Үш күнге созылған футболдан Бірінші лиганың төртінші тур ойындары мәресіне жетті. Бұл турда айтарлықтай тосын нәтижелер тіркелмегенімен, көшбасшылар ұпай жоғалтқан жоқ. Ал Түркістанның «Арыс» клубы өз алаңында «Астана» жастарын жеңіп, чемпионаттағы алғашқы жеңісіне қол жеткізді.
Матч нәтижелері:
«Ақтөбе-Ж» – «Каспий-Ж» – 3:3
«Елімай-Ж» – «Батыр» – 0:2
«Арыс» – «Астана-Ж» – 3:1
«Шахтер» – «Тобыл-Ж» – 3:0
«Оңтүстік Академиясы» – «Тараз» – 2:1
«Тұран» – «Хан-Тәңірі» – 1:0
«Жайық» – «Қайрат-Жастар» – 0:5
30 сәуір
«Ақтөбе-Ж» – «Каспий-Ж» – 3:3
Төртінші турдың шымылдығы Ақтөбеде жергілікті команда мен Ақтаудың «Каспий» жастары арасындағы тартысты матчпен ашылды. Батыс дербиінде екі команда да жеңіс үшін барын салып, жанкүйерлерге тартысқа толы ойын сыйлады. Алты гол соғылған кездесуде алаң иелері 84-минутқа дейін 1:3 есебімен жеңіліп жатқан еді. Алайда матчтың соңғы минуттарында ақтөбеліктер екі гол соғып, есепті теңестірді – 3:3.
«Елімай-Ж» – «Батыр» – 0:2
Алғашқы екі турда жеңілген «Батыр» ұжымы біртіндеп бабына келе бастады. Екібастұздық команда қатарынан екінші ойында жеңіске жетіп, турнир кестесіндегі жағдайын жақсартты. Бұл жолы олар сырт алаңда «Елімай» жастарын ұтты. Ал алаң иелері осымен екінші рет жеңіліп, кестенің төменгі бөлігіне сырғыды.
«Арыс» – «Астана-Ж» – 3:1
Турдың басты сенсациясы Арыста тіркелді. «Арыс» өз алаңында «Астана» жастарын қабылдап, 3:1 есебімен жеңіске жетті. Былтырғы Екінші лига жеңімпаздары алаң иелеріне лайықты қарсылық көрсете алмады. Осылайша, «Арыс» чемпионаттағы алғашқы жеңісіне қол жеткізіп, жанкүйерлерін қуантты.
1 мамыр
«Шахтер» – «Тобыл-Ж» – 3:0
Екінші ойын күнінде чемпионат көшбасшысы «Шахтер» мен турнир кестесінің соңында келе жатқан «Тобыл-Ж» командалары кездесті. Матч алаң иелерінің сенімді жеңісімен аяқталды. Қарағандылықтар қарсылас қақпасына жауапсыз үш гол соғып, жоғары орындар үшін күресте маңызды қадам жасады.
«Оңтүстік Академиясы» – «Тараз» – 2:1
«Шахтерді» өкшелеп келе жатқан Шымкенттің «Оңтүстік Академиясы» да бұл турда үш ұпай еншіледі. Өз алаңында тәжірибелі «Таразды» қабылдаған шымкенттіктер матч соңында жеңісті жұлып алды. 88 және 92-минуттарда Дінмұхамед Нышантай дубль жасап, командасына жеңіс сыйлады. Екінші таймда «Тараздың» екі футболшысы қызыл қағаз алып, алаңнан қуылды.
«Тұран» – «Хан-Тәңірі» – 1:0
Түркістанның «Тұран» клубы алғашқы турда жеңілгенімен, кейінгі үш ойында қатарынан жеңіске жетті. Бұл жолы олар «Хан-Тәңірін» 1:0 есебімен ұтты. Ал алматылық команда маусымдағы алғашқы жеңілісіне ұшырады. Осы жеңістен кейін «Тұран» 9 ұпай жинап, турнир кестесінде «Оңтүстік Академиясымен» бірге 2-3-орындарды бөлісіп тұр.
2 мамыр
«Жайық» – «Қайрат-Жастар» – 0:5
Бірінші лигаға қосылған «Жайық» клубы алғашқы екі ойында жеңіске жеткенімен, кейін қарқыны бәсеңдеді. Үшінші турда сырт алаңда «Хан-Тәңірінен» жеңілсе, бұл жолы өз алаңында «Қайрат-Жастардан» ірі есеппен ұтылды. Алматылықтар қарсылас қақпасына жауапсыз бес гол соқты.
Осылайша, төрт турдан кейін 14 команданың ішінде «Шахтер» мен «Қайрат-Жастар» ғана жеңіліссіз келеді.
Бірінші лиганың бесінші тур ойындары 7-8 мамыр күндері өтеді.