«Ұлытау» клубының жапониялық жартылай қорғаушысы Хироки Харада қазақстандық жанкүйерлердің назарын өзіне тез аударып үлгерді. Премьер-лиганың үшінші турында «Оқжетпеспен» өткен матчта Күншығыс елінің өкілі Қазақстандағы алғашқы голын соқты. Ол осы ойыннан кейін KFF League тілшісіне сұхбат берді.
– Хироки, Қазақстандағы алғашқы голыңызды соққанда қандай сезімде болдыңыз?
– Мен өте бақытты болдым. Себебі бұл – соңғы екі жылдағы алғашқы голым. Шынымды айтсам, ҚПЛ-ге бейімделу үшін маған әлдеқайда көп уақыт керек болады деп ойлағанмын. Сондықтан үшінші матчта-ақ гол соғу – үлкен сәттілік. Маған сенім артқан бапкерлер штабы мен командадағы серіктестеріме алғыс айтамын.
Сондай-ақ Көкшетаудағы атмосфера мені ерекше таңғалдырды. Жанкүйерлер өте көп болды, ал мұндай қолдаудың алдында ойнау – үлкен ләззат.
– Осы ретте ҚПЛ-де гол соққан Котаро Кишиден кейінгі екінші жапониялық футболшы атандыңыз. Өзіңізді Қазақстанға жапон ойыншыларына жол ашып жүрген футболшы ретінде сезінесіз бе?
– Осындай жолды бастап беретін адам болсам, мен үшін үлкен қуаныш болар еді. Кезінде басқа адамдар маған көмектесті, енді мен де келесі жапониялық футболшыларға сондай қолдау көрсеткім келеді.
Қазір чемпионатта үшеуміз бармыз – мен, Юси Симамура және Котаро Киши. Барлығымыз гол соғып, жақсы ойын көрсетуге тырысамыз. Жапониялық ойыншылар ретінде ҚПЛ-ды шын мәнінде жандандырып, чемпионатты қызығырақ еткіміз келеді.
– «Ұлытауға» ауысу нұсқасы қалай пайда болды? Қазақстан чемпионаты туралы не білдіңіз?
– Қазақстанда жапониялық футболшыларға деген қызығушылық Котаро Кишидің өткен маусымдағы жарқын ойынынан кейін артты. Мен онымен Черногорияның бір лигасында ойнадым, сондықтан «Ұлытау» клубының басшылығы маған назар аударды.
Мен ҚПЛ-дің жергілікті футболшылар мен легионерлер деңгейі жоғары мықты чемпионат екенін білетінмін. Жасанды алаңдардың ерекшелігіне де дайын болдым.
– Өзіңіз үлгі тұтатын футболшы бар ма?
– Менің кумирім – Кака. Бала күнімде оған қатты таңғалатынмын. Тіпті мектепте оқып жүргенде де оның нөмірін таңдауға тырысатынмын.
Мен оның мыңдаған хайлайтын көрдім, техникасы мен ойын стилін үйренуге тырыстым.
– Қазақстандағы өмірге бейімделу қалай өтіп жатыр? Футбол стадиондарынан бөлек қандай жерлерді көріп үлгердіңіз?
– Бейімделу өте жақсы өтіп жатыр. Қазақстанға келмей тұрып Астана мен Алматы туралы ақпараттарды оқыдым, жергілікті климат жайлы естідім. Бұл қалаларда көрікті жерлер көп екен, бос уақытым болғанда міндетті түрде аралап көргім келеді.
– Жапонияға қайтарда Қазақстаннан өзіңізбен бірге міндетті түрде алып кететін үш зат қандай?
- «Рахат» шоколады – өте дәмді, нағыз бренд.
- Қазақстан шайы.
- Дәстүрлі киім – шапан. Бұл қазақ мәдениетін еске түсіретін тамаша естелік болады.
«Ұлытаудың» маусымдағы мақсаты туралы
– Команданың осы маусымдағы басты мақсаты қандай?
– Біз маусымды өте жақсы бастадық. Алда қиын матчтар көп екенін түсінеміз. Бірақ басты мақсат – әр ойында команда болып күресіп, маусымды турнир кестесінде мүмкіндігінше жоғары аяқтау.