Кейінгі жылдары елімізде футболшылардың жан-жақты дамуына ерекше көңіл бөлініп келеді. Бұдан былай отандық футболшыларға физикалық дайындық пен техникалық шеберліктен бөлек, зияткерлік дамуға да басымдық беріле бастайды. Осы орайда Қазақстан футбол федерациясы Ұлттық кітап күні қарсаңында «Кітап оқитын ұлт – Читающая нация» қоғамдық қорымен бірлесіп, жаңа бастаманы қолға алды.
Бұл қадамның мәні терең. Өйткені қазіргі футбол шешім қабылдау, ойынды оқу, қарсыласты алдын ала болжау сияқты қабілеттерге негізделген интеллектуалды спортқа айналып барады. Ал футболшының мұндай қасиеттерін дамытуға кітаптың көмегі орасан.
Кітап оқу футболшыға бірнеше бағытта пайда береді. Біріншіден, ойлау көкжиегін кеңейтеді. Әртүрлі жанрдағы әдебиеттер ойыншының қиялын дамытып, қалыптан тыс ойлауға үйретеді. Екіншіден, зейінді бір арнаға шоғырландыру қабілетін арттырады. Бұл – алаңдағы әрбір эпизодта дұрыс позиция таңдап, жылдам шешім қабылдау үшін аса қажет дағды.
Үшіншіден, кітап спортшының психологиялық тұрақтылығын нығайтады. Кәсіби футболда қысым, сын, жеңіліс сияқты факторлар жиі кездеседі. Осындай сәттерде өзін-өзі басқару, эмоцияны бақылау – үлкен артықшылық. Ал оқу арқылы келген тәжірибе мен ой түю дағдылары бұл тұрғыда маңызды рөл атқарады.
«Қазақстан халықаралық озық тәжірибеге сүйенеді. Бүгінде әлемдік футболда оқу мен білім ойыншы даярлаудың ажырамас бөлігіне айналды. «Барселона», «Аякс», «Манчестер Сити», «Бавария» және «Спортинг» секілді жетекші клубтар мен академияларда футболшыны дамыту кешенді түрде жүргізіледі. Яғни, физикалық және техникалық дайындықпен қатар, интеллект, ойлау қабілеті мен тұлғалық өсуіне ерекше мән беріледі. Тәжірибе көрсеткендей, кітап оқып, өзін-өзі дамытып, талдай білетін спортшы алаңда да тиімді шешім қабылдап, жоғары нәтижеге қол жеткізеді. Бұл – ойын барысында да, жалпы өмірде де табысқа жетудің маңызды факторы», – деді ҚФФ Кәсіби клубтар арасындағы жарыстарды өткізу дирекциясының басшысы Бақытжан Пазылқайыр.
Айта кетейік, бүгінде елімізде футболмен 1 миллионнан астам адам айналысады. Футбол орталықтары мен академиялар жүйесінде шамамен 52 мың бала білім алса, оның ішінде 12 мыңнан астамы – қыздар. Кәсіби лигаларда 1 250-ге жуық ер адам және 500-ден астам әйел қатысады. Әуесқой футболмен шамамен 65 мың адам айналысады, олардың 6,5 мыңнан астамы Қазақстан футбол федерациясы өткізетін лигаларға қатысады.
«Кітап оқитын ұлт» пилоттық жобасына Қарағанды, Қостанай облыстары мен Шымкент қаласында 189 мыңнан астам адам қатысып жатыр. Олардың қатарында мектеп оқушылары, колледж және жоғары оқу орындарының студенттері, педагогтер, отбасылық әулеттер мен мемлекеттік қызметшілер бар.
