14 сәуір күні футболдан әйелдер арасындағы Қазақстан чемпионатының жаңа маусымы басталады. Биыл екінші мәрте өткелі жатқан әйелдер арасындағы бәсекеге бірқатар өзгеріс енгізілді.
Атап айтқанда, 2025 жылғы маусымның басты ерекшелігі – ел чемпионатында өнер көрсететін ерлер клубтарының әйелдер құрамалары да толыққанды қатысады. Өткен жылы чемпионатқа тек 4 өңірден 5 команда ғана тіркелген болатын. Яғни, былтырғы біріншілікке «БИІК-Шымкент», «Ордабасы», «Ақтөбе», «Оқжетпес» және «Томирис-Тұран» клубтары қатысты.
Ал биыл турнирде 14 команда бақ сынайды. Олар: «Атырау» (Атырау), «Жетісу» (Талдықорған), «Астана» (Астана), «Елімай» (Семей), «Қайсар» (Қызылорда), «Қызылжар» (Петропавл), «Ақтөбе» (Ақтөбе), «Ұлытау» (Ұлытау), «Қайрат» (Алматы), «Томирис-Тұран» (Түркістан), «Оқжетпес» (Көкшетау), «БИІК» (Шымкент), «Тобыл» (Қостанай) және «Жеңіс» (Астана).
Сондай-ақ биылғы маусымдағы тағы бір маңызды өзгеріс – әр команда құрамында кемінде 13 отандық футбол мектебінің түлегі болуға тиіс. Әйелдер арасындағы чемпионаттың 2025 жылғы маусымына 2009 жылы және одан ерте туған футболшы қыздар ғана қатыса алады.
