Биыл әйелдер лигасының ауқымы кеңейген. Қатысушылар саны да артты. Былтыр 14 команда ойнаса, биыл 19 команда бар. Сондықтан командалар екі конференцияға бөлінген. 4-5 мамыр күндері екінші тур ойындары өтті.
Бұл турдағы ойындар тартысты нәтижелерімен ерекшеленді. Кейбір командалар чемпиондыққа басты үміткер екенін аңғартса, енді бірі маусымдағы алғашқы ұпайлары үшін күресті.
4 мамыр күні А конференциясында төрт ойын өтті. Былтырғы маусымда ел чемпионатында қола жүлдеге қол жеткізген түркістандық «Тұран» биыл да жоғары орындардан көрінуге ниетті екенін байқатты. Команда сырт алаңда жезқазғандық «Ұлытауды» 4:0 есебімен ірі жеңді.
Сондай-ақ қызылордалық «Қайсар» Ақтауда «Каспийден» басым түссе, шымкенттік «Ордабасы» Алматыда «Қайратты» тізе бүктірді. Ал «Атырау» сырт алаңда «Жетісуды» минималды есеппен жеңді.
А конференциясы ойындардың нәтижелері:
- «Каспий» (Ақтау) – «Қайсар» (Қызылорда) – 0:1
- «Ұлытау» (Жезқазған) – «Тұран» (Түркістан) – 0:4
- «Қайрат» (Алматы) – «Ордабасы» (Шымкент) – 1:2
- «Жетісу» (Талдықорған) – «Атырау» – 0:1
5 мамыр күні В конференциясында бес матч өтті. Турдың ең ірі жеңісін «Ақтөбе» клубы тіркеді. Ақтөбелік футболшылар елорданың «Астана» клубын 10:0 есебімен ойсырата ұтты.
Елордадағы тағы бір кездесуде «Жеңіс» көкшетаулық «Оқжетпесті» 7:1 есебімен жеңді. Ал семейлік «Елімай» өз алаңында «Тобылдан» 0:1 есебімен ұтылып қалды.
Өскеменде өткен матчта қарағандылық «Шахтер» «Алтайды» дәл сондай есеппен жеңсе, «Қызылжар» павлодарлық «Ертісті» 1:0 нәтижесімен тізе бүктірді.
В конференциясы. 5 мамыр нәтижелері:
- «Елімай» (Семей) – «Тобыл» (Қостанай) – 0:1
- «Алтай» (Өскемен) – «Шахтер» (Қарағанды) – 0:1
- «Қызылжар» (Петропавл) – «Ертіс» (Павлодар) – 1:0
- «Ақтөбе» – «Астана» – 10:0
- «Жеңіс» (Астана) – «Оқжетпес» (Көкшетау) – 7:1
Биылғы маусым Қазақстан әйелдер футболы тарихындағы ең ауқымды чемпионаттардың бірі болмақ. Ел біріншілігіне барлығы 19 команда қатысып жатыр. Командалар екі конференцияға бөлінген: А конференциясында 9 клуб өнер көрсетсе, В конференциясында 10 команда бақ сынауда.