Көкшетаудың «Оқжетпес» клубы Қазақстан Премьер-лигасының 8-турында сырт алаңда Петропавлдың «Қызылжар» клубын жеңді. Осы матчтағы жалғыз голды жақында 21 жасқа толған жартылай қорғаушы Әбинұр Нұрымбет соқты. Футболшы матчтан кейін KFF League тілшісіне сұхбат берді.
– Әбинұр, жеңіс құтты болсын! Маусымдағы алғашқы голыңыз туралы айтып өтсеңіз. Жеңіс голын соғудың әсері бөлек шығар?
– Біріншіден, барлық көкшетаулық ақ-көк отбасыны осы жеңіспен шын жүректен құттықтаймын. Бұл – біз үшін өте маңызды жеңіс. Ал өзім үшін алғашқы голымды соғу – ерекше сезім. Мұндай сәтті ұзақ күттім. Қарсыластың қақпасын дәл көздеуіме көмектескен командаластарыма алғысымды білдіремін. Әрине, бәрі Алланың қалауымен болды. Бүгін маған гол соғу бақыты бұйырды. Бұл сезімді сөзбен жеткізу өте қиын.
– Бапкерлер штабы ойын алдында қандай тапсырма берді?
– Бапкерлер бізге тек алға ойнауды, доппен жылдам әрекет етуді және шабуылда белсенді болуды тапсырды. Сондай-ақ, бүгінгі матчта жеңіске жету үшін бар күшімізді салу керектігін айтты. Біз сол нұсқауларды орындауға тырыстық.
– Алдағы жоспарларыңыз қандай?
– Аллаға шүкір, осы жетістікке белгілі бір уақыт ішінде жетіп отырмын. Ендігі мақсатым – «Оқжетпес» командасымен бірге жоғары орындарға таласып, жақсы нәтижелерге қол жеткізуге барынша үлес қосу. Сонымен қатар, биыл Қазақстан ұлттық құрамасының жейдесін кию – басты мақсаттарымның бірі.
– Сіздің футболшы болып қалыптасуыңызға кімдер ықпал етті?
– Әрине, ондай жандарды әрдайым еске аламын. Маған көмектескен бапкерлер өте көп. Бірақ футболдағы алғашқы қадамдарыма үлкен үлес қосқан Иван Ильницкий пен Нұрсұлтан Есенқұловты ерекше атап өткім келеді. Осы кісілердің арқасында футболшы болдым деп айта аламын. Бүгінгі ойыным мен соққан голымды да сол бапкерлерімнің еңбегінің нәтижесі деп білемін.
– Әңгімеңізге рахмет! Сәттілік тілеймін!