7-8 мамыр күндері Қазақстан Бірінші лигасының бесінші тур ойындары өтті. Тур қорытындысы бойынша қарағандылық «Шахтер» турнир кестесіндегі көшбасындағы орнын сақтап қалды. Ал «Тұран» мен «Қайрат-Жастар» үздік үштіктегі орындарын нығайтты.
Турдың басты матчтарының бірінде «Шахтер» сырт алаңда Ақтаудың «Каспий» жастар командасын 2:0 есебімен жеңді. Кездесу барысында қарағандылықтар ойын тізгінін өз қолында ұстап, бірнеше қауіпті шабуыл ұйымдастырды. Екінші таймда Рифат Нұрмағамбет есеп ашса, кейін Роман Асылбаев таблодағы көрсеткішті еселей түсті. Осы жеңістен кейін «Шахтер» 13 ұпаймен турнир кестесінің бірінші сатысында қалды.
Екінші орында келе жатқан «Тұран» да кезекті жеңісіне қол жеткізді. Түркістандық ұжым сырт алаңда «Астана Ж» командасын 3:0 есебімен ойсырата ұтты. Гол авторлары – Матвей Герасимов, Марлен Айманов және Руслан Валиуллин. Команданың қоржынында 12 ұпай бар.
Алматылық «Қайрат-Жастар» өз алаңында «Елімай» жастарын 1:0 есебімен тізе бүктіріп, 11 ұпаймен үшінші орынға көтерілді.
Таразда өткен матчта жергілікті «Тараз» клубы оралдық «Жайықты» 2:1 есебімен басым түсті. Алаң иелері алғашқы таймда белсенді ойын көрсетіп, 17-минутта Мадияр Нұралының голының арқасында алға шықты. Бірінші тайм соңында Айбар Ахмет пенальтиден есепті теңестірді. Алайда екінші таймда Диас Қалыбаев жеңіс голын соғып, тараздықтарға маңызды үш ұпай сыйлады. Осы жеңістен кейін «Тараз» тоғыз ұпаймен төртінші орынға көтерілді.
Екібастұзда өткен кездесуде «Батыр» мен «Ақтөбе Ж» жеңімпазды анықтай алмады. Қорытынды есеп – 1:1. Матчтың 6-минутында Азамат Айтпақаев алаң иелерін алға шығарса, 43-минутта Жаснұр Жексенбай таразы басын теңестірді. Екінші таймда есеп өзгерген жоқ.
Турдағы ең нәтижелі ойындардың бірі Қостанайда өтті. «Тобыл Ж» өз алаңында «Арысты» 4:3 есебімен жеңіп, жанкүйерлерге тартысты матч сыйлады.
Сонымен қатар алматылық «Хан-Тәңірі» «Оңтүстік Академиясы» командасын 3:0 есебімен ірі жеңіске жетті. Голдарды Асқар Бижан, Абулхаир Әбдірахманов және Шапирхан Шарипжан соқты.
Бесінші тур нәтижелері:
- «Каспий Ж» – «Шахтер» – 0:2
- «Хан-Тәңірі» – «Оңтүстік Академиясы» – 3:0
- «Тараз» – «Жайық» – 2:1
- «Батыр» – «Ақтөбе Ж» – 1:1
- «Қайрат-Жастар» – «Елімай Ж» – 1:0
- «Астана Ж» – «Тұран» – 0:3
- «Тобыл Ж» – «Арыс» – 4:3.