18-19 күндері Қазақстан Премьер-лигасының алтыншы тур ойындары өтті. Бұл турдан кейін алматылық «Қайрат» қайтадан жеке-дара көш бастады.
«Қайрат» – «Каспий» – 2:0
Алматылықтар бұл матчқа айқын фаворит ретінде шықты және оны толық дәлелдей алды. Бірінші таймда «Қайрат» шабуылда белсенді болғанымен, гол соғуда дәлдік жетіспеді. Бірде доп қақпа бағанына тисе, енді бірде шабуылшылар өз мүмкіндіктерін мүлт жіберіп жатты. Қарсылас та қорғанысқа көбірек көңіл бөліп, алаң иелерінің адымын аштырмауға тырысты.
Алайда екінші таймда бәрі өз орнына келді. Дастан Сәтпаевтың алыстан бағыттаған добы
Эдмилсонға тиіп, есеп ашылды. Осы гол ойынның тағдырын шешіп берді деуге болады. Кейін Жоржинью есепті еселеп, матчтың нүктесін қойды.
«Елімай» – «Астана» – 2:2
Турдың ең тартысты матчтарының бірі. Былтыр бұл ұжымдар «Астана-Аренада» жолыққанда, матч 3:3 есебімен аяқталған. Бұл жолы да жанкүйерлер бірнеше голға куә болды. Кездесуде есеп жылдам ашылды. «Астана» қорғаушысы Әлібек Қасымның асырған пасын Марин Томасов керегіне жаратып, командасын алға шығарды. Бірақ «Елімай» да қарап қалмады. Өте тез арада жауап қайтара алды. Бұрыштамада келген допқа бірінші жеткен қорғаушы Әділбек Жұмаханов Чондрич қақпасынан саңылау тапты. Одан кейін номинальды алаң иелері тіпті алға шыққан. Абзал Бейсебеков өз айып алаңында тәртіп бұзып, төреші пенальти белгіледі. Нүктеге келген Плакка мүлт кетпеді. Үзіліске дейін семейліктер жеңімпаз ретінде шықты.
Ал екінші кезеңде «Астананың» жас жұлдызы Мақсат Абраев сол қапталдан өте әдемі гол соғып, таразы басын теңестірді. . Қалған уақытта екі команда да жеңісті жұлып алуға тырысты, бірақ қақпашылар мен қорғаныс шебі жақсы жұмыс істеді.
«Ордабасы» – «Оқжетпес» – 2:1
Шымкенттегі матч нағыз драмаға толы болды. Бірінші таймда гол соғылмағанымен, ойын өте қарқынды өтті. Екінші таймда «Ордабасы» басымдық алып, есеп ашты.
Матч аяқталуға жақындағанда «Оөжетпес» есепті теңестіріп, сенсация жасайтындай көрінді. Бірақ қосымша минуттарда шымкенттіктер қайта гол соғып, жеңісті жұлып әкетті.
Бұл нәтиже «Ордабасыны» турнирлік кестеде жоғары көтерсе, «Оқжетпес» алғашқы жеңілісіне ұшырады. Соған қарамастан көкшетаулықтар турнир кестесінде алғашқы бестікте.
«Ұлытау» – «Тобыл» – 2:1
«Ұлытау» биыл фавориттерден ұпай алып, көпшілікті таңқалдыруда. Бұл жолы Жезқазғанда «Тобыл» командасын қабылдады. Қонақтар матчты қарқынды бастаған. Кездесудің 7-минутында Милованович қарсыластың қателігін тиімді пайдаланып, Қостанай клубын алға шығарды. Алайда «Ұлытауда» қарап қалмады. Анане Мартин алыстан жойқын соққысымен, Устименко қақпасынан саңылау тапты. Сөйтіп үзіліске дейін таразы басын теңестірді.
Екінші таймда алаң иелері пенальтиден алға шықты. Бір қызығы, олар бір ойыншыға кем қалғанына қарамастан, есепті сақтап қала алды. Қорытынды есеп – 2:1.
«Атырау» – «Қызылжар» – 0:1
Бұл матч тактикалық тұрғыда қызық өтті. «Атырау» әдеттегі қорғаныстық стилінен бас тартып, шабуылға көбірек көңіл бөлді. Бірақ дәл осы шешім ұпай жинауға кедергісін келтірді.
«Қызылжар» өз мүмкіндігін соңғы минутта пайдаланып, жеңісті жұлып алды. Бұл – тәртіп пен прагматизмнің жеңісі болды.
«Жеңіс» – «Ақтөбе» – 1:0
Чемпионатты сәтсіз бастаған қос ұжым Астанада жолықты. «Жеңіс» өткен турда Петропавлда ірі есеппен жеңілген. Сондықтан осы кездесуге барынша тыңғылықты дайындалғаны көрініп тұр. Команда есепті де жылдам ашты. Кездесудің 10-минутында айып соққысынан кейін қорғаушы Сағадат Тұрсынбай керек жерден табылып, қақпашы Заруцкийден айласын асырды. Осы есеп ойын соңына дейін сақтап қалды.
«Қайсар» – «Алтай» – 1:1
Бұл матчта екі аутсайдердің текетіресі өтті. «Қайсар» алға шыққанымен, ойын соңында жеңісті ұстап тұра алмады. Бірінші таймдағы Әділет Кеңесбектің голына, «Алтай» сапынан 86-минутта Попов жауап қатты.
«Қайсар» әзірге бұл маусымда жеңіске жете алмай жүр.
«Ертіс» – «Жетісу» – 1:2
Қайрат Нұрдәулетов былтырғы маусымда «Ертісті» жаттықтырған. Биыл жаңа командасымен Павлодарға қонаққа келген. Бапкердің бұл жорығы сәтті болды. «Жетісу» стандарттарды тиімді пайдаланып, үш ұпай еншіледі.
Талдықорған клубынан Адахаджиев пен Зиванович көзге түссе, «Ертістің» жалғыз голын пенальтиден Седько салды. Қорытынды есеп -1:2.