3-4 мамыр күндері Қазақстан Премьер-лигасының 8-туры өтті. Бұл тур өте тартысты әрі күтпеген нәтижелерге толы болды. Кейбір фавориттер ұпай жоғалтып, қағаз жүзінде аутсайдер саналған командалар мінез көрсетті.
«Қызылжар» (Петропавл) – «Оқжетпес» (Көкшетау) – 0:1
Гол: Нұрымбет, 82 (0:1).
Алаңнан қуылды: Пищевич, 48
Бұл кездесу шиеленісті әрі қызықты сәттерге толы болды. Бірінші таймда екі команда да сақ ойнап, нақты қауіпті сәттер аз көрінді. Ойынның тағдырын 48-минуттағы Неделько Пищевичтің қызыл қағазы шешті.
Сан жағынан басымдыққа ие болған «Оқжетпес» екінші таймда қысымды күшейтіп, ақыры 82-минутта Әбинұр Нұрымбеттің дәл соққысымен жеңісті жұлып алды. «Қызылжар» он ойыншымен де соңына дейін күресті, бірақ есепті теңестіре алмады.
Осы жеңістің арқасында «Оқжетпес» турнир кестесінде үшінші орынға көтерілді.
«Ертіс» (Павлодар) – «Қайрат» (Алматы) – 0:1
Гол: Юккола, 25 (0:1).
«Ертіс» өз алаңындағы матчты бұл жолы Астанада өткізді. Павлодар командасы ел чемпионы «Қайратты» қабылдады. Алаң иелері бірнеше қауіпті шабуыл жасағанымен, мүмкіндіктерін пайдалана алмады. Ал Вячеслав Швырев соққан допты төреші футболшы ойыннан тыс қалмағандықтан есептемеді.
Матчтағы жалғыз голды «Қайрат» сапынан 25-минутта Ойва Юккола соқты. Фин футболшысының дәл соққысы Алматы командасына үш ұпай сыйлады. Соның арқасында «Қайрат» турнир кестесіндегі бірінші орнын ешкімге бермеді.
«Қайсар» (Қызылорда) – «Жетісу» (Талдықорған) – 1:1
Голдар: Ануарбеков, 42 (0:1).Мұхамед, 45+3 (1:1).
Қызылордадағы матч тең нәтижемен аяқталды. Екі команданың деңгейі шамалас болды. Алдымен 42-минутта «Жетісу» есеп ашса, араға көп уақыт салмай «Қайсар» жауап голын соқты. Оның авторы – шабуылшы Алияр Мұхамед.
Екінші таймда есепте өзгеріс болмады. Екі команда алма-кезек шабуылдағанымен, таблодағы көрсеткіш өзгермеді. «Қайсар» сапынан бұл ойынға команда көшбасшысы Виктор Мозес жарақатына байланысты қатыса алмады.
«Ұлытау» (Жезқазған) – «Елімай» (Семей) – 1:0
Гол: Бугулов, 5 (1:0).
Турдың күтпеген нәтижелерінің бірі. Бұған дейін жеңілмеген «Елімай» сырт алаңда «Ұлытауға» есе жіберді.
Матчтың тағдырын 5-минуттағы Бугуловтың голы шешті. Жылдам голдан кейін «Ұлытау» қорғанысқа көбірек көңіл бөліп, қарымта шабуылдарға сенім артты.
Екінші таймда «Ұлытау» екінші голды соққан. Бірақ Ариагнер Смиттің голын төреші ойыннан тыс қалды деп есепке алмады. Дегенмен алаң иелері соңына дейін қорғаныста сауатты ойнап, үш ойынға қол жеткізді.
Осы жеңістің арқасында Нұркен Мәзбаев шәкірттері турнир кестесінде төртінші орынға көтерілді.
«Атырау» (Атырау) – «Алтай» (Өскемен) – 1:0
Гол: Девенс, 31 (1:0) .
Алаңнан қуылды: Рабиу. 84
Бұл матчта «Атырау» прагматикалық футбол көрсетті. Турнир кестесінің төменгі жағында жүрген командаға қарсы бірден ашық шабуылға шықпай, есеппен ойнады. Бұл тактика өз жемісін берді.
Матчтағы жалғыз голды 31-минутта Девенс соқты. Матч жалпы тең өтті, бірақ шешуші сәтте «Атырау» тиімдірек ойнады.
«Алтай» қанша тырысқанымен, таразы басын теңестіре алмады. Қорытынды есеп – 1:0.
«Жеңіс» (Астана) – «Тобыл» (Қостанай) – 1:0
Гол: Әділов, 88 (1:0).
Бұл кездесуде тең дәрежеде өрбіді. Бірақ соңғы минуттарда «Жеңістің» жолы болды. Матчтың 88-минутында Алдаир Әділов жеңіс голын соқты.
«Тобыл» үш күн бұрын дәл осы стадионда Қазақстан кубогының 1/8 финалында «Астанадан» басым түскен еді. Бұл жолы қажетті нәтижеге қол жеткізе алмады.
Осы үш ұпайдың арқасында Астана клубы турнир кестесінде жағдайларын аз-кем жақсартып, 11-орынға көтерілді.
«Каспий» (Ақтау) – «Астана» (Астана) – 1:0
Гол: Әнуаров, 90+5-автогол (1:0).
Алаңнан қуылды: Қасым, 18.
Осы турдың ең басты сенсациясы Қызылордада тіркелді. Маусым басталғалы бірде-бір ойында жеңіске жетпеген Ақтаудың «Каспий» клубы елордадан келген «Астанадан» үш ұпай алды.
Матчқа келсек, 18-минутта «Астана» қорғаушысы Әлібек Қасым қақпашымен бірге-бір шығып бара жатқан «Каспий» шабуылшысы ереже бұзу арқылы тоқтатты. Төреші бірден қызыл қағаз көрсетті. Соған қарамастан, «Астана» шабуылда белсенді ойнады. Алайда өз мүмкіндіктерін пайдалана алмады. Тіпті, 84-минутта Иван Башич пенальтиден мүлт кетті. Ал төреші қосқан қосымша уақытта Санжар Әнуаровтың өз қақпасына соққан голы «Каспийге» тарихи жеңіс сыйлады.
«Ордабасы» (Шымкент) – «Ақтөбе» (Ақтөбе) – 2:0
Голдар: Эвертон, 2 (1:0). Әмір, 90+4 (2:0).
Турдың орталық матчы Шымкентте өтті. «Ордабасы» өз алаңында «Ақтөбені» қабылдады. Алаң иелері бұл матчқа барлық жағынан дайындалғаны көрініп тұрды. Толық стадион, жанкүйерлер перфомансы, шоу бәрі болды.
Қызығы, ойындағы екі гол кездесудің басында және соңында соғылды. Алдымен, 2-минутта бразилиялық шабуылшы Эвертон есепті ашты. Үзіліске дейін осы есеп сақталды. Бірінші таймда «Ақтөбе» сапынан Нанидың алыстан тепкен соққысы болмаса, қонақтар еш қауіп төндіре алмады.
Екінші кезеңде «Ақтөбенің» таразы басын теңестіретін керемет мүмкіндігі болған. Алайда шабуылшы Артур Шушеначев қақпашымен жеке-дара шығып, мүл ткетті. Жалпы, қонақтар 90 минут ішінде бірде-бір дәл соққы жасай алмады.
Ал төреші қосқан қосымша уақытта жас футболшы Жасұлан Әмір екінші голды соғып, матч нүктесін қойды.
Осы жеңістің арқасында Шымкент командасы ұпай саны бойынша «Қайратпен» теңесті.
Турдың келесі ойыны 9-10 мамыр күндері өтеді.
