін Владислав Васильевтің өте жақын жерден мүлт кетуі – матч тағдырын өзгертуі мүмкін эпизодтар еді.
«Атырау» болса, өзіне тән прагматикалық футбол көрсетті. Қонақтар көп шабуылдаған жоқ, бірақ қорғаныста тәртіпті ойнады. Олар қарсыластың кеңістігін тарылтып, айып алаңы маңында бос аймақ қалдырмауға тырысты. Соңына қарай «Атырау» тіпті жеңісті жұлып әкетуге де жақын болды. Қорытынды есеп – 0:0.
«Жетісу» (Талдықорған) – «Жеңіс» (Астана) – 2:3
Осы турдағы ең нәтижелі ойын Алматыда тіркелді. «Жетісу» Астанадан келген «Жеңісті» қабылдаған. Қонақтар бірден шабуылға шығып, 14-минутқа дейін екі гол соғып үлгерді. Адилио мен Лука Имнадзенің дәл соққылары «Жетісу» командасын біраз есеңгіретіп тастады.
Дегенмен талдықорғандықтар тез сынған жоқ. Нұрбол Әнуарбековтің голы команданы ойынға қайта қосты. Артынша тәжірибелі Серікжан Мұжықов есепті теңестіріп, бірінші таймның өзін нағыз тартысқа айналдырды. Бұл жерде «Жетісудың» мінезін атап өткен жөн: 0:2 есебінен кейін команда абдырап қалмай, қысқа уақыт ішінде жауап бере алды.
Екінші таймда ойын біршама сақ жүрді. Екі команда да қателіктің құны жоғары екенін түсінді. Дәл осындай сәтте тәжірибе шешуші рөл атқарды. Исламбек Қуат 74-минутта өз мүмкіндігін пайдаланып, «Жеңіске» маңызды жеңіс әкелді. Бұл нәтиже астаналық клубтың турнирлік жағдайын жақсартты, ал «Жетісу» үшін қорғаныстағы қателіктер тағы да қымбатқа түсті.
«Елімай» (Семей) – «Каспий» (Ақтау) – 0:1
Семейдегі матч турдың басты сенсацияларының бірі болды. «Елімай» өз алаңында фаворит саналды, әсіресе жанкүйер қолдауы мен құрам сапасын ескерсек, алаң иелерінен сенімді ойын күтілген. Команда шынымен де басымдық танытты: көп шабуыл жасады, допқа көбірек иелік етті, қарсылас қақпасына жиі соққы бағыттады.
Бірақ футболда статистика әрдайым нәтиже бермейді. «Елімай» 20-ға жуық соққы жасағанымен, шешуші сәтте дәлдік жетіспеді. Бірде қақпашы құтқарды, бірде шабуылшылар асығыстық танытты. Команданың шабуылдағы қысымы жүйелі болғанымен, соңғы фазада нақты шешімдер әлсіз шықты.
«Каспий» керісінше, өте жинақы әрі шыдамды ойнады. Қонақтар көп шабуыл жасамады, бірақ өз мүмкіндігін күтті. 78-минутта Ноа Ндомбаси сол аз мүмкіндіктің бірін голға айналдырып, матч тағдырын шешті. Бұл жеңіс «Каспий» үшін психологиялық тұрғыдан өте маңызды болды.
«Астана» (Астана) – «Қызылжар» (Петропавл) – 2:1
«Астана» үшін бұл кездесу маусымдағы маңызды сынақтардың бірі болды. Елордалық клуб соңғы турларда тұрақсыз ойнап, көшбасшылар тобынан алыстап қалған еді. Сондықтан «Қызылжарға» қарсы матчта жеңіс ауадай қажет болды.
Бірінші таймда ойын тең дәрежеде өтті. «Астана» допқа көбірек иелік етуге тырысқанымен, петропавлдықтар өте қауіпті қарсы шабуылдар ұйымдастырды. «Қызылжар» стандарт жағдайларда да, жылдам шабуылдарда да алаң иелеріне қиындық тудырды. Бұл матчтың оңай болмайтыны алғашқы минуттардан-ақ байқалды.
Екінші тайм бастала сала Юрий Перцух қонақтарды алға шығарды. Бұл гол «Астананы» оятқандай болды. Елордалықтар қысымды күшейтіп, небәрі бірнеше минут ішінде ойынды өз пайдасына бұрды. Алдымен Ян Вороговский есепті теңестірді, кейін дәл сол Вороговскийдің белсенділігінен соң Карло Бартолец жеңіс голын соқты.
Бұл ойында «Астананың» мінезі көрінді. Команда жеңіліп жатып, тез жауап берді және психологиялық қысымнан шыға алды.
«Тобыл» (Қостанай) – «Ертіс» (Павлодар) – 1:0
Қостанайдағы матч екі команда үшін де аса маңызды еді. «Тобыл» да, «Ертіс» те маусымды күткендей бастай алған жоқ. Сондықтан бұл кездесуде тек үш ұпай ғана емес, командалардың ішкі сенімі де таразыға түсті.
Бірінші таймда ойын аса ашық болмады. Екі ұжым да сақтықпен ойнап, қарсылас қателігін күтті. Ал тайм соңында Роман Асранқұловтың қызыл қағазы «Тобылды» қиын жағдайға қалдырды. Көпшілік екінші таймда «Ертіс» сан басымдығын пайдаланады деп ойлаған шығар.
Алайда керісінше болды. «Тобыл» аз құрамда жүріп те мінез көрсетті. 52-минутта Урош Милованович есеп ашып, матчтағы жалғыз голдың авторы атанды. Бұл гол қостанайлықтарға ауадай қажет еді. Одан кейін «Тобыл» қорғанысқа көбірек көңіл бөліп, нәтижені сақтап қалды.
«Алтай» (Өскемен) – «Ордабасы» (Шымкент) – 0:0
Араға бірнеше жыл салып, Премьер-лига ойындары Өскеменге оралды. «Алтай» осы маусымда алғаш рет өз алаңындағы ойынын Өскеменде қабылдады. Қонаққа «Ордабасы» келді.
Шымкент командасы матч бойы допқа көбірек иелік етті, ойынды бақылауға тырысты. Бірақ бұл басымдық нақты голдық мүмкіндіктерге көп айнала қойған жоқ. Қонақтар шабуылда жиі асықты, соңғы паста дәлдік жетіспеді. Қақпаға бағытталған соққылар саны да фаворит команда үшін жеткіліксіз болды.
«Алтай» болса, өз жоспарын өте тәртіпті орындады. Команда терең қорғанып, айып алаңы маңында тығыз ойнады. Аутсайдер болса да, алаң иелері қарсыласқа оңай мүмкіндік берген жоқ. Бұл тең есеп «Алтай» үшін жеңіспен пара-пар нәтиже деуге болады.
«Ақтөбе» (Ақтөбе) – «Қайсар» (Қызылорда) – 3:0
Есеп ірі болғанымен, бұл матч «Ақтөбе» үшін оңай өтті деуге келмейді. Бірінші таймда алаң иелері басым болғанымен, «Қайсар» қорғаныста шыдап бақты. Қызылордалықтар есепті ұзақ уақыт ұстап тұрды және қарсы шабуылдар арқылы мүмкіндік іздеді.
Ойынның бетбұрыс сәті екінші тайм басында болды. Алаңға шыққан Алияр Мұхамед өз қақпасына гол соғып алып, «Ақтөбені» алға шығарды. Осыдан кейін алаң иелері еркін ойнай бастады, ал «Қайсар» тәуекелге баруға мәжбүр болды.
Дегенмен интрига 89-минутқа дейін сақталды. Артур Шушеначевтің голы ғана матч тағдырын түпкілікті шешті. Ал қосымша уақытта Саламат Жұмабековтің автоголы есепті 3:0-ге жеткізді.
«Ұлытау» (Жезқазған) – «Қайрат» (Алматы) –1:1
Жезқазғандағы матч турдың басты оқиғаларының бірі болды. «Қайрат» чемпионат көшбасшысы ретінде келді, бірақ «Ұлытау» биыл ешкімге оңай қарсылас емес екенін тағы дәлелдеді. Алаң иелері ойын басынан-ақ батыл қимылдап, «Қайрат» қорғанысын бірнеше рет әбігерге салды.
Алматылықтарды бірнеше эпизодта қақпашы Темірлан Анарбеков құтқарды. «Ұлытау» шабуылшысы Ариагнер Смит екі рет өте қауіпті жағдайға шықты, бірақ мүмкіндігін пайдалана алмады. «Қайрат» болса, біртіндеп ойынға кіріп, өз сәтін күтті.
33-минутта Дастан Сәтпаев тағы да шеберлігін көрсетті. 17 жастағы шабуылшы Ойва Юкколамен әдемі комбинация жасап, айып алаңына кірді де, допты алыс бұрышқа дәл бағыттады. Бұл оның чемпионаттағы алтыншы голы болды және Сәтпаевтың «Қайрат» шабуылындағы басты тұлғаға айналып келе жатқанын тағы көрсетті.
Бірақ бірінші тайм соңындағы Әділет Садықбековтің қызыл қағазы матчтың сценарийін толық өзгертті. Екінші таймда «Қайрат» көбіне қорғануға мәжбүр болды. «Ұлытау» допқа көбірек иелік етіп, алматылықтардың айып алаңын жиі торуылдады. Бірнеше соққы қақпа маңынан өтті, бір эпизодта доп маңдайшаға тиді.
Ақыры алаң иелері өз дегеніне жетті. Бұрыштамадан кейін Максим Чалкин баспен дәл соғып, есепті теңестірді. Бұл «Ұлытаудың» басты қаруы – стандарт жағдайларды тиімді пайдалану екенін тағы көрсетті. Соңғы минуттарда жезқазғандықтар жеңіске де ұмтылды, бірақ «Қайрат» бір ұпайды сақтап қалды.
Премьер-лиганың 10-туры 16-17 мамыр күндері өтеді.