Мемлекет басшысы Қасым-Жомарт Тоқаев ұсынған кәсіби клубтарды жекешелендіру және коммерцияландыру бастамасы нақты нәтижесін бере бастады. Соның айқын дәлелі – «Ордабасы» клубының бүгінгі қарқыны.
Биыл қыста 2023 жылғы Қазақстан чемпионы, екі дүркін ел кубогының иегері «Ордабасы» клубын белгілі кәсіпкер Шахмұрат Мүтәліп жетекшілік ететін «Integra Construction KZ» компаниясы өз қарамағына алған болатын. Жаңа инвестор келісімен клубтың жұмысына тың серпін беріліп, басқару жүйесі мен маркетингтік бағытта елеулі өзгерістер жасалды.
Бұл өзгерістер бірден нәтиже бере бастады. Команда Премьер-лигада сенімді өнер көрсетіп, алғашқы сегіз турдан кейін 18 ұпай жинап, көшбасшылар қатарынан көрінді. Турнир кестесінде Қайрат клубымен ұпайы тең болуы – «Ордабасының» биылғы амбициясының қаншалықты жоғары екенін аңғартады.
Алайда басты жаңалық тек турнирлік көрсеткіштерде емес. Шымкентте футбол шын мәнінде үлкен мәдени құбылысқа айналып келеді. Қажымұқан Мұңайтпасов атындағы Орталық стадионда өткен әрбір ойын аншлагпен өтуде. Билеттер санаулы сағаттарда сатылып кетіп, «Sold Out» деген жазу үйреншікті жағдайға айналды.
Маусым басынан бергі матчтардағы көрермен саны да осы сөзімізді дәлелдейді:
– «Ордабасы» – «Ертіс»: 16 800 көрермен
– «Ордабасы» – «Қайсар»: 16 692 көрермен
– «Ордабасы» – «Атырау»: 17 700 көрермен
– «Ордабасы» – «Оқжетпес»: 16 500-ден астам көрермен
– «Ордабасы» – «Ақтөбе»: 16 786 көрермен
Әр матч тек ойын ғана емес, үлкен шоуға айналып отыр. Кездесулер алдында жанкүйерлерге арнайы концерттік бағдарламалар ұсынылып, елге танымал өнер жұлдыздары – Қайрат Нұртас, Төреғали Төреәлі, Shiza және ресейлік Tasso секілді орындаушылар сахнаға шығып, көрерменнің көңілін көтеруде. Түрлі ұтыс ойындары ұйымдастырылып, белсенді жанкүйерлерге бағалы сыйлықтар табысталуда. Мәселен, «Ақтөбемен» матч алдында Texas Fans қозғалысының негізін қалаушы Арман Үсеновке су жаңа автокөліктің сыйға берілуі – клубтың жанкүйерлерге деген құрметінің айқын көрінісі.
Бүгінде жанкүйерлер де мүлде басқа деңгейге көтерілді. Олар енді тек трибунада отырып қолдау көрсетуші ғана емес, матч атмосферасын қалыптастыратын басты күшке айналды. Атпен келіп, ұлттық нақыштағы киім кию, алау жағып, баннерлер көтеру – мұның бәрі Шымкенттегі футбол мәдениетінің ерекше келбетін айқындайды.
Әсіресе, «Ақтөбе» клубымен өткен ойын алдындағы перформанс көпшілікті таңғалдырды. Жанкүйерлер ұйымдастырған көрініс әлемдік деңгейдегі клубтардың, соның ішінде «Реал Мадрид» жанкүйерлеріне тән стильде өтті. Бұл – қазақстандық фанаттық мәдениеттің жаңа белеске көтерілгенінің белгісі.
Сарапшылар бүгінде Шымкентті тек өнеркәсіптік немесе мәдени орталық ретінде ғана емес, футбол қаласы ретінде де атай бастады. Егер осы үрдіс жалғасын тапса, Шымкент алдағы уақытта Қазақстандағы ең футболсүйер өңірге айналуы әбден мүмкін.
Қорыта айтқанда, «Ордабасы» клубының бүгінгі жетістігі – дұрыс басқару, тиімді инвестиция және жанкүйерлермен жүйелі жұмыстың нәтижесі. Толық стадиондар, ерекше перформанстар мен жоғары нәтиже – мұның бәрі қазақ футболының жаңа кезеңі басталғанын көрсетеді.
