5-6 мамыр күндері футболдан Қазақстан Екінші лигасының кезекті турында жанкүйерлер тартысқа толы матчтардың куәсі болды. Бұл жолы барлық ойында гол соғылып, командалар шабуылға басымдық бергенін көрсетті. Әсіресе, «Жетісу Ж» мен «Жас Қыранның» нәтижелі ойыны көпшіліктің назарын аударды.
Турдың ең сенімді жеңістерінің бірін «Қаршыға» командасы тіркеді. Өз алаңында «Хромтауды» қабылдаған ұжым 4:1 есебімен басым түсті. Кездесудің басты кейіпкері Данил Литвиненко болды. Ол дубль авторы атанып, матчтың үздік ойыншыларының бірі ретінде көзге түсті.
«Қайсар Ж» мен «Атырау Ж» арасындағы матч соңғы секундтарға дейін тартысты өтті. Кездесудің тағдырын Сержан Батырбектің 90+1 минутта соққан голы шешіп, қызылордалық командаға жеңіс сыйлады.
«Тараз Ж» мен «Талас» арасындағы ойында жеңімпаз анықталған жоқ. Тараздықтар бірінші болып есеп ашқанымен, қонақтар матчтың соңғы минутында таразы басын теңестіріп кетті –1:1.
Осындай есеп «Тұран Ж» мен «Ордабасы Ж» матчында да тіркелді. Шымкенттік клубтың жастары есеп ашқанымен, түркістандықтар екінші таймда жауап голын соғып, бір ұпайды еншіледі.
Ал турдың ең жарқын матчтарының бірі «Жас Қыран» мен «Хан Тәңірі Ж» арасында өтті. Алматылық ұжым қарсылас қақпасына алты гол соғып, 6:2 есебімен жеңіске жетті. Нұрайдар Әскербек дубль авторы атанса, шабуыл шебіндегі белсенді ойын команданың ірі жеңісіне жол ашты.
Бұл конференцияда да нәтижелі ойындар аз болған жоқ. «Оқжетпес Ж» өз алаңында «Алтай Ж» командасын 5:2 есебімен жеңді. Мадияр Шәріпов екі гол соғып, көкшетаулықтардың жеңісіне үлкен үлес қосты.
«Ертіс Ж» солтүстік дербиінде «Қызылжар» жастарынан 2:1 есебімен басым түсті. Алаң иелері алғашқы таймда-ақ екі гол соғып, сол басымдықты матч соңына дейін сақтап қалды.
Қарағандыда өткен матчта «Шахтер Ж» Астанадан келген «Жеңіс» жастарын 3:1 есебімен тізе бүктірді. Қарағандылықтар алғашқы 21 минут ішінде үш гол соғып, ойын тағдырын ерте шешті.
Турдың ең нәтижелі ойыны Талдықорғанда өтті. «Жетісу Ж» қарсыласы «Ұлытау» жастарын 9:2 есебімен ойсырата жеңді. Әділ Аманғазы хет-трик авторы атанса, Ибрахим Байділдин дубльмен көзге түсті. Жалпы матчта 11 гол соғылып, бұл турдың рекордына айналды.
Ал «Аңсат» пен «ВПР Астана» арасындағы кездесу 1:1 есебімен аяқталды. Екі команда да бір-бір голдан соғып, ұпай бөлісті.
Матч нәтижелері:
Оңтүстік-батыс конференциясы
«Қаршыға» – «Хромтау» – 4:1
«Кайсар Ж» – «Атырау Ж» – 1:0
«Тараз Ж» – «Талас» – 1:1
«Тұран Ж» – «Ордабасы Ж» – 1:1
«Жас Қыран» – «Хан Тәңірі» – 6:2
Солтүстік-шығыс конференциясы
«Оқжетпес Ж» – «Алтай Ж» – 5:2
«Ертіс Ж» – «Қызылжар Ж» – 2:1
«Шахтер Ж» – «Жеңіс Ж» – 3:1
«Жетісу Ж» – «Улытау Ж» – 9:2
«Аңсат» – «ВПР Астана» – 1:1.