16-17 сәуір күндері футболдан Бірінші лиганың 2-туры аясындағы матчтар өтті. Екі күнге созылған турдың алғашқы ойын күнінде командалар аса сақ ойнап, нәтижесінде аз гол тіркелді. Ал екінші күні өткен кездесулерде ұжымдар шабуылды күшейтіп, жанкүйерлерге нәтижелі ойын сыйлады.
Матч нәтижелері:
«Каспий-Ж» – «Қайрат-Жастар» – 1:1
«Жайық» – «Астана-Ж» – 1:0
«Тұран» – «Арыс» – 1:0
«Ақтөбе-Ж» – «Тараз» – 1:0
«Елімай-Ж» – «Хән-Тәңірі» – 3:3
«Шахтер» – «Батыр» – 4:0
«Оңтүстік Академиясы» – «Тобыл-Ж» – 3:0
16 сәуір
«Каспий-Ж» – «Қайрат-Жастар» – 1:1
Турдың шымылдығы Ақтауда «Каспий-Ж» мен «Қайрат-Жастар» командалары арасындағы кездесумен ашылды. Алғашқы турда тең ойнаған қос ұжым бұл жолы да ұпай бөлісті. Кездесудің 85-минутында «Қайрат» сапынан Әмірбек Базарбаев гол соғып, командасына алғашқы жеңісті сыйлауға жақын еді. Алайда арадан төрт минут өткенде Алмас Арменов таразы басын теңестіріп, жергілікті жанкүйерлерге зор қуаныш сыйлады – 1:1.
«Жайық» – «Астана-Ж» – 1:0
Былтыр Екінші лиганың екі конференциясында чемпион атанып, Бірінші лигаға қосылған командалар екінші турда жолықты. Бұл кездесуде Оралдың «Жайық» клубы «Астана» жастарына есе қайтарды деуге болады. Себебі өткен жылғы чемпиондар кездесуінде «Астана-Ж» «Жайықты» жеңіп, Екінші лиганың абсолютті чемпионы атанған еді. Кездесудегі жеңіс голын 42-минутта Айбар Ахмет соқты. Осылайша қатарынан екі ойында жеңіске жеткен «Жайық» 6 ұпаймен көш бастады.
«Тұран» – «Арыс» – 1:0
Түркістанның «Тұраны» қатарынан екінші турда дерби матч өткізді. Алғашқы турда «Оңтүстік Академиясымен» кездесіп, қарсыласына жол берген-ді. Ал екінші турда өз алаңында «Арысты» қабылдап, маусымдағы алғашқы жеңісін тіркеді. Ал биылдан бастап жеке клуб ретінде маусымға тіркелген «Арыс» осымен екінші турда да сәтсіздікке ұшырап, көш соңында қалып қойды.
«Ақтөбе-Ж» – «Тараз» – 1:0
Биыл жоғары топтан үміткер клубтардың бірі саналған «Тараз» екінші турда күтпеген жерден «Ақтөбе» жастарынан жеңіліп қалды. Бірінші турда «Батырды» ірі есеппен жеңген жамбылдықтардың «Ақтөбе» қақпасына бір гол соғуға да шамасы жетпеді. Есесіне, «Тараз» соқпаған голды алаң иелері соғып, маңызды жеңіске қол жеткізді.
«Елімай-Ж» – «Хән-Тәңірі» – 3:3
Турдың ең тартысты әрі нәтижелі матчтарының бірі Семейде өтті. Алты гол соғылған матчта командалар 3:3 есебімен тең түсті. Матч барысында «Хән-Тәңірі» екі мәрте есепте алға шыққанымен, «Елімай» жастары екі ретінде де таразы басын теңестірді. Тіпті екінші таймда алаң иелері есепте алға шығып, алғашқы жеңісіне жақын болды. Алайда қосымша минутта қонақтар пенальтиді сәтті орындап, қайтадан таразы басын теңестірді. Қорытынды есеп – 3:3.
«Шахтер» – «Батыр» – 4:0
Премьер-лигадан түскен тағы бір үміткер клуб «Шахтер» осы турда өз деңгейін көрсетті. Өз алаңында «Батыр» (бұрынғы – «Екібастұз») клубын қабылдап, қарсыласын ірі есеппен тізе бүктірді. Осы жеңістің нәтижесінде «Шахтер» 4 ұпаймен үшінші орынға көтерілді.
«Оңтүстік Академиясы» – «Тобыл-Ж» – 3:0
Бірінші лигада «Жайықтан» кейін «Оңтүстік Академиясы» командасы да жеңіліссіз, сәтті ойын көрсетіп келеді. Бірінші турда «Тұранды» тізе бүктірген оңтүстіктің ұжымы бұл жолы «Тобылдың» жастарын ірі есеппен жеңді. Сөйтіп, екі турда бес гол соққан «Оңтүстік Академиясы» гол айырмасы бойынша «Жайықты» басып озып, турнир кестесінде бірінші орынға шықты.
Келесі тур ойындары 23-24 сәуірге жоспарланған.
