11-12 сәуір күндері Қазақстан Премьер-лигасының бесінші тур ойындары өтті. Осы турдың орталық кездесулері саналған Қостанайдағы «Тобыл» мен «Қайрат» және елордадағы «Астана» мен «Ордабасы» матчтары тең аяқталды.
«Атырау» (Атырау) – «Қайсар» (Қызылорда) – 2:0
Турдың алғашқы ойыны Түркістандағы «Атырау» мен «Қайсар» арасындағы кездесумен басталды. Бірінші таймда Қызылорда командасы белсенді қимылдады, допқа көбірек иелік етті. Бірақ шабуылшылары оңтайлы сәтті тиімді пайдалана алмады. Әсіресе, Алияр Мұхамед қақпашымен жеке-дара шығып, мүлт кетті. Ал екінші таймда «Атырау» футболшылары белсеніп, қатарынан екі гол соқты. Алдымен бұрыштамадан кейін Хвальконың голының арқасында «мұнайшылар» алға шықты. Ойын соңында Қалмұратов пенальтиден ойынның нүктесін қойды.
«Жетісу» (Талдықорған) – «Елімай» (Семей) – 0:1
Талдықорған командасы әзірге өз алаңындағы ойындарын Алматыда өткізіп жүр. Бұл жолы олар «Елімаймен» кездесті. Жанкүйерлер аса қауіпті шабуылдарды сирек көрді. Екі командада бірінші кезекте қорғаныста сауатты ойнауға тырысты. Матчтағы жалғыз голды биылғы маусымның басты джокері Роман Муртазаев соқты. Ол екінші таймда алаңға шығып, «Елімайдың» пайдасына пенальти алып келді. Сосын өзі орындап, жеңіс голын соқты. Бұған дейін Астанада «Тобыл» қақпасына да пенальтиден мергендік танытқан еді.
Осы жеңістің арқасында «Елімай» турнир кестесінде «Қайратты» қуып жетті.
«Тобыл» (Қостанай) – «Қайрат» (Алматы) – 1:1
Қостанайда өткен турдың орталық матчтарының бірі – «Тобыл» мен «Қайрат» арасындағы кездесу жанкүйерлерге нағыз тартысты ойын сыйлады.
Чемпионатта жеке-дара көш бастап тұрған алматылық клуб турнир кестесінің соңында тұрған «Тобылға» қонаққа барды. Қағаз жүзінде фаворит анық болғанымен, іс жүзінде бәрі басқаша өрбіді. Өйткені жуырда ғана осы екі команда Суперкубокта кездесіп, онда қостанайлықтар жеңіске жеткен еді. Сондықтан алаң иелері бұл ойында да жоғары мотивациямен шықты.
Матчтың басы «Тобылдың» белсенділігімен өтті. 5-минутта Александр Марочкин есеп ашқан, алайда VAR жүйесі офсайд деп санап, есепке алмады. Ал 13-минутта алаң иелері дегеніне жетті. Пап-Альюн Ндиайдың алыстан берген пасын сәтті пайдаланған Урош Милованович қорғаушыны ығыстырып, қақпашыны алдап өтіп, есеп ашты – 1:0.
Алайда «Қайрат» көп күттірмеді. 18-минутта Жоржиньоның тамаша пасынан кейін қарсылас қорғаушыларының қателігін тиімді пайдаланған Дастан Сәтпаев таразы басын теңестірді – 1:1.
Бірінші таймның қалған бөлігінде алматылықтар бірнеше қауіпті сәт ұйымдастырды. Эдмилсонның алыстан соққан добына қақпашы Сұлтан Бусурманов тосқауыл болса, Жоржиньоның соққысы қақпа бағанасына тиді.
Үзілістен кейін ойын қарқыны бәсеңдеген жоқ. «Тобыл» сапынан Асхат Тағыберген алыстан қауіпті соққы жасап, қақпашыны әбігерге салды. Ал «Қайрат» шабуылда Жоржиньо мен Сәтпаев арқылы бірнеше мүмкіндік тапқанымен, гол соға алмады.
Матчтағы соңғы қауіпті сәт 87-минутта тіркелді. Сәтпаевтың пасынан кейін Рикардиньо жақын қашықтықтан соққы жасағанымен, қақпашы өз орнында болды.
Осылайша кездесу 1:1 есебімен аяқталды. Нәтижесінде «Қайрат» көшбасшылықтағы орнын сақтап қалса, «Тобыл» маусымдағы маңызды ұпайына қол жеткізді.
«Астана» (Астана) – «Ордабасы» (Шымкент) – 1:1
Тағы бір орталық матч елордада өтті. «Астана» өз алаңында Шымкенттің «Ордабасы» клубын қабылдады.
Ойынның алғашқы бөлігінде қос команда да сақ ойнап, қауіпті сәттер көп болмады. 19-минутта қонақтар пенальти алуға жақын болды, алайда VAR көмегімен бас төреші Данияр Сахи шешімін өзгертіп, ереже бұзушылық болмағанын анықтады.
Бірінші таймда командалар нақты соққыларымен көзге түсе алмады. Үзілістен кейін де ойын өрнегі айтарлықтай өзгерген жоқ. Марин Томасов пен өзге футболшылардың соққылары дәл болмай жатты.
Есеп тек матчтың соңғы бөлігінде ашылды. 76-минутта Жасұлан Әмір алыстан дәл соққы жасап, «Ордабасыны» алға шығарды – 0:1.
Алайда «Астана» соңына дейін тырысып, қосымша уақытта таразы басын теңестірді. Бауыржан Исламхан сол қапталдан әдемі пас беріп, оны Ян Вороговский сәтті аяқтады – 1:1.
Қорытындысында тартысты өткен кездесуде жеңімпаз анықталмай, командалар бір-бір ұпайдан еншіледі.
«Оқжетпес» (Көкшетау) – «Ертіс» (Павлодар) – 2:1
Турдың екінші күнінде «Оқжетпес» пен «Ертіс» арасындағы кездесу тартысты өтіп, алаң иелерінің 2:1 есебіндегі жеңісімен аяқталды.
Бірінші таймда қос команда да сақ ойнап, есеп ашылған жоқ. Ойын тек екінші таймда қыза түсті. 72-минутта Дмитрий Бородин пенальтиден дәл соққы жасап, «Оқжетпесті» алға шығарды.
Алайда араға көп уақыт салмай, алаңға жаңадан шыққан Мирас Тұрлыбек таразы басын теңестірді – 1:1.
Кездесудің соңына қарай алаң иелері тағы бір пенальти орындау мүмкіндігіне ие болды. Бұл жолы Нұрғайни Бөрібаев мүлт кетпей, командасына жеңіс сыйлады – 2:1.
Қосымша уақытта ойын қыза түсіп, 90+9 минутта Еркебұлан Нұрғалиев қызыл қағаз алып, алаңнан қуылды.
Осылайша, «Оқжетпес» қатарынан екінші рет өз алаңында жеңіске жетіп, турнир кестесіндегі алғашқы үштікке тұрақтады. Ринат Алюетов шәкірттері сенімді ойын өрнегін көрсетіп, жанкүйерлерін қуанта білді.
«Алтай» (Өскемен) – «Ұлытау» (Жезқазған) – 1:2
Алматыдағы тағы бір матчта «Алтай» Жезқазғаннан келген «Ұлытауды» қабылдады. Вахид Масудов шәкірттері үшін кездесу сәтті басталған. Ойынның 17-минутында Драган Стоисавлевич есеп ашып, өскемендік клубты алға шығарды. Алайда қонақтар жылдам ес жиып, бірінші тайм аяқталмай жатып таразы басын теңестірді. Бұл голдың авторы – Сағи Мәлікайдар.
Екінші таймда ойын тең дәрежеде өрбіді. Дегенмен 75-минутта алаң иелері үшін жағдай қиындай түсті – Елисей Горшунов қызыл қағаз алып, командасын қиын жағдайда қалдырды.
Сан басымдығын тиімді пайдаланған жезқазғандықтар матч соңында жеңісті жұлып әкетті. Негізгі уақыттың соңғы минуттарында Давид Мартин дәл соққы жасап, «Ұлытауға» үш ұпай сыйлады –1:2.
«Қызылжар» (Петропавл) – «Жеңіс» (Астана) – 4:0
Осы турдың ең ірі нәтижесі Петропавлда тіркелді. «Қызылжар» Астанадан келген «Жеңіс» қақпасына жауапсыз төрт гол соқты. Фарер аралдары құрамасының ойыншысы Йоханнес Бьорталид осы турдың үздігі болды. Ол бұл матчта екі гол соқты және екі нәтижелі пас шығарып берді. Қорытынды есеп – 4:0.
«Ақтөбе» (Ақтөбе) – «Каспий» (Ақтау) – 1:0
Түркістанда «Ақтөбе» мен «Каспий» кездесті. Соңғы үш матчта жеңіске жете алмай жүрген «Ақтөбе» осы жолы сол сәтсіздікті тоқтатты. Олар бірінші таймда сауатты ойнап, үзіліске шығатын тұста есеп ашты. Шабуылшы Артур Шушеначев пенальтиден мергендігімен көзге түсті.
Үзілістен кейін «Актобе» есепті сақтауға тырысып, қорғаныста сауатты ойнады. Дегенмен, «Каспий» де қарап қалмай, бірнеше қауіпті шабуыл ұйымдастырып, таразы басын теңестіруге жақын болды.
Бұл матч Штефан Таркович үшін маңызды болды. Жаңа бапкер келгеннен кейін команда біртіндеп ойын өрнегін жақсартып келеді.
Осылайша, «Ақтөбе» үш матчтық жеңіссіз сериясын тоқтатып, маңызды үш ұпайға қол жеткізді. Ал турнир кестесінің соңында тұрған «Каспий» үшін жағдай әлі де күрделі күйінде қалып отыр.
